کتاب: سیاسی کلچر اور قبائلی نظام
نوشتوک: پروفیسر عزیز محمد بُگٹی
شینکار: فکشن ہاؤس لاہور
شینک: 2017
چمشانک: اکبر بلوچ
دی بلوچستان پوسٹ
ہرا وخت آ کہ انسان جہان ٹی شعوری زند ءِ گدریفنگ نا بِنا ءِ کرے تو گڑاس چاگڑدی اصول و ضوابط بکار ئسر کہ ہرافتا رِدئٹ چاگڑدی زند ءِ جوان وڑ ئٹ گدریفنگ نا بابت اولیکو شعوری کوشست دا ئس کہ برام، چُنا، خاہوت و قبیلہ جوڑ کننگ، دا کُل ارتقائی سفر نا کنڈا جتا تلہ غاک ئسر ہرا کہ ایسر ئٹ حکومت و ریاست نا دروشم ءِ دوئی کریر۔ اندن ارتقاء نا دا سفر اینو اسکان برجاء ءِ۔
اندا بابت ئٹ بھازا دیہاڑ نوشتوک و محققین آتا خیال ءِ کہ بندغ نا اولیکو سیاسی تنظیم ہم خاہوت ءِ انتئے کہ خاہوت نا وجود ئٹی بننگ آن پد چاگڑدی قواعد و ضوابط آتا خواست تما و ہمو قانود آتے خاہوت نا زی آ نافذ کننگ کہ اسہ ادارہ یا حکمران ئسے نا خواست ئس و اندا کُل ءِ ذمہ واری تے خاہوت نا بھلا ہرفے و دا وڑ ئٹ بنائی دور نا قانود جوڑ كروکا و اوفتے نافذ کروک انگا و حکومت نا بناء و ریاست نا بنماس ہم خاہوت ءِ خیال کیرہ۔
اندن بلوچ ہم ارتقاء نا سفر ءِ کریسٹ خاہوت آن ہلیس کہ قبیلہ نا دروشم ءِ دوئی کرے۔ اگہ نن بلوچستان و بلوچ قبائل آتا تاریخ ءِ خوانن گڑا اوفتا تدوک وخت آن ہلیس کہ ساڑی وخت اسکان دیہاڑ نا سفر بھاز چس کروک و گین مسونے انتئے کہ بلوچستان ہم تو جہان نا نظر ئٹی بھاز چس کروک و گچین ءُ ڈیہہ اس مسونے و ارے۔ اندا سوب آن بلوچ جتا دور آتے ٹی جتا ظُلم و زوراکی تے سگانے و دا ہیت ئٹی ہم ہچو شک اس اف کہ ظالم و جابر آتا خلاف مزاحمت ہم کرینے و اینو نا دے اسکان کننگ ءِ۔
نوشتوک لکھیک کہ بلوچی بولی نا پنی آ متکنا شئر ئنا رِدئٹ بلوچ راج ئنا چِل و چار قبیلہ غا تالان گروہ اس میر جلال خان نا راہشونی ٹی مُلک شام آن ہجرت کریسٹ بامپور و سیستان ئٹ سر ہلیسٹ ساڑی بلوچستان نا علاقہ مکران ئٹی بس۔ و دا ہجرت نا سوب حضرت امام حسین ءِ کمک کننگ ئس یزید نا خلاف۔
بھلو وخت اس مکران ئٹی ہندی مننگ آن پد ہرا وختا کہ اوفتا آباتی زیات مس و مکران نا زمین اوفتا ہڑدے ئی خواست آتے پورا کننگ کتو گُڑا اوفک میر شیہک نا راہشونی ٹی شمال مشرقی علاقہ تیکن مون کریر، شئر ئنا رِدئٹ 44 قبائل ئسر ولے او قبائل آتے ٹی اِرا قبیلہ بھلو ئسر ہرافتیتو ایلو قبائل آک تفوک ئسر۔ اسٹ رند قبیلہ ئس و ایلو لاشار (لاشاری)۔
مکران آن پیشتمنگ آن گڈ لاشاری قبیلہ درہ مولہ نا کسر ئٹ کچهی ٹی ہنا آبات مس، و رند آک درہ بولان نا کسر ئٹ مریسٹ سبی ٹی ہنار آبات مسر۔ اسہ اندنو وخت اسے ٹی بسر کہ ہراٹی ارغون آتا حکمرانی ئس خاص کر دا اِرا علاقہ تیٹی یعنی (کچی، و سبی،) آ ہندن ارغون آتا دوک اندن سخت ئسر دنکہ اینو پاکستانی حکومت نا آزات قبائلی علاقہ تیٹ دو خلوک ءِ۔ ارغون آتیان رکھوک مننگ کن یا اوفتے تو مونتس نا رد عمل ئٹی بلوچ آک ہم حاکمانہ حیثیت دوئی کریر و سبی ءِ تینا سیاسی بنجا جوڑ کریر۔
ولے وخت تون اوار اوار رِند آک دا محسوس کریر کہ ہنپ و بٹ نا وخت آ لاشاری تا زیات آبات و زمین تمانے و ننے آ کم، اندا باخرینی مدان مدان آ اسٹ ایلو آن مُری نا سوب جوڑ مس۔ پدا ہم میر شیہک نا زند ٹی سیوت مچے بھاز ئس ولے میر شیہک نا کزیت آن پد ہرا وخت آ کہ اونا مار میر چاکر خان بلوچ آتا کماش جوڑ کننگا تو اوکان پد لاشاری تا بھلا میر گوہرام تو اونا تعلقداریک جوان متوس و چنکا بھلا ہیت آتیان ایسر اسہ ہندونو بھیم بش کروک خانہ جنگی اس بناء مس ہرا سی 30 سال اسکان چکا۔
اسٹ ایلو آن بیر ہلنگ نا خاخر ٹی ہڑتوما قبیلہ غاک نزور مسر و ایسر میر چاکر و میر گوہرام بلوچستان ءِ ہلار پنجاب و سندھ آ ہمپیر ولے ایلو ہزار آ بلوچ آک رہینگار سبی و کچی ٹی ہمر کہ مکران آن کوچ کننگ نا وخت آ ہم گڑاس قبائل ہموڑے رہینگار۔ اگہ اینو بلوچستان تینا پنی آ تشخص ءِ برجاء تخانے گڑا اندا رہینگوکا بلوچ آتا سوب آن نا کہ چاکر و گوہرام نا سوب آن۔ دا وڑ ئٹ بلوچ نا راجی طاقت و حاکمیت ایسر مس چاکر و گوہرام نا خانہ جنگی و سندھ و پنجاب آ لڈ و ہنپ آن پد۔ رہینگوک قبائل آک بزگی نا بُنیاد آ تینکن اسہ سربراہ اس جوڑ کریر ہرا دے سردار نا پن تسر۔
راجی طاقت و حاکمیت بلوچ آن پد نا ہمو وخت آ بحال مس ہراتم کہ احمد زئی خاندان نا بھلا میر احمد خان قلات ئٹی حکومت نا بُنیاد ءِ تخا ہندا وڑ ئٹ کچی و سبی آن پد قلات بلوچ حاکمیت نا علامت و مرکز جوڑ مس۔ و بلوچستان دا حیثیت ءِ ایران نا شاہ نادر شاہ و افغانستان نا شاہ احمد درانی قبول کیرہ۔
وخت اک ہنیسہ کریر اسہ ہندنو دور اس بس کہ انگریز نا اسہ ایسٹ انڈیا کمپنی نا پن ئٹ تجارت کننگ نا غرض ئٹ ہندوستان آ بس و ہرا وختا کہ ہندوستان نا زوال پذیر انگا سیاسی صوت حال ءِ خنا تو اوڑان سواد ارفیسہ تجارت کننگ نا باوجود حاکمیت نا حیثیت ءِ اختیار کرے و اندن کُل ءِ علاقہ تا قبضہ کریسٹ کرے۔
ہرا وخت آ کہ افغانستان آ ہننگ کہ بلوچستان نا سر زمین ءِ کاریم ئٹ ہتنگ بناء مس تو بلوچ مزاحمت کرے و اودے پارے کہ ننا ڈغار دنو ڈغار اس اف کہ نی تینا ناپاک آ عزائم آتے کہ کاریم ئٹ ات۔
ایسر انگریز بلوچ نا مزاحمت آن بیزار مس و خان آف قلات، خان مہراب خان ءِ جنرل ولشائر تینا فوجی دستہ سے تون وار بس پارے کہ نم انگریز حکومت نا مون ٹی سلہہ بٹبو ولے خان آف قلات خان محراب خان اسہ اندونو ورندی اس تس تا ہرا کہ بلوچستان نا دیہاڑ ئٹی گچین ءُ باب ئسے۔ خان پارے کہ دا ہیت ئٹی ہچو شک اس اف کہ انگریز دا وخت آ طاقتو ءِ ولے دا ننا ڈغار ننا باوہ پیرہی ننا ڈغارے۔ ہراڑا نن صدی تیان حکمرانی کریسٹ بسونن، گُڑا داسا نن امر دا سر زمین ءِ ہلین، و خُدا گواہ ءِ کہ نن بلوچ آک اینو اسکان ہچو ہم طاقت ئسے نا مون آ سلہہ بٹتنون۔
بہر حال 13 نومبر 1839 ٹی انگریز قلات آ جلہو کیک و خان محراب ءِ شہید کیک، و تینا مرضی آ شہنواز خان ءِ پوسکنا خان جوڑ کیک گدی آ تولیفک۔ داسا نن مچ ءِ غور کین سردار نا کڑد ہمو سردار ہرادے اول ٹی قبائل آک بزرگی نا بُنیاد آ تینا راجی بقاء و رکھ اکن جوڑ کریسر، ہمو قبائلی سردار داسا انگریز نا آلہ کار جوڑ مننگ ئس۔ دُن پا کہ “وطن بلوچ نا ئس راج انگریز نا، حکم سردار نا و پِن خان ئنا” ولے واہم انگریز نا آلہ کار آتیان بیدس بلوچ آک انگریز نا ہتوکا خان ءِ تسلیم کتوس و خان محراب خان نا مار میر نصیر خان نا راہشونی ٹی انگریز تو جنگ کریسٹ اِرا سال آن پد شہنواز خان ءِ قید كریر و پوسکنا خان میر نصیر خان ءِ کریر۔ خیر انگریز ہم نصیر خان نا خانی ءِ تسلیم کرے جتا معاہدہ آتا ذریعت ئٹ۔
بگٹی صاحبِ لکھیک کہ خان خدا داد خان نا دو ٹی انگریز مُچا تینا نتے جاگہ تس، بلوچستان ئٹی و جتا معاہدہ غاتا ردئٹ بلوچستان نا علاقہ غاتے کپ کیک۔ و اوفتا حکمرانی کیک۔ دُن کہ بلوچستان نا اسہ بشخ ءِ برٹش بلوچستان نا پِن تیک و ایلو ءِ ریاستی بلوچستان۔ ایلو گنڈمک معاہده نا ذریعت ئٹ بلوچستان نا گڑاس علاقہ غاتے افغانستان ئٹی شاغیک و افغانستان نا گڑاس علاقہ آتے بلوچستان ئٹی۔ خیر دا انگریز نا دو ءِ ہم بلوچستان برداشت کیک تینہ سینہ غا۔ مُچا ہندوستان آزات مریک ولے بلوچستان ہمو اسٹ انگا بد نصیب ءِ ہرا اینو اسکان ہم غلامی نا زنجیر اٹی بند ءِ۔
بُگٹی صاحبِ لکھیک کہ پاکستان نا وجود ئٹی بننگ آن پد پاکستان نا دیہاڑ ئٹی ریاستی و حکومتی جبر و تشدد نا اولیکو نشان بلوچستان و بلوچ مس، دُنکہ 1948 ٹی پاکستان تو جبراً الحاق نا دروشم ئٹ بلوچستان ہر ڈول نا زوراکی سگا۔ ایلو 1958 ٹی خان آف قلات ءِ دزگیر کننگ و مارشل لاء خلنگ نا دروشم ئٹی ظُلم و زوراکی سگا، ہمرکہ 1964 و 1973 آن ہلیس اینو نا دے اسکان وڑ وڑ ئنا ظُلم و زوراکی کننگ ءِ بلوچستان و بلوچ نا زی آ۔
دا ظُلم و زوراکی نا رد عمل ئٹ بش مروکا ہر توار ءِ ہر سیاسی راہشون ءِ بندی کرے ہمر کہ 1973 ٹی نیپ ئنا حکومت ءِ ایسر کننگ و اونا قیادت ءِ جیل کننگ، اندن دا حالیت آن سواد ارفیسہ سردار ہراکہ بنائی دور ئٹی قبائلی سردار ئس داسا او انگریز آن پد پاکستان نا آلہ کار جوڑ مننگ آن پد اسہ وخت آ قبائلی و سیاسی سردار جوڑ مس، و اولیکو دے آن ریاست تون اوار بلوچ نا استحصال ءِ ہر وڑ ئٹ کریسٹ ءُ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔