دی بلوچستان پوسٹ نیوز ڈیسک ءِ رسینگوک حوال تا رد ئٹ تدوکا دے ایران تون کوالخواہی ئٹ بلوچستان نا علاقہ خاش، اسماعیل آباد ٹی سیاسی راہشون تا آجو کننگ کن دپ درشانی کننگا۔
دا وخت آ دو تیٹ پلے کارڈز ارفیسہ زالبول و چناک سیاسی باسک آتا آجو کننگ کن خواست کریسہ نعرہ خلکر۔ خاش نا کسر تیا گشت کریسہ زالبول آک خواست کریر کہ سیاسی بندی تے دمدستی وڑ ئٹ آجو کیر و برانز کروک آتے برانز نا پد ئٹ دزگیر کننگ ءِ بند کیر۔
بلوچ زالبول آک پاریر کہ سیاسی باسک آتے دزگیر کریسہ بے دادی نا گواچی کننگ ءُ و دا ہچ وڑ قبول کروک ءُ عمل اس اف۔
یاتی مرے کہ ایران نا ایلو علاقہ آتا وڑ بلوچ ہندی علاقہ آتیٹ ہم برانز کروک آتا طاغت نشان تننگ و دزگیری تیا جہانی بندغی حق آتا ادارہ بھیم نا درشانی کرینے، ایران تون ہمگرنچ بلوچستان ٹی مروک برانز آتیٹ داسکان دزگیری، ٹپی و مرگ ئنا گواچی مروک بندغ آتا کچ صد آتے سر مسونے۔