سینزدہ سال نا بیگواہی | محمد عمران لہڑی

الّمی خوانبو

رخصت اف – مرید بلوچ

مزاحمت زند ءِ ’’ای، ہمو ہراکہ جہانی امن ئنا ٹیکی ءِ دوئی کرینٹ، مونجائی تون انداسرپد مریوہ کہ بیدس تشدد...

بلوچ سلہہ بند تنظیم تا کروکا گڑاس فیصلہ تا جاچ __میرین بلوچ

جنگ اٹ ہچبر رحم مفک بلکہ جنگ ءِ نفسیاتی پڑا کٹوئی مریک جسمانی طاغت آن زیات نفسیاتی طاغت جنگ...

تاریخ نا پنہ غاک (چارمیکو بشخ) | خان خدائیداد خان – محبوب شاہ

تاریخ نا پنہ غاک (چارمیکو بشخ) خان خدائیداد خان نوشت: محبوب شاہ دی بلوچستان پوسٹ - براہوئی کالم 1896ء اٹی(No.7) و 1870ء...

سینزدہ سال نا بیگواہی

نوشت: محمد عمران لہڑی

دا اسہ گواچن ئسے کہ دڑد ئنا درشانی لوز آتیٹ ہمو ڈول مننگ کپک ہرا وڑ بندغ نا بدن ئٹ ساڑی مریک۔ لوز آک بیرہ اسہ مارشت اس ودی کیرہ ہرا کہ مارشت تخوکا بندغ ءِ تکلیف کیک۔ ولے ہرا انسان ءِ اولیاد نا دڑد رسینگک او زند ئٹ ڈکھیا مریک، تکلیف سگک، گیمرینگک۔ دا نوشت نا مسخت ہچبر دن مننگ کپک کہ ہرا لوز ئٹ ہمو ڈکھ، ویل، فریشانی تے درشان کیو ہرافتے اسہ بھلن جغر ءُ لمہ اس تینا سینہ غا تینا اولیاد کن سینزدہ سال نا ودار ئٹ تدیفے۔ ولے داسکان دا اُست ترخِفوکا ودار ایسر متنے۔ داسکان لمہ جیجا ہر در، گلی کوچہ، خلق شار آتیٹی گنوک آتیانبار کوکار خلیسہ تینا اولیاد نا آجوئی نا خواست ءِ کننگ ءِ۔ ہر وخت تینا ہنین آ مار نا فوٹو ءِ سینہ غا تخیسہ فریاد کیک پائک ”ذاکر کنا زند ءِ“۔ دا مُرغنا وخت ”سینزدہ سال“ ئٹ ہچو جارات نا ساعت اس دو بتنے۔ تینا اولیاد نا بیگواہی نا دڑد ئٹ رُلیسہ، خڑینک شولیسہ، فریاد کریسہ بے سیک مریک، کئک بدن نا تے سیک ایسر مریک، بے سُد مریسہ تمک۔ اندا بیہوشی ٹی بدن تے مچے جارات کیک، سیک رسینگک تے ولدا سما کیک۔ وختس کہ سما کیک ہوش ءِ سمبالک تو ولدا اولیاد نا دڑد، بیگواہی، جتائی اودے خڑینک شولنگ آ بےوس کیک، بے سُد مریک۔ بس اندادے لمہ نا زند۔ دا سینزدہ سال اندن تدینگار۔ دا سینزدہ سال نا ڈکھ، دڑد، فریشانی تے کس اس تینا گمان ئٹی ہم ہتنگ کپک ہرا کہ دا لمہ تینا نزور آ بدن آ سہیسہ تدیفینے۔

دا بیرہ سینزدہ سال افس بلکن سینزدہ سال نا انتظاری، سینزدہ سال نا فریاد، سینزدہ سال نا بے تُغی، سینزدہ سال نا خڑینک آک، سینزدہ سال نا دَر دَر آ رُلنگ، سینزدہ سال نا کسر تیا کوکار کننگ، سینزدہ سال نا پُر انگا تُغ آن دریہو کننگ، سینزدہ سال نا چیہانٹ، سینزدہ سال نا گڑتیک، سینزدہ سال نا فریشانیک، سینزدہ سال نا ڈکھاک ساڑی ءُ۔ ہر وخت لمہ نا گمان ئٹ بیگواہ آ اولیاد نا یات آک ساڑی ءُ۔ ہر وخت گڑتی، فریشانی نا گواچی ءِ۔ دا اسہ اندنو بے جاراتی ئسے کہ ہر ساعت لمہ دا گڑتی ٹی مریک کہ کنا مار ہرا حالیت ئٹ مروئے، بینگن، ملاس، بے تُغ، بے گڈر۔ لمہ نا زند اسہ جہندم اس جوڑ مسنے۔ عئید اس بریک تو لمہ نا کسفنگ کن بریک، خلق ئٹ شادکامی اس مریک تو لمہ نا دڑد آتے ودیفک، سیال آتیٹی سانگ برام اس مریک تو لمہ نا ٹپ آتے خازہ کیک۔ لمہ نا زند اسہ جہندم اس جوڑ مسنے۔

دا لمہ ورنا ذاکر مجید نا لمہ ءِ ہرا کہ اینو آن سینزدہ سال مُست 8 جون 2009 نا بے بخت آ دے آ اسہ اندونو ویل، فریشانی و ودار ئسے نا گواچی مس ہرا اینو اسکان برجا ءِ۔ اینو ذاکر مجید نا بیگواہی ءِ سینزدہ سال گدرینگا۔ دا سنزدہ سال بیرہ ذاکر بیگواہ اف بلکہ لمہ ئسے نا جارات بیگواہ ءِ، ہیڑ ئسے نا امیتاک بیگواہ ءُ، ایلم ئسے نا کوپہ بیگواہ ءِ، باوہ ئسے نا سیک بیگواہ ءِ، سنگت ئسے نا پدینا سیخا بیگواہ ءِ، گَل ئسے نا راہشون بیگواہ ءِ۔

ذاکر مجید بلوچ اسہ باشعور و خوانندہ ءُ ورناس ئس۔ خوانندہ غاتیٹی راجی شعور تالان کرے۔ بلوچستان نا ویل ءِ تینا کوپہ غاتیا ارفِسہ جہد کرے، کوکار کرے، خلق ہنکین تیٹی ورنا تے شعور تس۔ انت ئسے کن ذاکر مجید ءِ بیگوہ کننگا؟ دیر بیگوہ کرے تہ؟ انت ذاکر مجید نا جہد اونا ذات کن ئس؟ انت اسہ بندغ یا اسہ خاہوت ئسے نا آسودئی، آجوئی کن پند خلک، تکلیف سگا، جہد کرے؟

ہرا وخت کہ نن ذاکر مجید نا زند ئنا جاچ ءِ ہلینہ، اونا جہد و کڑد ئنا بارو ئٹ پٹ و پول کینہ تو ننے بڑز ئنا سوج آتا ورندی رسینگک۔ ذاکر تینا ذات کن جہد کتو، اسہ خاہوت ئسے کن پند خلتو بلکہ ذاکر جان نا زند راجی جہد کن ئس۔ اینو ذاکر بلوچ قومی دیہاڑ ئٹ اسہ زندہ ءُ کڑد ئسے نا خواجہ ءِ۔ دا داسینزدہ سال زندان تیٹی بند ءِ ولے اونا ہیت گپاک، ترانک داسکان بلوچ ورنا تا راہشونی ءِ کننگ ءُ۔

زند اِنا اندا ننا ارمان ئٹ ذاکر مجید
چلتنی آ سینہ تو زندان ئٹ ذاکر مجید

دا سینزدہ سال ءِ ہرا وڑ ذاکر نا لمہ جیجا تدیفینے لوز آتیٹی درشان مننگ کپک۔ دا سینزدہ سال ئٹی انت انت لمہ جیجا تینا نزور آ بدن آ سگانے دانا گمان ءِ ہم کس کننگ کپک۔ دا سینزدہ سال ئٹ سیلࣿ ئنا مُرغنا نن تا شوگیری، عئید آتیا خڑینک شولنگ، پُر انگا تُغ آن دریہو کریسہ چیہانٹ کننگ، کہی دے تا بینگنی، کہی نن تا ملاسی، گلی کوچہ غاتیٹی اولیاد کن کوکار کننگ، خلق شار تیٹی یخ باسنی تیٹی اولیاد نا آجوئی کن برانز کننگ، پین انت انت ڈکھ دڑد ساڑی ءُ دا سینزدہ سال ئٹ۔ دا کل دڑدی آ ساعتاک بیرہ لمہ کن ءُ۔ اینو ہم لمہ بیوس فریاد کننگ ءِ ”ذاکر کنا بھلا مار ءِ، کنا زند ءِ، کنا ہنکین نا است و نیست ءِ، کنا ذاکر ءِ پٹَبو، اتبو“۔


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔

پُوسکنا حوالک

ایران ءِ اقوام متحدہ ٹی زالبول آتا کمیشن آن کشنگ نا گمان ارے

برجاء سال ستمبر ئٹی ورنا کرد مسڑ مہسا امینی نا ایرانی پولیس نا دزگیری ٹی بےدادی ئٹ خون و...

ایلم شاہ فہد ءِ فورسز آک اُرا غان بیگواہ کریر، پاش کننگ مرے – رضیہ بلوچ

بلوچستان نا بنجائی شار شال ئٹی زوراکی نا بیگواہی تا برخلاف وائس فار بلوچ مسنگ پرسنز نا برانزی کیمپ اینو 4875 می دے ہمپریس...

سبی: اولیکو سندھ بلوچستان کرکٹ ٹورنامنٹ بناء مس

آل سندھ بلوچستان کرکٹ ٹورنامنٹ بناء مس، گوازیک سبی و حب چوکی ٹی مرور۔ بلوچستان نا ضلع سبی ٹی اولیکو آل سندھ بلوچستان کرکٹ ٹورنامنٹ...

کاہان آپریشن: خلنگوک بندغ آتا جون تیا فورسز آتا گھاٹ

تدوکا دے تیٹ بلوچستان نا ضلع کوہلو ٹی فوجی آپریشن ئٹی خلنگ مروکا بندغ آتا جونک کوہلو ڈی ایچ کیو آ رادہ کننگانو و...

پاکستان ءِ تروکا جی ایس پی پلس سٹیٹس آ یورپ دوارہ نظر شاغے – برلن مجلس

جرمنی نا بنجائی شار برلن ٹی ہندی جرمن گل ئنا کنڈ آن ڈیموکریسی اندا دے تیٹ بلوچستان انفو یونٹ نا پن آ اسہ دے...