زالبول تا جہانی دے آ بلوچستان نا بنجائی شار کوئٹہ تون اوار ایلو ہند آ تیا مجلس آک ہڈ تننگار، ہڈ تروک مجلس آ تیٹ جامعہ بلوچستان ٹی مروک مجلس “وومن کانفرنس” غٹ آن نمایاں اس، ہرا تدوکا دے تیان چاگردی حوالکاری میڈیا آ بحث و شرہ نا سرحال ئس۔
زالبول تا دے ئنا رد ئٹ جامعہ بلوچستان نا بست و بند نا کنڈ آن کمک نہ کننگ آ خوانندہ آک یونیورسٹی نا ماڑی نا پیشن آ کانفرنس ءِ تینا ہڈ تسُر ہراٹی زالبول آک اوار مسُر و اوار مروکا تا بھلو کچ ئسے بلوچستان یونیورسٹی نا درغ آن مونی ہننگ آ توننگا۔
بلوچ وومن کانفرنس ءِ بلوچستان ٹی خوانندہ آتیکن کاریم کروک تنظیم بلوچ اسٹوڈنٹس ایکشن کمیٹی نا کنڈ آن ہڈ تننگا۔ دا بابت ئٹ تنظیم نا ترجمان تینا شابیت آ بیان ءِ شینگ کریسہ پارے کہ بست و بند نا ہڑاند آتیان بیدس ہم زالبول تا جہانی دے ئنا بابت ئٹ جامعہ بلوچستان ٹی بلوچ ویمن کانفرنس ہڈ تننگا ہراٹی جتا تپہ آن تعلق تخوک درزن آتا کچ زالبول آک اوار مسُر۔
او تینا بیان ئٹ ودیک پارے کہ تنظیم نا کنڈ آن تقریباً مُسہ ہفتہ مُست زالبول تا جہانی دے ئنا رد ئٹ بلوچ ویمن کانفرنس ہڈ تننگ نا پڑو کننگاسس۔ جامعہ بلوچستان ہرا کہ غٹ صوبہ نا کُل آن بھلا خواننگ جاہ پاننگ مریک، ہراڑے غٹ بلوچستان آن خوانندہ آک خواننگ ءُ، دا ہیت ءِ اریسہ تنظیم دا مجلس ءِ جامعہ بلوچستان ٹی ہڈ تننگ نا فیصلہ کرے و بست و بند آن یونیورسٹی آڈیٹوریم نا موکل ہلک۔ یونیورسٹی نا بست و بند نا یقین تننگ آن گڈ تنظیم غٹ اوار مروک و مہمان تے اندا دے آ یونیورسٹی ٹی بننگ نا پارے و کانفرنس نا انتظامی عمل ءِ پورو کرے ولے زالبول تا جہانی دے و کانفرنس آن اسہ دے مست یونیورسٹی نا بست و بند و ضلعی بست و بند نا چم تا رد ئٹ جامعہ بلوچستان ٹی مجلس ہڈ تننگ آن نمن کننگا و کانفرنس ہڈ تننگ آ سخت وڑ ئنا تڑی ہم تننگا۔
تینا ہیت ئنا ایسری آ او پارے کہ جامعہ بلوچستان نا بست و بند نا خوانندہ آ تیتون دا وڑ ئنا روشت قابل مذمت ءِ۔ خواننگ جاگہ آک خوانندہ آتے کن جوڑ ءُ ولے اندا خوانندہ آتے ہچ وڑ ئنا مجلس ہڈ تننگ نا موکل تننگ مفک۔
یاتی مرے اینو نا دے ئنا بابت ئٹ لمز یونیورسٹی اوتھل نا خوانندہ آک پیس واک ہم کریر ہراٹی کہی خوانندہ آک دو ٹی بینر ارفیسہ اوار مسر و بلوچستان نیشنل پارٹی، وومن ڈیویلپمنٹ ڈیپارٹمنٹ بلوچستان نا کنڈ آن جتا مجلس ہم ہڈ تننگار۔