یوکرین آ روس نا جلہو آن گڈ ماسکو آ خلوکا رکھ آتا سوب آن فراوانی نا خُلیس ءِ اسہ کچ ئسے مننگ کروک وڑ ئٹ کم کننگ کن متحدہ عرب امارات نا کنڈ آن اوپیک نا سنگت ملک آتیان پیداوار ءِ ودِفنگ نا مننگ کرو خواست حوال تیان گڈ تیل ئنا نرخ آ تیٹ 12 فیصد آن گیش ئنا کمی بسونے۔
ڈان اخبار ٹی خبر تروک ادارہ ’رائٹرز‘ نا شینک مروک رپورٹ نا رد ئٹ جہانی پڑ آ تیل نا ارزشت آتا تاریخ نا کل آن بڑز کچ آن شیف بننگ نا سوب آن روسی فراوانی ٹی ہڑاند آتا بارو ئٹ منہ سرمایہ کار آتا خُلیس کم مسنے۔ بین الاقوامی توانائی ایجنسی نا پاننگ ءِ کہ تیل نا ذخائر آک ودیک کارمز ئٹی ہتنگ مننگ کیرہ۔
میزوہو ٹی توانائی نا مونی بروکا ڈائریکٹر باب یاوگر پاننگ ءِ کہ دا معمولی ءُ ہیت ئس اف، او تقریباً 8 لکھ بیرل باز ترندی ئٹ مارکیٹ ٹی ہتنگ کیرہ، نہ یکہ دا بلکہ او دمدستی وڑ ئٹ روسی سپلائی نا ہفتمی بشخ ءِ مارکیٹ ئٹ ہتنگ کننگ کیرہ۔
برینٹ آئل 12.4 فیصد آن 112.15 ڈالر فی بیرل آ بسونے، و ڈبلیو ٹی آئی 11.4 فیصد آن کم مریسہ 109.59 ڈالر فی بیرل مسونے۔
دنیا نا خام تیل نا اِرٹمی بھلا سپلائر روس نا کنڈ آن یوکرین آ جلہو کننگ آن گڈ جہان ئٹی روس نا تیل سپلائی آ رکھ خلنگ تون اوار پین مالی رکھ خلنگانے۔ دا وختا جہانی مارکیٹ ٹی تیل نا نرخ آ تیٹ 30 فیصد آن زیات ودکی مسونے و دا 2008 نا غٹ آن بڑز سطح یعنی 139 ڈالر فی بیرل آ سر مسونے۔
امریکی صدر جو بائیڈن سہ شمبے نا دے روسی تیل آ رکھ خلک ولے بھلا یورپی ملک آک دا فیصلہ ٹی اوار متوس، ہرا نا بھلا سوب ہمو ملک آتا روسی تیل آ زیات انحصار کننگ ارے۔
برطانیہ نا پاننگ اس کہ او روسی سپلائی ءِ ایسر کرو و پین منہ خریدار آک ہم روسی خام تیل ہلنگ آ رکھ خلکونو۔
مالیاتی ادارہ”جے پی مورگن” نا رد ئٹ روسی سمندری تیل نا تقریباً 70 فیصد ءِ بہا کننگ کن روس ءِ تیل ہلوک آتا پٹ پول نا چیلنج ارے۔