بلوچستان نا ضلع ہرنائی نا علاقہ شاہرگ ٹی نادرست بندغ آک کولا نا کانڑ آتے خاخر تسر۔
ویل شاہرگ نا علاقہ کوسٹ ٹی مس، کوالخواک 28 کولا کانڑ ٹی خاخر تننگ ءِ پک کرینو۔
داسکان کوالخوا تا کنڈان ویل ئنا رد ئٹ گیشتر حوال رسینگتنے، ویل ئٹی کس ئسے نا دو مننگ دائسکان پک متنے۔
ہرنائی نا جتا علاقہ آتیٹ و شاہرگ ٹی جتا پروجیکٹ آتا ردئٹ کولا پیشن دننگک، کشوکا کولا و ایلو مڈی تے روڈ ئٹ کراچی آ رادہ کننگک۔
بلوچستان ئٹ جتا کمپنیک تا پارہ غان کولا کشنگ نا کاریم برجاہ ءِ داسکان بلوچستان ٹی کاریم کروک بلوچ آجوئی خواہاک سلا بند تنظیم آتا کنڈان دا پراجیکٹس آتے بلوچ مڈی تا لٹ و پل پاریسہ سلاء بند جہلو آتیٹ ٹک کریسہ کرینو۔
شاہرگ ٹی تدوکا دے ویل آن گڈ پاکستان نا لشکر نا پارہ غان شاہرگ و ایب کیب نا علاقہ آتیٹ بھلو کچ اسیٹ آپریشن نا بناء مسونے۔
ہندی حوال تا رد ئٹ ویل آن گڈ فورسز زمینی و بڑزی آپریشن بناء کرینے آپریشن نا وختا پاکستانی فورسز و سلاء بند بندغ آتا جھڑپ آتا ہم احوال ارے۔
شاہرگ ٹی داکان مُست فورسز و سرکاری پروجیکٹ آتیٹا بلوچ آجوئی دوست آتا کنڈان جہلو کننگانے، داسکان تدوکا شام مروکا ویل ئنا ذمہ واری ءِ اسہ تنظیم ئسے نا کنڈان ہم قبول متنے۔