پشین نا علاقہ کلی چر بادیزئی ٹی اُرائی جیڑہ نا سوب آن ایلم سُم کاری کریسہ حقی آ ایلم ءِ کسفے۔
شابیتی حوال تا رد ئٹ پشین آن 15 کلومیٹر نا مُری آ ساڑی کلی چربادیزئی ٹی اِرا ایلم نا نیام ئٹ اُرا نا ویل آتیا چنکو جیڑہ ئسے گڈ صوفی صلاح الدین نا مار شراف الدین سُم کاری کریسہ تینا ایلم بہاوالدین ءِ کسفے و ہند آن فرار مننگ ٹی سرسہب مس۔
اسہ پین تدینی اسیٹی کلی بٹے زئی ٹی چنکو جیڑہ ئسے آن گڈ گلا خان نا مار خیر محمد لٹ ئٹ جلہو کریسہ تینا ایلم عصمت اللہ ءِ ٹپی کرے، پشین لیویز ٹپی آ بندغ ءِ سول اسپتال پشین آ سر کرے ہرادے پدان پین دارو درمان کن کوئٹہ رادہ کننگا۔