برجاء ہار و نوکاپ نا دیر تیان پد ہر نیمہ غا گند، کچرہ، ہیل٘ و پشہ آتا مُچ مننگ آن مخلوق سخت فریشانی تا گواچی ءِ۔ کسر و نالی تاصفائی مفننگ نا سوب آن کسر تیا نوکاپ نا دیر ئنا مش و کچرہ آک تموک ءُ۔ گند و کچرہ تیٹ دم ہلنگ ہم مفک۔
ہندی مخلوق نا رد ئٹ الرجی و دمہ نا ناجوڑ آک سخت فریشانی تون مون تننگ ءُ، سینے دمہ خن و گُٹ ئنا خرابی تیان بیدس الرجی ناناجوڑ آتیٹ ہم ودکی مننگ ءِ۔
حکومت و بست و بند نا کنڈ آن پر تا پوسکنا چرجوئی نا بابت ئٹ الرٹ شینک مسنے ولے شار ئنا نالی و کچرہ تا صفائی نا کاریمداسکان بناء متنے۔
انام بوستان روڈ سبزی منڈی نا خڑک کہی فٹ اسکان مش و کچرہ تا ڈھیر تموک ءِ ہرافتیان تنگ مریسہ دکان خواجہ آک پنچ شمبے نادے سخت برانز کریر تینا دکان و کاروبار تے برانز کریسہ بند کریر و کسر تیا ٹئیر ہُشیسہ ہِن و بر ءِ ہم بند کریر۔
دکان خواجہ آتا پاننگ ئس کہ 28 جولائی نا دے بروکا نوکاپ نا دیر آن پد مش و کچرہ مچ مسنے ہرافتے مُر کننگ کن ہچو کاریم مننگاف ہرا نا سوب آن ننے ہڑاند و فریشانی تون مون تروئی تمنگ ءِ۔
اوفتا پاننگ ءِ کہ دکان خواجہ آک ناجوڑ مننگ ءُ، داڑے دم ہلنگ ہم کبین ءِ۔ برانز کروکا پدان میونسپل کمیٹی نا چیف ئنا یقین تننگ آ تینابرانز ءِ ایسر کریر۔