بلوچستان نا علاقہ ژوب ئٹ سلاء بند جلہو ئٹ پاکستانی فورسز ایف سی نا چار کارندہ مرگ نا گواچی و شش ٹپی مسر۔
آئی ایس پی آر نا ردئٹ من زکئی سیکٹر ژوب ئٹ ایف سی کارندہ آک پاکستان افغانستان سیم سر آ واڑ خلنگٹ اٹ گٹ ئسر ہراتم اوفتیا سلاء بند جلہو مس۔ کہوک آتیٹ حوالدار نور زمان، سپاہی شکیل عباس، سپاہی احسان اللہ و نائیک سلطان اوار ءُ۔ ٹپی تے سی ایم ایچ کوئٹہ دننگا ہراڑے اوفتا علاج مننگے۔
وزیر داخلہ شیخ رشید احمد پارینے کہ بلوچستان ئٹ تدینی نا مذمت کیوہ۔ ایف سی کارندہ تیا سم کاری افسوسناک ءِ۔
پین حوال ئسے نا ردئٹ شمالی وزیرستان ئٹ ہم سلاء بند جلہو اسیٹی پاکستان فوج نا کیپٹن تون اوار مسہ کارندہ مرگ نا گواچی مسر و شش کارندہ ٹپی مسونو۔ کہوک آتیٹ کیپٹن فہیم، سپاہی شفیع و سپاہی نسیم اوار ءُ۔
آئی ایس پی آر نا ردئٹ فورسز شمالی وزیرستان نا علاقہ ڈوسالی ئٹ ڈھکوک حوال آ آپریشن کرے، آپریشن نا وختا سم کاری آن اِرا دہشت گرد مرگ نا گواچی و پاکستان فوج نا اسہ کیپٹن و اِرا سپاہی ہم مرگ نا گواچی مسر۔