بلوچستان نا صوبائی وزیر تعمیرات و مواصلات سردار عبدالرحمن کیتھران نا ذاتی جیل ئٹ قیذ اوکان گڈ خون مروک لُمہ و مار تا جوْنآتون اوار ہندی بندغ آک کوئٹہ آ سر مسر۔
مری قبیلہ نا بھلو کچ اس بارکھان آن خننگوک زالبول و چنا تا جوْن تے بارکھان آن دریسہ کوئٹہ ءِ سر مس، خاہوت صوبائی وزیرسردار عبدالرحمن کیتھران نا برخلاف سروزیر سیکرٹریٹ نا مونا جون تے تخیسہ تولوک برانز کرینے۔ خون مروک آتا گڈیکو نماز ءِ ائیدجاہ گراؤنڈ کوہلو ئٹ خواننگ آن گڈ جوْن تے کوئٹہ غا ہتنگا۔
برانزیک صوبائی وزیر نا کشنگ و دزگیری اسکان تولوک برانز ءِ برجاء تخنگ نا پڑو کرینو اندن برانزی تیٹ سیاسی و چاگڑدی گل آتاباسک آک ہم اوار ءُ۔
درو بارکھان نا علاقہ حاجی کوٹ آن مُسہ جوْن خننگاسر ہراڑے ہر مُسہ جوْن ئنا چاہنداری کوہلو نا ہندی خان محمد نا زائیفہ گراناز،اونا اِرا مار محمد نواز و عبدالقادر نا پن ئٹ مسوسس۔ پن کروک بندغ آک صوبائی وزیر سردار عبدالرحمن کیتھران نا نجی جیل ئٹ تینا5 سیال آتون اوار قیذ ئسر۔
تدینی نا بابت خان محمد نا پاننگ ئس کہ 2019 ئٹ صوبائی وزیر سردار عبدالرحمن کیتھران نا پاننگ آ کنا اُرا نا ہشت بندغ ہرافتیٹکنا زائیفہ گراناز، مسڑ، فرزانہ، مارک عبدالستار، عںدالغفار، محمد عمران، محمد نواز، عبدالمجید و عبدالقادر ءِ برمتہ کریسہ حاجیگوٹھ بارکھان ئٹ تینا نجی جیل ئٹ قیذ کننگا۔ ای ساہ ئنا خُلیس آن تینے ڈھکانُٹ، دون آن رسینگوک جوْنک کنا زائیفہ و مارتا ءُ،دائسکان ہم کنا 4 مار و اسہ مسڑ اس عبدالرحمن کیتھران نا قیذ ئٹی ءُ۔
استو ہندی پولیس ءِ خان محمد مری نا زائیفہ و اِرا مار ئنا جشوک جونک اسہ دون ئسے آن رسینگاسر ہراڑان گڈ خان محمد مری جوْنتا چاہنداری ءِ صوبائی وزیر نا قیذ ئٹ ساڑی اونا زائیفہ و اِرا مار ئنا وڑ ئٹ کریسس۔
ایلو پارہ غا جوْن تا خننگ آن گڈ چاگڑدی میڈیا غا بھاز غم و سوختئی نا درشانی کننگک چاگڑدی میڈیا ایکٹوسٹس آک صوبائی وزیر نادزگیری نا خواست کننگ ءُ۔
تدینی نا بابت اینو صوبائی اسمبلی ٹی ہم شرہ کننگاسس صوبائی وزیر نصیب اللہ مری اسمبلی کاروائی تیان بائیکاٹ کرے اندن ثناءبلوچ تدینی ٹی اوار مروک بندغ آتے انصاف نا چر ئٹ ہتنگ نا خواست کرے۔
داڑے بارکھان تدینی آ پٹ و پول کن محکمہ داخلہ بلوچستان چیئرمین ڈی آئی جی لورالائی ڈویژن، ایس ایس پی انویسٹی گیشن کوئٹہ،اسپیشل برانچ بارکھان نا نمائندہ تا سروکی ٹی جے آئی ٹی ٹہیفسہ تدینی نا بابت 30 دے ئٹی رپورٹ مونا ہتنگ نا حکم تسونے۔
ایلو پارہ غا سردار عبدالرحمن کیتھران 3 بندغ نا خون و نجی جیل ئنا دوبہ آن نمن کرینے۔ میڈیا تون ہیت کریسہ اونا پاننگ ئس کہنجی جیل و بندغ تا خون ئنا دوبہ اونا پِن ءِ نسخان تننگ نا چم ئسے۔
عبدالرحمن کیتھران پارے کہ کنا اُرا ءِ تدوکا حکومت ئٹی پٹنگانے، جیل مسکہ گڑا سماء تماکہ، داسا ہم ہم اگہ کس اس شکبر ارے گڑاکنا اُرا غا بریسہ اُرنگ کیک، دا ہم پارے کہ اودے علاقائی سیاست نا حق آن نیست کننگ کن دا کوشست کننگک، بھاز آ بندغ آک علاقہنا امن ءِ خراب کننگ کن کنا برخلاف چم کننگ ءُ، ملامت کروک چم ئنا برخلاف عدالت آ ہنوٹ۔