بینکنگ نظام تعلیم و شعوری حکمت عملی
نوشت: ڈاکٹر ماہ رنگ بلوچبدل: ارسلان بلوچ
تعلیم مظلوم راج ءِ شعور ایتک، تعلیم مظلوم راج کن باہوٹی نا کسر ءِ ولے سوج دادے کہ ہرا تعلیم؟ ہمو تعلیم ہرادے نوآبادیات محکوم راج آتے فراوان کیک۔ دادے “بینکنگ نظام” تعلیم پارہ۔ دا تعلیم نا رد ئٹ مظلوم راج آتا شعوری و نغدکاری رویہ غاتے ایسر کننگک۔ محکوم راج آتے ٹی سوج ودی کننگ نا لائخی ءِ چُٹِفنگک۔ ہراٹی اُستاد تو عالم و خوانندہ ءِ ولے خوانندہ آتے ناپوہ قرار تنِگک۔ اُستاد ہیت کیک خوانندہ اودے یات کریسہ مُچ کیک دادے معلومات یا معلومداری تے اسہ ایلو آ سر کننگ پاننگ کینہ ولے تعلیم آخہ۔ دا بست و بند محکومی ءِ برجاء تخِنگ کن ءِ۔ دا بست و بند غلام ءِ تینا حالیت ئٹی خوش مننگ و اوفتے قدرت آن جتا کننگ نا بریبر ءِ۔
فرارے تینا کتاب “تعلیم اور مظلوم عوام” ئٹی پائک کہ دا بست و بند ئٹی بندغ و قدرت ءِ اسہ Dichotomy سے نا وڑ ئٹ نشان تننگک ہراٹی بندغ نا قدرت و تینا حالیت نا بدلی ٹی ہچو عمل اس نیام تمپک۔ بندغ نا ہر بدحالی نا زمہ وار اونا بخت ءِ گوندنگک۔ دا بست و بند بندغ ءِ Biophilic زند آن مابت کننگ نا جاہ Necrophilic مرگ تون مابت کننگ نا کسر آ روان کیک۔ غلام تینتو مروکا تادی و بیدادی تے تینا نصیب سرپند مریسہ تینا مرگ ئنا چاری مریک دا نظام بندغ آتے مشین تے ٹی بدل کیک۔ دا نظام نا مَٹ Probelem Based Education ءِ۔ ہرا محکوم راج آتا نظام تعلیم ءِ۔ ہراٹی تینتو مروکا استحصال ءِ اسہ ویل ئسے نا وڑ ئٹ مونا ہتنگک۔ ہراٹی بندغ تینا حالیت نا آزموندہ ءِ کیک۔ استاد و خوانندہ نا فرخ آن بیدس شعوری حکمت عملی نا رد ئٹ تعلیم نا اسہ اندُنو بست وبند اس جوڑ کننگ کہ ہراٹی استاد و خوانندہ ہڑتوماک اسٹ ایلو آن ہیل کیرہ۔ داٹی معلومداری نا ہلࣿ و تس نا جاگہ غا نغد کاری و شعوری دانائی نا کمک ئٹ علم دوئی کننگک۔ سوج کننگ نغدکاری شعور ءِ زیبا کیک و بندغ ءِ دا بے بندغی آ ماحول آن خلاسی تننگ کیک۔ ہمو بے بندغی آ ماحول ہراٹی ظالم و مظلوم ہڑتوماک اڑینگوک ءُ مظلوم جُہد ئنا وسیلہ ئٹ تینے و ظالم ءِ دا بے بندغی آ عمل آن کشنگ کیک۔ ولے انت مظلوم ہرا ظالم نا ظُلم و زوراکی نا گواچی ءِ انت اود دا نغدکاری و شعوری حکمت عملی تون اوار تینا بندغ آتے تعلیم تنِنگ کیک؟ فرارے نا رد ئٹ اسہ غلام ئسے تینا اُلس ءِ شعوری تعلیم تننگ غلامی آن خلاسی کن المّی ءِ۔ غلام راج ءِ ہمو وسیلہ ءِ پٹوئی تمو ہراڑان او تینا راج ءِ شعوری و نغدکاری حکمت عملی نا رد ئٹ تعلیم تننگ کے۔
آجوئی انت ئسے؟ او دا نغدکاری و شعوری حکمت عملی نا وخت آ اسہ Phase ئسے۔ ہرانا رد ئٹ غلام آ راج تینا ریاست ءِ تینٹ چلِفک۔ شعوری حکمت عملی نا عمل داکان گُڈ ہم ہلروان مریک۔ شعوری حکمت عملی بندغ ءِ شعوری وڑ ئٹ آجو کیک۔ کالونیل ریاست ڈغار ءِ Colonised کننگ تون اوار اوار تینا استحصال آن غلام راج ئنا ملی ءِ ام colonised کیک۔ زمینی قوضہ ءِ یلہ کرفنگ آن زیات ڈوکھیا زہنی Decolonisation ءِ نوآبادیات محکوم نا نفسیات آ چٹی مریسہ اودے زہنی غلام جوڑ کیک۔ محکوم آجوئی نا جُہد ئٹ ساڑی مننگ آن پد ہم ظلم ءِ Idealise کیک۔ و خواجہ نا بر خلاف جنگ کننگ تون اوار اوار اونا اُست پسند مریک، گر اودے تینا خواجہ نا مقابل ئٹ چُنکو طاغت اس رسینگے تو او خواجہ غان زیات ظالم اس جوڑ مریک۔ ہرانا پارہ غا البرٹ کامیو و جارج اوریل ہم اشارہ کرینو دا ذہینت تون اوار جوڑ مروکا پوسکُنا حکومت پوسکُنو خواجہ جوڑ کننگ کیک و لس اُلس پدا محکوم جوڑ کننگک۔ شعوری حکمت عملی بندغ ءِ آجو کیک و آزادی نا جُنز ئٹی اسہ Pseudo participant نا جاہ آجوئی نا اسہ راست ءُ سپاہی اس جوڑ مریک آجوئی بندغ نا جہان تون اوار مابت نا پن ءِ۔ گر ملی تے آجو کننگپ زمینی آجوئی بے معنی سلیک۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔