وطن نا جانثار آک
نوشت: ماجد ماجدی
دی بلوچستان پوسٹ
وطن پنے لمہ نا، وطن پنے عزت نا، وطن پنے غیرت نا، وطن پنے ہستی نا، وطن پنے میرات نا، وطن پنے وجود نا، وطن پنے حیا نا، وطن آئی پنے لج و ننگ حیا و شرف ئٹ زند نا۔
وطن پارہ لمہ ءِ، لمہ اسیتون ہر چنا ئسے فطری وڑئٹ دوستی مریکک، دا سوب آن لمہ آئی دوستی نا پنے تو وطن اونا وجودے۔
وطن اسے راج ئسے نا کل آن بھلا ثبوت پاننگگ وطن نا عزت ءِ چاہندار آک لمہ نا عزت ئتون گنڈرہ ہرا سد در سد گچین ءِ۔
نن تینا زیبلا شکری آ لمہ وطن بلوچستان نا ہیتے کینہ ہراننکن ننا عزت ہرا ننکن ننا وجود ہرا ننکن ننا پجار ارے۔
تاریخ تینا پنہ غاتیان تینا سینہ غان ہمو ورناتے، ہمو فکر آتے ، ہمو جانثار آتے ہچ بر گیرام دپک ہرافک تینا ہنینا آسراتا زندگی ءِ خواتنو بلکہ تینا لمہ وطن نا عزت و وجود کن تینا شکری ءِ جان تے قربان کرینو، ہر وڑ کہ مسنے ہروڑئٹ وطن نا رکھ اکن تینا جان تے تینا وجود آتے مخنگ مخنگ ئٹ ندر کریسہ کرینو۔
ہندن ارٹمی کنڈا تاریخ ہمو پن تے وختس تینا است آ جاگہ تفک ہرافک بیرہ تینا ذات تینا مفاد تینا مقصد اسکان وطن تون دغا بازی کرینو لغوری و بے شرمی ئٹ مفاد آتیکن وطن تون مہر کرینو ہرافتے تاریخ ساندہ “غدار” نا پنٹ خوندی کیک۔
وطن ءِ ہمو ورناک سرپند مسنو ہرافتے فطرت تینا اسہ بھلو تس اس تسونے ہرادے نن “احساس” پاننگ کینہ ہندا احساس لمہ تون مہر ودی کننگ نا پنے۔
لمہ وطن بلوچستان تون ہفتاد سال آن وڑ وڑئٹ وڑ وڑو تادی مسنے ہرا تادیک اینو پہ دے اسکان مننگ ئٹی ءُ، ظالم ہرانا خنک ہمے وختس ئسے آن ننا مڈی ننا وجودے خُلوک مسنو، ہرا ننا خیسن پیہن تے لُٹسہ تینا زندگی ءِ وڑ وڑنا عیاشی تٹی تدفسا ہرا مست انگا ساہدار اسے نا وڑ انت خواہسونے دا ڈیہہ و دا ڈیہہ نا باتی تون کرسہ کرینے۔
اسہ بھاز گچینو قول اسے چاہندار اسے نا کہ ظالم مظلوم ءِ ظلم کننگ کیک ولے دے اس ہندا ظلم ئنا حساب ءِ ہم ایتک، دا ہیت ءِ ہم چاہندار اس پارینے وختس ہم راج آک کہنگ آن کُٹپسہ بلکہ چپ تولنگ آن راج آک نیست مریرہ، ہندن دا گواچنی اسے ظالم نا ظلم آن فکرآک پین شابیت مرسہ کارہ پین ورناتے شعور بشخسہ کارہ ہرافک ظالم کن وبال مرسہ کیرہ۔
بلوچ گلزمین نا جانثار آک مست آ دشمن نا لٹ و پل، مڈی تا دزی، بے وسا راج ہنا زی آ مروکا ظلم نا سوب دشمن نا مونے سلوک ہندن ہرا لج او ننگ ایلو ڈے ئنا رکھ اکن تینا شاد انگا زندگی تے دشمن تو مزاحمت ئٹ ندر کرسہ بننگ ئٹی ءُ یخین ئٹ دا ورناک دا فکرآک تینے تینا راج ڈے ءِ سرپند مسونو، ہرافک زندگی ءِ ڈے اسے نا پنٹ ندر و سدخہ کرسہ شہید کننگ کن شہیداتا کسرٹی ہنسہ ءُ ہندا کسر ہراتے بلوچ گلزمین نا شہیداتا چیدہ بلوچستان پارہ۔
دشمن تون مون تروکا شہیداتا کاروان نا ایلم دلیرآک وختس بولان، وختس، شور پارود، وختس بیسل و پروم، وختس لجے و دوسئے وختس سینکری و سرلٹ، وختس کیچ، مند بلو، وختس بمبور، تراتانی، وختس کوہلو و بارکھان، وختس ہربوئی نا کسر ئٹ پھڈاتا خل تفسہ توشک بڈا لیلاڑو خلیسہ سفر کرسہ کیرہ وختس ہندا سفرتیٹی دشمن تئے واری مرسہ کیرہ اگہ ملک تو دشمن ءِ مڑداری نا شکست ملک ورناک فکرے پین بسن کرسہ تینا جہدے مونی درسہ کارہ۔
مزاحمت نا کسر پارہ ہراوڑ مرے سخت پاننگک و سخت ارے ولے کل آن سخت انگا وڑ اونا دشمن نا بے لغام آ لشکر تون مون تننگ ئنا ءِ تو ہندا مزاحمت نا بشخ ئٹ ڈے نا بے سد آ عاشق آک مرک ءِ دلدستہ تخسہ ملاس، بینگن، بے نپاد، بے تغ، بین آن خلوک مرسہ واہم تینا شہیداتون دغابازی کپسہ دشمنے ہروڑاٹ دا احساس تسونو کہ بلوچ گلزمین نا جانثار آک داسکان زندہ او تادم آجوئی نے آن تینا ڈے ءِ آجو کتنو نے مڑدار کریسہ بے آرام بے سکون کرسہ کرور۔
شہیداتا کسر ٹی ہنوکاتا زندگی کل آن گچین ءِ، پد سلوکا لغورآتا زندگی چاپلوسی عیاشی پیسہ مچ کننگ بے شرمی ئٹ دے تدفنگ آن بے دس ہچ اف۔
زندگی ہمو شاد و شکر گوندنگک ہرا دا جہانٹ اے جہانٹ سوگوی خنک ہرا دا جہانٹ وطن اسے نا پنا ندر مرے زندگی ایہن کل کیرہ ولے ہرا مون بڑزائی ہرا چس ہرا سچا غا زندگی لمہ وطن نا جانثار آتا کسرٹی ارے ہرا پین اسہ جاہ ئس افک ہرافتے گر غمے تینا بے وسا راج ہنا غمے ہراتے غمے تو بے وسا لمہ نا مڈی تا غمے ہرافتے دشمن نوش کریسہ پین بے لغام مننگ ئٹی ءِ تو دلیرآک اودے احساس تننگ کن تینا جان تا خیسنا دترتا قربانی ترسہ اودے پین زیات فریشان کرینو۔
ہندا شہیداتا فکر سال آتیان برجا ہراٹی ورناک بشخ ہلیسہ تینا لمہ نا لولی تا احسان نا بدلہ دشمن تو مزاحمت کننگ ئٹی او دا کسر نا سفر ٹی ہر عمر ہر وہی نا ورناک گون او۔ دا بھاز گچینو عمل اسے نم خننگ ئٹی اورے ورناک شہید مرسہ ئٹی او تینا فرض ءِ پورا کننگ ئٹی ءُ تینا کل ہیڑ ایلم تے دا احساس دا کلہو ءِ ایترہ زندگی ارے تو شہیدی نا زندگی کل آن گچین ءِ وطن نا آجوئی ننا نما وجودے، ننا نما عزت ءِ ہندن تینا وطن ہرادے دشمنے وختس تفرون، نن شہید مرون ولے کسرے سفرے ہلپرون، ہندن شہیداتا فکر پد سلوکا ورناتے جوزہ بشخنگ ئٹی ءِ، اوفتے پین سوگو کننگ ئٹی ءُ، ایلو ہرا ایلمک تینا زندگی تے عیاشی آرام خاچنگ ئٹ تدفنگ ءُ اوفتے ہم ہندا احساس ایترہ کہ خن ملبو تینے پو مبو اگہ نم خوارے پین کس اس ننا زی ءِ بادشاہی کپ ننا ڈیہہ ءِ ننے آن دپ تونم تینے سرپند مبو نہ تو اسے دے اس نمے ہم دشمن تینا کیرنگ ہڑسو نم ہم ظالم نا ظلم آن بچپرورے۔
سنگت آک دا ہیت ءِ جوان پوہ مرور کہ دا ہم سوبر ءُ گپ ئسے ظالم اس اخس تینا مستی ئٹی موج کرسہ مظلوم اسے آ ظلم کے ولے تاریخ دن ہم پاہک ہر ظالم ءِ اونا کروکا ظلم نا ورندی گہس وڑنا وڑ ضرور ملک ، تو دا ڈیہہ نا عاشق آک راج اکے ڈیہہ آکے فکری آ ٹولی تون سفر برجا تخسہ دا گڑاتے ہچبر بے پام کتنو کپسہ ہرا دے پہ دے آن دشمنے بے جارات و ذہنی نادراخی اسیٹی اوار شاغاسہ دشمنے نیست کرسہ آجوئی کن پند خلیسہ تینا مزل نا کنڈا بے غرز بے خوف شہید مرسہ گل زمین نا خاک ئتون یاری کننگ ئٹ دفن مریرہ ہرا خاک ہنا مش تون وفاداری نا آخری مہر و فرض ہنا پوروی کرسہ تینا خنتے تر کرسہ کل ئنا خنتے ملفسہ تینٹ گلزمین نا خاک ءِ پسند کیرہ۔
زندہ مریرے وطن نا شہیداک
زندہ مریرے وطن نا دلیرآک
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔