بلوچستان ٹی خودکشی نا تدینیک سلینگ نا پن ءِ ہلپسہ، حوال تا ردئٹ پین ارا مسڑ تون اوار مسہ بندغ خودکشی کریر ۔
خودکشی نا تدینیک صنعتی شار حب چوکی، دکی و خضدار ٹی مسونو ۔
حب چوکی ٹی پولیس کارندہ آتا ردئٹ پنچ شمبے نا نن انڈسٹریل ایریا ٹی تدینی بسکونی پنی فیکٹری ٹی جوڑ کروک اسہ پرائیوٹسیکورٹی کمپنی نا سیکورٹی گارڈ ہرانا چاہنداری احمد خان مگسی ولد بہادر خان نا پن آن مسونے، تینا توفک آن خود کشی کرے ۔
ایڑے دکی آن حوال آکو کہ یارو شار نا علاقہ ٹی ورنا ءُ مسڑ ئس سم کاری کریسہ خود کشی کرے۔ ہرانا چاہنداری بی بی صدیقہ دختروزیر خان سکنہ یارو شار نا پن آن مسونے ۔
داکان مالو خضدار نا علاقہ زہری آن ہم حوال آک دوئی کننگاسر کہ اسہ مسڑ ئس خود کشی کریسہ تینا زند ءِ ایسر کرینے ۔
یاتی مرے کہ بلوچستان ٹی خود کشی نا تدینیک ترندی ئٹ مونا بننگ ءُ ۔ تدوکا سال بلوچستان نا جتاء علاقہ آتیان خود کشی نا تدینیکرپورٹ مسونو ، ہرافتا کچ ئٹ دے پہ دے ئنا بنیات آ زیاتی مننگ ءِ ۔
واہم حالیہ رپورٹ مروک ہر مسہ تدینی تا سوب آک دائسکان معلوم متنو ۔