بلوچستان ضلع کیچ ئنا جاگہی علی محمد نا پاننگ ءِ کہ تدوکا سال جون ئٹی اونا کم سن مار ءِ سادہ پُچ بینوک کارندہ آک دزگیر کریسہ بے ڈس ءُ جاگہ سے آ درینو ہرا نا بابت ئٹ سال ئسے آن ہچ خیر و خبر رسینگتنے۔
ضلع کیچ نا علاقہ گور کوپ جمک نا جاگہی علی محمد نا پاننگ ءِ کہ او تینا مار ئنا آجوئی کن ہر درگہ ءِ ٹکیفینے ولے ہر جاگہ غان بے اومیتی آن بیدس ہچ اس ہم دو بتنے۔
اونا پاننگ ءِ کہ کنا سینزدہ سالی مار خوانندہ سے ہرادے تدوکا سال جون ئنا 26 تاریخ آ تربت نا علاقہ زیارت سر آن دزگیر کننگاسس ہراکان گڈ پولیس تھانہ ٹی ایف آئی آر ہم کرین، ہر وڑ ئنا کوشست کرین ولے ہچ جاگہ سے آن اونا خیر و خبر رسینگتو۔
یاتی مرے کہ تدوکا سال ضلع کیچ ئنا علاقہ زیارت سر آن پن کروک کم سن مار ئتون اوار اسہ یانزدہ سالی چُناس ہم دزگیر کننگاسس۔
ایلو نیمہ غان بلوچستان نا ہندی شش بندغ ءِ پاکستانی فورسز آک سندھ ئنا جتا جاگہ غا تیان دزگیر کریسہ بیگواہ کرینو۔
بیگواہ مروکا تا چاہنداری مٹھا ولد نصیر، حمید ولد موسیٰ، نوکاپ ولد درمحمد، وڈیرہ ولد درمحمد، اسماعیل ولد زرک و موریا ولد زرک نا پنا مسنے۔
پن کروک بندغ آتے سندھ ئنا علاقہ جیکب آباد و خیرپور آن دزگیر کریسہ نادرست ءُ جاگہ سے آ دننگانے۔
یاتی مرے کہ بلوچستان و ایلو علاقہ آ تیان زوراکی نا بیگواہی تا بے سلوکا لڑ برجاء ءِ۔ ایلو کنڈ آن دا وختا کراچی، کوئٹہ و تربت ئٹی بیگواہ غا بندغ آتا آجوئی کن برانز مننگ ئٹی ءِ۔