پنچ شمبے نا دے بلوچستان نا ضلع ہرنائی ئٹ مروک بم تراک اسیٹ اسہ بندغ اس مرگ ئنا گواچی و مسٹ ٹپی مسر۔ تراک ہمو وخت مس ہراتم دا بندغاک ٹیکٹر ٹینکی اسیٹ پاکستانی لشکر نا پوسٹ ئنا پارہ غا دیر دننگ ئسر۔
کہوک آتیٹ پشین آن تعلقدار ٹیکٹر ڈریور محمد سلیم و ٹپی تیٹ عبدالباری و نصیب اللہ اوار ءُ۔
دا جلہو نا ذمہ واری ءِ بلوچ سلہہ بند تنظیم بلوچ لبریشن آرمی ارفے۔ ترجمان جیئند بلوچ شینک کروک بیان اٹ پارے کہ ٹیکٹر ٹینکر ءِ ہموتم ٹِک کننگا ہراتم او پاکستانی لشکر نا پوسٹ اکن دیر دننگ ئس۔
او مُستی پارے کہ داکان مالو و گڈیکو وار 26 فروری آ نن علاقائی مخلوق ءِ پنت تسون کہ اوفک پاکستانی لشکر ءِ ہچ ڈول ئنا کمک اس کپس نہ تو تینا جانی و مالی نسخان نا تینٹ ذمہ وار مرور۔
ایلو پارہ غان پنجگور نا علاقہ پروم ئٹ سلہہ بند جلہو نا ذمہ واری ءِ بلوچستان لبریشن فرنٹ ارفینے۔ بی ایل ایف نا ترجمان میجر گہرام بلوچ شینک کروک بیان اٹ پارینے کہ ڈھکوک حوال نا رِدئٹ بی ایل ایف نا سرمچار آک کاروائی کریسہ استو پروم نا علاقہ بسد ئٹ گورہ گیر ریاست نا کمکار و ڈیتھ اسکواڈ نا بھلا فقیروک آ سنگر ہلوک جلہو کریر۔
او پارے کہ پِن کروک ریاستی کارندہ چار گاڑی نا قافلہ تون ئس کہ سرمچار آک بھلا سلہہ تیٹ اوفتیا جلہو کریر۔ دا جلہو ئٹ فقیروک تینا مُسہ کارندہ تون اوار مرگ ئنا گواچی مس و منہ کراندہ ٹپی حالیت اٹ نرگ ئٹ سرسہب مسر۔