جیکب آبا نا تحصیل ٹھل ٹی غیرت نا پن ئٹ زالبول ئس کسفنگا۔
پولیس نا رِد ئٹ جیکب آباد نا ہندی شوکت مرہٹو تینا زائیفہ ءِ سیاہ کاری نا دوبہ ئٹ سم کاری کریسہ کسفے و نرا، حوال رسینگ تون پولیس جاگہ غا سر مس و جون ءِ دوئی کریسہ پوسٹ مارٹم کن ٹھل اسپتال آ درے ہراڑے المی کاروائی آن گڈ جون خاہوت نا دو ٹی تننگا۔
پولیس نا رِد ئٹ ڈوہدار نا برخلاف قانودی کاروائی برجاء ءِ۔
یاتی مرے تدوکا دے تیٹ بلوچستان نا ضلع مستونگ ٹی نادرست بندغ آک ارِغ زائیفہ ءِ دوستی نا برام آ کسفیسر اندن اِرا دے مست ڈیرہ اللہ یار ئٹ ارِغ سم کاری کریسہ زائیفہ تون اوار اِرا بندغ ءِ کسفیسس۔
اسہ پین تدینی ئسے ٹی برجاء سال نا بناء ٹی نصیر آباد تمبو ٹی اسہ بندغ ئس غیرت نا پن ئٹ تینا خڑک سیال ئسے تون اوار اسہ بندغ ئسے کسفے اندن مسہ دے مست حب ئٹ سندھ نا ہندی ئس سم کاری کریسہ تینا مست ئنا زائیفہ ءِ کسفے۔
یاتی مرے بلوچستان و سندھ ئنا جتا علاقہ تیٹ غیرت نا پن ئٹ کسفنگ نا تدینیک کچ ئٹ رپورٹ مریسہ کرینو اندن دا تدینی تیٹ کہوک آتیٹ زالبول آک اسہ بھلو کچ ئسیٹی اوار ءُ اندن دا تدینی تیٹ اوار بندغ آتے بھاز کم کچ ئٹ قانون نافذ کروکا ادارہ غاک انصاف کن ہتنگ کرینو۔
اعداد شمار نا رد ئٹ پاکستان ئٹ غیرت نا پن ئٹ سال ئٹ ہزار آن بھاز زالبول کسفنگرہ۔ و بلوچستان نا ضلع نصیر آباد و سندھ ئٹ منہ خلقی و علاقہ کل آتیان زیات سرفہرست ءُ۔