مڈی
جاچ: کوہ یار بلوچ
دی بلوچستان پوسٹ
انقلابی جنز آتے ٹی اسہ گڑاسے نا بھاز بھلو گُرج اس مریک ہرادے نن “مَڈی” پانہ۔ مَڈی بیرہ سلہہ، توفک و بارود آک افس بلکن مَڈی اسہ نفسیاتی ءُ طاغت ئسے، ہرا دژمن ءِ گوڈ خلننگ آ بیوس کیک۔
تینا راج تینا جُنز ئنا ہر اسہ سرمچار ءِ مَڈی نا اہمیت طاغت و استعمال پہہ کننگ کن کماش بشیر زیب کتابچہ ”مَڈی” ءِ نوشتہ کرینے۔
کتابچہ ”مَڈی” مُسہ بشخ ئٹ نوشتہ ءِ اولیکو بشخ ئٹ کماش بشیر زیب مَڈی نا اہمیت ءِ نوشت کیک۔ کماش پائک مَڈی بیرہ سلہ توفک گولہ بارود نا پِن اف بلکن دا بلوچ راج ئنا اشتمائی امانت آک مریرہ۔ کماش پائک جنگ ئٹی ہر اسہ توفک اونا ہر اسہ سُم سرمچار آتا دتر تیان دوئی کروک مریر۔ اسہ سرمچار اس سوتڑوکا گوریچ، باسُن آ دے، بے تُغی و دمدری تیٹی دژمن تو جنگ تیک شہید مریک او تنظیم آن ہندا اُمیت تخک کے اونا قربانی تا رکھ کننگو۔
جنگ ئٹ مڈی تا رکھ و استعمال ہنداخس المی ءِ اخس کے دژمن ءِ نسخان تننگ۔
کماش مَڈی نا اہمیت ءِ مُستی اتنگ کہ بیرہ تینا خیال آتا درشانی ءِ کپک بلکن تیوہ جہان نا انقلابی جُنز آتا مثیل ءِ اوار کرسا پائک کہ چینی انقلابی جُنز ئنا رہشون ماؤزے تنگ تینا توفک و بارود آتے تینا سپاہی تیان با قیمتی تکاکہ۔ ویتنامی لشکر نا مثیل ءِ ترسا کماش پائک گوریلا جنگ ئٹی سرسہبی دا اف کہ دژمن آن اخہ سُم کاری مَس، بلکن سرسوبی دادے کہ اخہ مَچے سُم کاری ٹی دژمن ءِ اخہ بھلو نسخان ئس تننگا۔ افریقی انقلابی جُنز ئنا رہشون عبدالکریم الخطابی نا کُلہو ءِ ترسا پائک کہ ہرا سرمچار تینا مَڈی تا رکھنگ ءِ سرپد مَس او تینا شہید آتا قربانی تے ہم زوت سرپد مریک۔ پنی آ جہدکار ارسٹوچی گویرا نا مثیل ءِ ترسا پائک توفک اسہ سرمچار ئسے نا جون ئنا بشخ ئسے آن بار ءِ اخس کے تینا جون ئنا رکھنگ المی ءِ اسہ سرمچار ئسے کہ ہموخس توفک نا رکھنگ المی مریک۔
اِرٹمیکو بشخ ئٹ کماش نوشتہ کرسا پائک کہ جنگ ئٹ بے پرواہ مننگ دژمن ءِ نسخان تننگ آن زیات مَڈی خڑچ کننگ راج اتو و شہید آتا دتر تتو خیانت کننگ نا بریبر ءِ۔ ئنا بشخ ئٹ کماش نوشتہ کیک مَڈی تے دوئی کننگ، رکھنگ، مُچ کننگ و خرابانگا مڈی تے جوڑ کننگ، اوفتا احوال ءِ تننگ تنظیم نا باسک آتا زمہ واری مریک۔
مُسٹمیکو بشخ ئٹ کماش مَڈی نا نفسیات نا بابت نوشت کرسا پائک کہ مَچہ مَڈی نا کمک ئٹ دژمن ءِ زیات نسخان تننگ دژمن ءِ نفسیاتی نا جوڑ کیک، ہرا وخت آ سرمچار آک دژمن نا ہمو ہندا ام جُلہو کیرہ ہراڑے او تینے رکھوک تکک گُڑا ئنا سوب آن دژمن بے حوصلہ مریک۔ دژمن ہر وخت بھیم ئنا گواچی مریک ہِچ سرپد مفک کہ آرا وخت ہراکان جُلہو مریک، کماش نوشتہ کیک ہرا وخت سرمچار آک دُژمن نا جند ئنا توفک ءِ ہلیرہ ہمو توفک ئٹ دژمن ءِ خلیرہ ہندا عمل آن دژمن ہبکہ مریک و گوڈ خلننگ آ بیوس مریک۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔