نیشنل ڈیموکریٹک موومنٹ نا جنرل سیکرٹری مزمل شاہ تینا بیان ئٹی ضلع کوئٹہ نا وادی ہنہ ٹی السی ملکیت نا ڈغار، دیر و شاری تا سیل و چکر نا ہند آ تیا ایف سی نا کوزہ ءِ ملکی رہبند آن چپ و بیدس قانودی گام اس پارینے۔
این ڈی ایم دا عمل نا مذمت ءِ کریسہ ہندی مخلوق نا برانز آتا مُخ تفی ءِ کرینے۔ اوفتا پاننگ ءِ کہ الس ئنا حقی آ خواست آتیا زوت عمل کننگ مرے۔
اوفتا پاننگ ءِ کہ دا ملک ئٹی اولی دے آن پشتون و ایلو محکوم قوم آتا دیر ئی، معدنی وسائل، جنگل آ تیا پنجاب نا استعماری و آمرانہ طاغت آک قوضہ کریسہ محکوم قوم آتے سیاسی، جمہوری، قومی و ثقافتی حق و اختیار آ تیان پد بٹینو۔ زوراکی و طاغت نا وڑ ئٹ دا استعماری کوزہ و استحصال ءِ چٹی کرینو ولے 2014 آن بلوچستان ئٹی دا آمرانہ طاغت آک ننا الس ئنا مڈی آ ہم کوزہ کننگ نا چرجوئی ءِ بناء کرینو۔
اوفتا پاننگ ئس کہ دا نا بناء ضلع ہرنائی ٹی الس ئنا ملکیت کوئلہ نا ذخائر و مائنز آ تیا کوزہ کننگ و اندا دور ئٹی دکی، شاہرگ، ہرنائی، سورینج تا ڈیگاری و مچھ تون اوار بلوچستان ئٹ ٹی کوئلہ نا غٹ ذخائر آ تیا قوضہ کریسہ سالانہ ارب آ روپئی طاغے نا زور آ ہلکر ہرا ایلو ہم جتا وڑ و ڈول ئٹ ہلنگ ئٹی ءُ۔
اوفتا پاننگ ئس کہ اوکان پد السی ڈغار، مش، دیری آ ذخیرہ، پبلک پراپرٹی، جنگل، سیل و چکر با ہند آ تے کوزہ کننگ نا اسہ بے کھٹوکو لڑ اس بناء کننگا و برجاء دے تیٹ ہنہ آن شعبان زرغون غر نا مسی آ لڑ ئٹی السی ڈغار، دیر، سیل و چکر نا ہند آ تیا قوضہ کننگانے ہرا نا برخلاف الس ئنا جمہوری مزاحمت برجاء ءِ۔
بیان ئٹی ودیک پاننگا کہ ایف سی نا ذریعہ ئٹ دا بے قانودی و ملکی رہبند آن چپ قوضہ آ تیا مسکوہی و ساڑی حکومت آک تینا رہبندی زمہ واری و السی مینڈیٹ آن نمن مریسہ صلہ و مصلحت نا گواچی مسر و السی ملکیت و حق آتا رکھ ئنا جاگہ غا ذاتی مفاد آتے اولیت تسر ہرا نا سوب ان صوبہ و جاندمی پشتونخوا نا الس آ ڈکھائی حالیت چٹی ءِ و جتا علاقہ آ تیٹی سیاسی پارٹی تا جاگہ غا الس تینٹ جمہوری مزاحمت بناء کرینے۔
الس ئنا خواست آتا زوت ایسری ءِ المی پاریسہ اوفتا پاننگ ئس کہ ساڑی حالت آتا خواست اندادے کہ جمہوری سیاسی پارٹیک ودیک مصلحت و صلہ آتا طرز عمل و روایتی طرز سیاست ءِ الیسہ الس ئنا رہبندی، جمہوری و بندغی حق آتیکن اوڑدئی ئٹ جمہوری مزاحمتی تحریک اس بناء کیر۔