دے کہی بلوچستان نا بنجائی شار زاہدان و خاش ئٹی اینو جمعہ نا دے لس مخلوق بھلو کچ اسیٹ کسر تیا پیش تمیسہ ایرانی فورسز وحکومت نا برخلاف نعرہ خلکر۔
گیشتر حوال تا رد ئٹ زاہدان ٹی جمعہ نماز آن گڈ زاہدان نا پنی آ مکی مسجد نا داپار ایپار آن ایرانی فورسز نا برخلاف لس مخلوق مچمریسہ کسر تیا برانز کریسہ بلوچ نا زنک ءِ ایسر کننگ نا برخلاف نعرہ خلکر۔
اندن ایلو پارہ غان خاش آن رسینگوک حوال تا رد ئٹ ایرانی سیکیورٹی فورسز نا کارندہ آک بھلا کسر تیا برجاء گشت کریسہ کریر۔
برانز کروک آک برانز ٹی دزگیر کروک سیاسی باسک آتا زیا دروغ ئٹ خلوک تومت آتا بر خلاف و یلہ کننگ نا خواست کرینو اندن برانزکروک آک مولوی عبدالغفار نقشبندی و مولانا گورگیج تون اوار مولوی فضل الرحمن کوھی نا یلہ کننگ نا خواست کریسہ سی ستمبر ناذمہ وار آتے سزا تننگ نا خواست کرینو۔
راجی حوالکاری میڈیا نا ویب سائٹ ٹوئیٹر ٹی دے کہی بلوچستان آن تعلق تخوک سوشل میڈیا ایکٹوٹس اس زاہدان مکی مسجد نا داپارایپار آن ایرانی سیکیورٹی فورسز نا برانز کروک آتا سم کاری نا حوال و وڈیو تے شنک کرینے داسکان دا سم کاری آن جانی نسخان ناحوال رسینگتنے۔