بلوچ یکجہتی کمیٹی نا رد ئٹ گوادر نا ڈپٹی کمشنر ماہ رنگ بلوچ ءِ کال کرسا دڑکو تسنے کہ ای ماہ رنگ و بی وائی سی نا راہشون تے کھسفنگ نا حکم تسنٹ۔

بی وائی سی نا پاننگ ءِ کہ ڈپٹی کمشنر ماہ رنگ بلوچ ءِ دا ہم پارینے کہ کوالخواک بی وائی سی نا بنجائی سروک آتا برخلاف کریک ڈاؤن بناء کننگ آن مُست موبائل سروس بند مننگ نا ودار ءُ۔

خیال ئٹ مرے کہ گوادر ئٹی مُست آن انٹرنیٹ سروس بند کننگانے۔ دا وختا گوادر ئٹی کرفیو ءِ۔

ایلو کنڈ آن گوادر ئٹی پاکستانی لشکر نا سم کاری آن جانی نسخان و مخلوق نا ٹہی مننگ نا حوال ہم مونا بسنے۔

بلوچ یکجہتی کمیٹی دمدستی خواست ئس شنگ کرسا پارینے کہ تدوکا 48 ساعت آن تیوہ بلوچستان پاکستانی ریاست نا بربریت و زوراکی نا گواچی ءِ۔ بلوچ راجی مُچی ٹی اوار مننگ کن بروکا کاروان تے بلوچستان نا جتا علاقہ آتیٹ توننگانے۔ مستونگ، تلار و تربت ئٹی کاروان تیا مون پہ مون سم کاری کننگانے، بےدادی نا گواچی کننگانے، و آنسو گیس نا گولہ غا تیٹ ٹک کننگانے۔

او پارے کہ مستونگ ئٹی مون پہ مون سم کاری آن 11 بندغ بھاز ٹپی مسنو ہرافتیان اِرٹ نا حالیت بھاز خراب ءِ۔ تلار ئٹی ہم حالیت بیم تروک ءِ ہراڑے کیہی بندغ آتا ٹپی مننگ نا حوال رسینگانے واہم انٹرنیٹ بند مننگ نا سوب آن شابیتی حوال دو بتنے۔

ودیک پاننگا کہ بیرہ تدوکا 48 ساعت ئٹی تیوہ بلوچستان ئٹی کیہی بندغ آتے دزگیر کرسا بیگواہی نا گواچی کننگانے، و کیہی اُرا تیا چھاپہ خلنگانے، چُنا نیاڑی تے بیم تننگانے۔ گوادر و تربت نا ضلع غا تیٹ اِرا دے آن تیوہ بلیک آؤٹ و کرفیو خلنگانے۔ موبائل انٹرنیٹ و پی ٹی سی ایل انٹرنیٹ سروس اِرا دے آن بند ءِ، اینو موبائل نیٹ ورک ہم بند کننگانے۔

او پاریر کہ گوادر شار ءِ تیوہ گھیرہ کننگانے و کرفیو خلنگانے۔ گوادر و تربت ئٹ ہیلی کاپٹر آک پھیری کننگ ءُ۔

بی وی وائی سی نا پاننگ ءِ کہ نن بندغی حق آتا کُل تنظیم، صحافی و تیوہ جہان نا ڈیہہ تا پارلیمنٹ نا باسک آتیان خواست کینہ کہ او بلوچستان نا بیم تروک حالیت نا دمدستی نوٹس ءِ ہلیر و جہانی تلہ غا پاکستانی ریاست آن دا بربریت و زوراکی نا سوج کیر۔

تیوہ بلوچستان ئٹ بلوچ یکجہتی کمیٹی نا کنڈ آن اڈ تروک بلوچ راجی مچی ءِ کاؤنٹر کننگ کن پاکستانی فورسز آتا کنڈ آن تینا زور ئنا چکاسنگ برجاء ءِ۔

جتا علاقہ آتیان حوال رسینگانے کہ پاکستانی لشکر مُچی ٹی اوار مننگ کن ہنوکا تے توننگ کن کسر تے بند کرینے و کیہی علاقہ آتیان زوراکی نا بیگواہی تا حوال ہم مونا بسنے۔

پنی آ صحافی ونگ آتا رد ئٹ او ماہ رنگ بلوچ تون ہیت کرینو۔ ماہ رنگ بلوچ پارینے کہ “نن ہچو نہاد ئسے آ پدی مروفن۔ بلوچستان ءِ ملٹری زون ئس جوڑ کننگانے ہراڑے ہچو راہبندی و بندغی حق اف۔”

ماہ رنگ بلوچ ودیک پارینے کہ 200 آن زیات بلوچ باسک آک دزگیر کننگانو۔ او پارینے کہ “نن پرایمن اُن و ننا بلوچ راجی مچی منَہ ساعت ئٹی بناء مرو۔”

او پارینے کہ نن پرایمن مُچی کن حکومت تون تران کننگ اُن ولے حکومت ننا جمہوری خواست آتے بِننگ اف۔

او پارینے کہ کاؤنٹر ٹیررازم ڈیپارٹمنٹ (سی ٹی ڈی) ننا باسک آتے دزگیر کننگ ءِ۔

ماحولیاتی ایکٹویسٹ و بندغی حق آتا باسک گوادر ئٹ برجاء حالیت ءِ فریشان کروک ہیت ئس پارینے۔

ورنا ماحولیاتی ایکٹویسٹ و بندغی حق آتا باسک گریٹا تھنبر چاگڑدی حوالکاری میڈیا ویب سائٹ “ایکس” آ پوسٹ ئس کرسا پارے کہ بلوچ یکجہتی کمیٹی نا بلوچ راجی مچی نا برخلاف ریاستی کریک ڈاؤن فریشانی نا ہیت اسے۔

او پارے کہ پاکستانی حکومت و ادارہ غاک کسر تے بند کننگ ءُ و باسک آتا اُرا تیا چھاپہ خلنگ ءُ و بلوچ باسک آتے بیگواہ کننگ ءُ۔

او خواست کرے کہ پرایمن مُچی نا برخلاف ریاستی تاغت نا کارمرز بند کننگ مرے و دا ظلم ئنا برخلاف بلوچ آتا مزاحمت اوفتا بنداوی حق ءِ۔ ریاستی ادارہ غاک و حکومت دمدستی اوفتا دزگیر کروک سنگت آتے آجو کے و اوفتے پرامن وار ئٹ مُچی نا موکل ایتے۔

ورنا بندغی حق آتا باسک ایلو سیاسی و بندغی حق آتا باسک آتیان خواست کرے کہ او دا ویل آ توار بڑز کر و بلوچ یکجہتی کمیٹی نا توار جوڑ مریر۔

بلوچ راجی مُچی – ٹی بی پی سرگپ

جنگ زدہ غا بلوچستان ئٹ سیاست آ بیدس پڑو رکھ ءِ و ریاست بلوچ راجی سیاست نا غٹ کسر تے زوراکی و بیدادی ئٹ بند کرینے ولے برجاء سال تیٹ زوراکی نا بیگواہی و ریاستی تادی تا برخلاف بلوچستان ئٹ ورنا تا سروکی ٹی سیاسی جنز آتا اسہ لڑ اس بش مسنے، ہرانا اسہ بشخ اس بلوچ یکجہتی کمیٹی ءِ۔ ہرا پگہ گوادر ئٹ راجی مُچی نا پن ئٹ اسہ بھلو جلسہ اس اڈ تننگ ءِ۔

دوبہ خلنگک کہ بلوچستان نا زور ئٹ اوار کننگ آن ہلیس ساڑی آ وخت اسکان بلوچستان ئٹ پرامن سیاسی جنز آتے طاغت ئٹ لتاڑنگ نا پالیسی ٹہفوک مسنے۔ آجوئی نا جنز ئتون اوار اوار راجی حق آتیکن توار ارفنگ آ ہم دزگیریک مسنو، سیاسی اشتماع تیا رکھ خلنگانے، گچین کروک حکومت آتے ایسر کننگانے و نیشنل عوامی پارٹی کون آ راجی جماعت آتے کالعدم پن کننگانے ولے بلوچ جنز آتے ایسر کننگ ئٹ ریاست ساندہ بے سہب مسنے۔

ریاست ہرا چم آتے بلوچ راجی جنز ئنا ایسر کننگ کن تینائی کریسس، ہمو چم آتے بلوچ راجی مُچی و ساڑی آ بلوچ مزاحمتی سیاست ءِ توننگ کن تینائی کریسہ ءِ۔ پاکستان نا فیصلہ ساز کڑدہ غاک تینا دیہاڑی ردی تیان ہیل کننگ نا جاگہ غا ہمو پالیسی تے دوارہ کننگ ءُ۔ ریاست نا مقتدر طاغت آک دا پہہ مننگ افس کہ زوراکی و بیدادی ئٹ راجی جنز آتے وختی دروشم ئٹ چُپ کرفنگ مریک ولے دا جنز آتے ایسر کننگ مننگ کپک۔

ریاستی تادی و سیاست آ بیدس پڑو رکھ ئنا سوب بلوچستان سیاسی سلنگ نا گواچی ئس ولے بلوچ یکجہتی کمیٹی نا برجاء سیاسی کاریمک بلوچ چاگڑد ءِ سیاسی وڑئٹ اسہ وار پدا متحرک کرینو و ادارہ تیان بڑز مریسہ ریاستی تادی و چین ئنا شابیت دوست آ ارادہ تا برخلاف اشتماعی جہد اکن بلوچ راج ءِ یکجاہ کرینو۔ بلوچ راجی مُچی نا بلوچستان نا مزاحمتی سیاست آ مُر اسکان زیمک مرور و دا مُر اف کہ راجی مچی بلوچ راجی سیاست ءِ دوارہ سوگوْ و گیشتر متحرک کننگ نا سوب جوڑ مرے۔

ارٹمیکو پارہ غا دا گمان و خُلیس ارے کہ ریاست دا راجی مُچی ءِ طاغت نا ذریعت ئٹ توننگ نا کوشست کرو، اسہ ہم مننگ کروک طاغت ئسے نا کاریم ئٹ ہتنگ نا دروشم ئٹ، حالیت آک بھاز خرابی نا کنڈ آ ہِننگ کیرہ، ہرا بلوچ سلہہ بند گل آتا ہمو دلیل آتے شاہدی فراوان کرور کہ اوفک پرامن سیاست نا در آتا بند مننگ نا سوب توفک ارفینو۔

بلوچ راجی مچی 28 جولائی یک شمبے نا شام 3 بجہ غا پدی زِر گوادر ئٹی اڈ تننگو۔

بلوچ یکجہتی کمیٹی تینا اعلامیہ ٹی پارینے کہ ریاست پاکستان بلوچ راجی مچی ءِ بے سہب کننگ کن تینا غٹ وسائل و تاغت ءِ کارمرز کننگ ءِ، ہرا ریاستی ہبکئی و خلیس ءِ پاش کیک۔ دادے بلوچ راجی مچی نا مونا ریاستی بےسوبی و بلوچ راجی مچی نا سرسوبی پُہہ مننگ مریک۔

بی وائی سی نا کنڈ آن پاننگانے کہ نن بلوچ راج آن خواست کینہ کہ بلوچ راجی مچی ءِ سرسہب کننگ کن ریاست نا کل زوراکی تا برخلاف مزاحمتی طریقہ کار و قاعدہ تینائی کننگِہ۔ اندن کہ ریاست ٹرانسپورٹر، باورچی، و دکاندار تے تڑی تننگ ءِ، اوفتا ردعمل ئٹی بلوچ راج ئنا ہر بندغ تینا وس ئنا کچ ٹرانسپورٹ، راشن، و ایلو المّی مڈی زیات آن زیات کچ ئٹ راجی مچی کن تننگ مرے۔

“داکان بیدس، ریاستی زوراکی بلوچ راجی مچی نا اہمیت ءِ زیات کرینے۔ داسا دا بیرہ بلوچ یکجہتی کمیٹی نا آخہ، بلکہ بلوچ چاگڑد نا ہر طبقہ فکر کن اہمیت تخک و بائدے اندن مرے۔ اگہ نن اینو ریاست پاکستان نا ظلم، زوراکی و بربریت نا مونا چُپ مسن تو دانا بھرم تون ننا ساڑی آ و بروکا زنک ءِ مون تروئی تمو۔ اندا سوب آن دا وخت چُپ تولنگ نا اف، مزاحمت کننگ نا ءِ۔ ہر طبقہ فکر ءِ ہر وڑ ئٹ دا مزاحمت ئٹی تینا کڑد ءِ سر تروئی تمو۔ داسا ہر بلوچ نا کڑد المی مسنو۔”

اعلامیہ ٹی پاننگا کہ نن ایسر ئٹ 28 جولائی آ گوادر آن بیدس (گوادر ئٹی دکاندار بلوچ راجی مچی ٹی اوار مروکا و المّی گڑا ایتور) تیوہ مکران ئٹی بلوچ راجی مچی نا شرف ئٹی شٹر ڈاؤن ہڑتال نا پڑو کینہ۔ نن اندا سرپند مرینہ کہ بلوچ راجی مچی بلوچ زنک ایسری، بلوچ قوم ئنا نیام ئٹ سیوتی و اتفاق ودی کننگ، و بلوچ راج ئنا تشکیل نو ئنا برخلاف اسہ منظم السی جہد ئسے نا بناء مرو و داڑکن راجی مچی نا شرف ئٹی بلوچ راج ئنا کُل دکاندار، کاروباری بندغ آک، و تاجر برادری رضاکارانہ بنداو آ شٹر ڈاؤن ہڑتال کیر و بلوچ راجی مچی و بلوچ راجی بقاء نا جہد ئٹی تینا کڑد ءِ سر تیر۔

بلوچستان نا دریابی شار گوادر ئٹ حوالکاری نظام بند، غٹ موبائل فون نیٹ ورک آک بند کننگار۔

شابیتی حوال تا ردئٹ گوادر ئٹ موبائل فون نیٹ ورک آک بند، حوالکاری ذرائع تا بند مننگ و موبائل فون نیٹ ورک آتا بند مننگ آن شاریک بھاز سختی تیتون مون تننگ ءُ۔

یاتی مرے گوادر ئٹ بلوچ یکجہتی کمیٹی برجاء سال 28 جولائی آ بلوچ راجی مُچی اڈ تننگ ءِ، ہرادے توننگ کن حکومت نا پارہ غان جتا پابندیک خلنگانو۔

بلوچستان نا بنجاہی شار کوئٹہ غان پاکستانی لشکر اِرا بندغ ءِ دزگیر کریسہ بیگواہ کرینے اندن کراچی ٹی پاکستانی لشکر ننکان چھاپہ خلسہ بلوچ یکجہتی کمیٹی نا باسک ءِ دزگیر کننگ آن پد زوراکی ئٹ بیگواہ کرینے۔

بلوچستان نا بنجاہی شار کوئٹہ غان پاکستانی لشکر نا دو آن بیگواہ مروک بندغ نا چاہنداری نواز رودینی نا مار حافظ اسلم و عامر رودینی نا پِن تیٹ مسنے۔

پن کروک بندغ آتے استو کوئٹہ نا علاقہ سریاب لوڈ کاریز ئٹ اوفتا اُرا غان دزگیر کننگانے ہراڑان پد او بیگواہ ءُ۔

ایلو پارہ غان کراچی ٹی پاکستانی لشکر ننکان چھاپہ خلسہ بلوچ یکجہتی کمیٹی نا باسک ءِ دزگیر کننگ آن پد زوراکی ئٹ بیگواہ کرینے۔

شابیتی حوال تا ردئٹ کراچی نا علاقہ ملیر ئٹ پاکستانی لشکر اُرا غا چھاپہ خلسہ بالاچ پنی ءُ بندغ ئسے دزگیر کریسہ نادرست ہند آ درینے۔ بیگواہ مروک بندغ بی وائی سی نا باسک ئسے ہرا بلوچ راجی مُچی نا تیاری تیٹ مونا ئس۔

خیال ئٹ مرے بلوچستان و کراچی آن اندنو کیہی حوال رسینگانے ہراڑے بلوچ راجی مُچی نا تیاری تیٹ اختہ غا بندغ آتے فورسز آک بھیم نا گواچی کننگسہ ءُ۔

تدوکا دے تیٹ کراچی آن پاکستانی لشکر پنچ بندغ ءِ دزگیر کریسس ہرا دائسکان آجو کننگتنو۔ ارٹمیکو پارہ غان تدوکا دے تیٹ خضدار ئٹ ہم بی وائی سی نا باسک آتے پمفلٹ بشخنگ نا وخت آ فورسز آک پلویڑ کریسہ دزگیر کننگ نا کوشست کریر واہم السی ردعمل آن پد فورسز آک اوفتے دزگیر کننگ ئٹ بے سہب مسر۔

بالاچ نا زوراکی ئٹ بیگواہی نا بابت بی وائی سی نا پاننگ ءِ کہ راجی مچی نا برخلاف ریاستی فورسز آتا بی وائی سی نا برخلاف کریک ڈاؤن برجاء ءِ۔ اوفک پک کرینو کہ بالاچ ءِ اُرا غان دزگیر کننگ آن پد بیگواہ کننگانے۔

بلوچستان نا ضلع کیچ نا علاقہ بلیدہ ئٹ پاکستانی لشکر اینو ارٹمیکو دے ہم لشکر کشی ٹی اختہ ءِ۔

حوال تا ردئٹ فوجی کارندہ غاک جتا ہند آتیا کسر بند کننگ تون اوار علاقہ تیٹ پترینگنگ ءُ اندن گردانک و شورما کور نا ہند آتیا فورسز آتا نفری ساڑی ءُ۔

دا وخت آ پاکستانی لشکر چار بندغ ءِ زوراکی ئٹ بیگواہ کرینے ہرافتا چاہنداری عبداللہ نا مار مراد، شوکت، حمید نا مار حفیظ و اسماعیل نا مار داد جان نا پِن تیٹ مسنے گڈیکو اِرا بندغ نا تعلقداری گردانک آن ءِ۔

اسہ پین بندغ ئسے نا ہم زوراکی ئٹ بیگواہ کننگ نا حوال آک اریر واہم دا بابت شابیتی حوال آک دائسکان بتنو۔

حوال تا ردئٹ استو گیشتگ، گردانک نا ہند آتیا پاکستانی لشکر نا کارندہ غاک اسہ زمباد گاڑی ئسے آ سم کاری کریر۔

ہندی بندغ تا ردئٹ سم کاری نا سوب اِرا بندغ نا جانی نسخان تا حوال آک اریر اندن پن کروک گاڑی ہرا ہند آ سلوک ئس ہموڑے گاڑی ٹی دتر نا نشانک خننگانو۔

پاکستانی لشکر نا ’آپریشن عزم استحکام‘ نا پڑو آن پد تیوہ بلوچستان ئٹ فوجی ہن و بر ئٹ ودکی خننگ ئٹ بسنے تدوکا دے تیٹ مستونگ، نوشکی و قلات ئٹ بھلو کچ ئسے آ جنگی سامان تا سر کننگ ہم خننگ ئٹ بسنے۔

واہم عسکری کوالخواک دا بابت ہچو حوال فراوان کتنو۔ خیال ئٹ مرے ہنوک وخت ئٹ بلوچستان نا جتا علاقہ تیٹ بیدس پڑو کروک لشکر کشیک چرجوئی تون برجاء مسنو۔