فرانسیسی اخبار Le Monde دا ہیت ءِ پاش کرینے کہ بلوچ بندغی حق آتا پنی آ باسک ڈاکٹر ماہ رنگ بلوچ نا پن اسہ رنگ ارٹمیکو وار ہم نوبل امن داد کن گچین کننگانے۔ واہم دا بین الاقوامی اعزاز نا ملنگ آن گڈ ہم پاکستان ئٹ اودے دہشت گردی و خون کننگ نا مقدمہ ئٹ عمر قید نا سزا تننگانے۔

رپورٹ نا رد ئٹ ڈاکٹر ماہ رنگ بلوچ نا برخلاف مقدمہ نا بننگ جیل ئنا تہٹی بند کوٹی ئٹ مسونے، ہراڑے نہ صحافی تے بننگ نا موکل تننگا و نہ کہ خاہوت ءِ۔ او نا وکیل آک عدالتی کاروائی ءِ غیر شفاف و غیر منصفانہ منیسہ فیصلہ نا برخلاف اپیل کننگ نا پڑو تسونے۔

ڈاکٹر ماہ بلوچ تدوک کیہی سال تیان بلوچستان ئٹ زوراکی نا بیگواہی، عدالت آن چپ خون و بندغی حق آتا برخلافی تا برخلاف توار بڑز کریسہ کرینے۔ او نا ہندا جہد نا سوب آن اودے اسہ رنگ ارٹمی سال نوبل امن داد کہ گچین کننگا، ہرادے جہانی تلہ غا او نا پرامن جہد نا پِنی مننگ پاننگ مننگسہ ءِ۔

بندغی حق آتا جہانی گل آک عمر قید نا سزا آ ترند بھیم نا درشان کریسہ اودے اختلافی توار شیف خلنگ نا کوشست اس پاننگانے و ڈاکٹر ماہ رنگ بلوچ نا دمدستی یلہ کننگ نا خواست کننگانے۔

ضلع کیچ نا علاقہ گوگدان ئٹ استو ننکان ایف سی نا کارندہ غاتا پارہ غان علی فقیر نا اُرا غا ننکان چھاپہ خلنگا، ہرانا وخت اُرا نا بندغ آتے بھیم تننگا۔

خاہوت نا پاننگ ءِ کہ دا اولی تدینی اف بلکن داکان مالو ہم کیہی وار ایف سی و ایلو ادارہ غاتا پارہ غان اوفتا اُرا غا چھاپہ خلنگانے۔

خاہوت والا تا رد ئٹ ننکان مروک کاروائی نا وخت اُرا ئٹ ساڑی نیاڑی و چنا تیٹ ترند بھیم اس تالان مس، ہندن کارندہ غاک اُرا نا تلاشی ءِ ہم ہلکر۔ خاہوت والا تا دعویٰ ءِ کہ وار وار کروک دا کاروائیک اوفتا ہڑدے ئی زند ءِ ترند زہمی کرینو۔

خاہوت والا پین دوبہ خلیسہ پاریر کہ تدوک جتا چھاپہ غاتیٹ اُرا نا اِرا موٹر سائیکل، اُرا نا قیمیتی مڈی و نیاڑی تا پُچ آتے ہم دننگانے۔

خاران شار نا خڑک آ اسہ وار پدا سلہہ بند بندغ آتا بھلا کسر آ ناکہ بندی و گاڑی تا پٹ و پول برجا

خاران شار نا خڑک باب خاران نا ہند آ سلہہ بند بندغ آک بھلا کسر آ چیک پوائنٹس ٹہفسہ ہن و بر والا گاڑی تا پٹ و پول نا عمل ءِ برجا تخار۔ پن کروک بھلا کسر خاران ءِ نوشکی و کوئٹہ تو اوار ایلو علاقہ تیتو ملفک۔

خاران ئٹ برجا ہفتہ داڑان مالو ساراوان، نوروز قلات و زاروزئی نا ہند آتے سلہہ بند بندغ آتا بھلو کچ اس تینا کنٹرول ئٹ کریسس ہرا اِرا دے اسکان برجا ئس۔

دا نیام ئٹ پاکستانی لشکر و سلہہ بند بندغ آتا نیام ئٹ ترند نوعیت نا جنگ اس ہم مسوس۔

بلوچستان نا ضلع مستونگ و پنجگور آن مُسہ بندغ نا پاکستانی لشکر نا دزگیری آن گڈ بیگواہ مننگ نا احوال رسینگانے۔

بیگواہ مروک آتا چاہنداری زکریا ولد دلمراد، عادل ولد عبدالرشید و صدیق ولد رسول جان نا پن تیٹ مسنے۔

احوالکار آتا پاننگ ءِ کہ زکریا ءِ 21 مارچ نا نن کم و ود دو بجہ غا ضلع مستونگ نا علاقہ کلی کاریز سر ئٹ اونا اُرا غان پاکستانی لشکر دزگیر کرے۔ احوالکار آتا رد ئٹ دزگیری آن گڈ او نا بابت ئٹ ہچو حوال اس رسینگتنے۔

ارٹمی پارہ غان ضلع پنجگور نا علاقہ پروم آن تعلقداری تخوک صدیق ولد رسول جان ءِ منہ دے مالو کیمپ آ خواہفنگا۔ خاہوت نا رد ئٹ دا تدینی آن گڈ او نا ہم ہچو حوال اس رسینگتنے۔

ہندن اینو سہب ئنا پاکستانی لشکر پروم لیگورک آن عادل ءِ دزگیر کرینے ہراڑان گڈ او بیگواہ ءِ۔

زہمی خاہوت آک ہر مُسٹ نا دمدستی یلہ کننگ نا خواست ءِ کریسہ پارینو کہ اگہ دافتا زی آ مقدمہ اس درج ءِ گڑا اوفتے قانود نا رد ئٹ عدالت ئٹ ہتنگ مرے، نہ تو ایلو دروشم تیٹ اوفتے دمدستی یلہ کننگ مرے۔

یاتی مرے کہ بلوچستان ئٹ زوراکی ئٹ بیگواہی تا جیڑہ تدوک کیہی سال تیان اسہ اہم بندغی آتا ویل ئسے، ہراڑا زہمی خاہوت آک، بندغی حق آتا تنظیم آک و جتا انگا سیاسی و چاگڑدی تپہ غاک اسہ لڑ ئٹ خلیس پاش کریسہ مسونے۔

بلوچستان نا ضلع خضدار نا علاقہ زہری ئٹ پاکستانی لشکر ءِ سلہہ بند جنگ ئٹ جانی نسخان رسینگانے۔

زہری نا علاقہ بلبل ئٹ درو سلہہ بند بندغ آک جتا انگا ہند آتیا پاکستانی لشکر ءِ ہمو وخت جلہو آتیٹ ٹک کریر ہراتم فوج بکتر بند، ٹینک و ایلو گاڑی تے ئٹ علاقہ ئٹ بریسہ ئس۔

علاقائی احوالکار آتا رد ئٹ درو سہب و شام ئنا وخت کیہی گھنٹہ ترند ءُ جنگ اس برجا ئس۔ دا نیام ئٹ علاقہ نا مخلوق تینا اُرا تیان پیشن متو ہندن علاقہ ئٹ سم کاری و تراک آتا توار برجا ئس۔

جنگ ئٹ جانی نسخان آتا احوال رسینگانے واہم کالخواہ تا پارہ غان دا بابت ئٹ ہچو شابیت اس شینک کننگ متنے۔

بلوچستان نا ضلع نوشکی ئٹ بھلا کسر آ پین شش گاڑی ءِ خاخر تریسہ بھس کننگا، داکان مالو بوزر تون اوار چار گاڑی ءِ ٹک کننگا۔

نوشکی نا علاقہ احمد وال ئٹ پھاٹک نا خڑک کوئٹہ تفتان بھلا کسر آ سلہہ بند بندغ آک شش بھلا گاڑی تے جلہو ئٹ ٹک کریسہ خاخر تسر۔

داکان مالو، نوشکی مَل نا ہند آ ہندا کسر آ بوزر تون اوار چار گاڑی ءِ ٹک کننگاسس۔

مستی اینو مستونگ نا علاقہ شیخ واصل ئٹ کوئٹہ تفتان بھلا کسر آ سلہہ بند بندغ آک کیہی گھنٹہ کسر ءِ تفنگ نا وخت آ ہفت ٹرالر گاڑی تے تینا کوزہ ئٹ ہلکر۔

دا کاروائی تا ذمہ واری ءِ دسکان کس اس قبول کتنے واہم پن کروک بھلا کسر تدوک اِرا توہ آن بلوچ لبریشن آرمی نا کنٹرول ئٹی ءِ۔

ہمو نا پن سمیعہ ءِ

نوشتکار: حمل بلوچ (کمالان)

دی بلوچستان پوسٹ

چاغی نا دلبند آ تراک آن اسہ سال اس مالؤ 1997 ئٹی خضدار نا کیب ئنا کالونائزڈ و زوراکی تا آماچ مروک شار توتک ئٹی اسہ چنکو گودل اس  راج ئنا بزگی تا مارشت تون اوار ودی مریک۔ دا مارشت و احساس نا جند داخس کڑمب مریک کہ عمر ئنا گیشتری تون اوار او چنکا گڑدو آ گودل نا کیب آ نیاڑی نرینہ، نازرکی نا احساس آتے اودیم کیک و اسہ پوسکنو بندغ اس گلزمین نا زیہا جوڑ کیک۔ تیوہ غا زند ئنا غلامی و بزگی نا احساس اسہ پارہ غئے کہ تینا رسیدئی ٹی بلوچستان ئٹی زنک ایسری نا کل آن بھلا مثیل آتے بلوچستان نا شار توتک ئٹ اشتماعی ادیرہ تا دروشم ئٹ خنک۔ دا خنک بیرہ خن تیٹ مفک بلکن است ئٹ ہندن جاگہ کیرہ کہ ہمو چنکا گودل نا ملی ءِ سُرفیسہ غلامی نا احساس آن شپ ءُ اسہ جہدکار اس ودی کیرہ۔ ہمو ساعت مریک کہ چنکا گودی بلوچ نیاڑی دا دیہاڑ کڑد ءِ مارک و استعمار نا تروکا خیال آتے پدی بٹنگ نا فیصلہ کریسہ بلوچ سلہہ بند جدوجہد نا ںشخ مریک۔

انت اوڑتون پین کسر ئسک کہ دژمن نا سم و توفک آتون مون تروس؟ انت ننا پرایمنی برانز آتیان دژمن ننا ایڑھ ایلم تا کسفنگ آن ہد کائک؟ دا سوج آک اودے تہان سرفیسہ کریرہ۔ ہندا سوج آتا ورندی ٹی او دا حد ئسکان سر مریک کہ دا بیانیہ ءِ سفا پرغک بٹک کہ نیاڑی اسہ نزور ءُ گڑا ئسے۔ بلکن توفک کوپہ غا قلم و کیمرہ بڈ کریسہ تینا راج ئنا اینو نا بزگی و درو نا دلیری تا پاش پاش درشانی کیک کہ بلوچ لبریشن آرمی نا میڈیا ونگ ئتون اوار اوار کلماری کیک و مجید بریگیڈ نا بشخ و بھار مریک۔

گڈ سر ئٹ پہہ مریسہ کیک کہ راج ئنا روشن آ سہب ئسے کن ذات ئنا ندر کننگ بھلو معنہ اس تخک، گڑا راج ئنا پگہ کن جند ندری نا فلسفہ غا عمل کیک کہ راج آک ہمو تم ساندہ زندہ سلیرہ ہراتم کہ فرد آک تینے اوٹی و اوڑکن اودیم کننگ ہیل کیرہ۔ او گودل پاش ہیت ئٹ تو اودیم مس ولے مدام زندہ سلیس انتئے کہ او قبائلی رسم و روایت آتے پرغک و دتر چٹخار کریسہ دیہاڑ نا پنہ غا تے آ نوشت مروک متکن انگا لووز آتے بلوچ نا ہر چنا نیاڑی و ورنا تیکن پاش کریسہ پوسکن کیک کہ بلوچ نا شین ئٹ کاٹم شیفی متنے بلکن ڈیہہ و راج ئنا رکھ ئکن ندر مننگ مسونے۔ او ندر مس، اودیم مس ولے راج ءِ اسہ پوسکنو زند اس بشخا۔ جی اؤ راج ءِ پوسکنو زند اس بشخوکا گودل نا پن سمیعہ قلندرانی ءِ۔

سمیعہ اسہ بھاز بھلو کڑد اس، دیہاڑی ءُ فکر اس و ترند ءُ جوزہ اس ئسک۔ سمیعہ نا فکر فکر تالان کننگ نا گرج ءِ تانکہ اونا دتر نا ہر پڑی تون انصاف مرے۔

بلوچستان نا ضلع قلات آن اسہ توہ اس مالو بلوچ لبریشن آرمی نا دو آن دزگیر مروک ایئرپورٹس سکیورٹی فورس (اے ایس ایف) ڈپٹی ڈائریکٹر نا جون خننگانے۔

پولیس کوالخواہ تا رد ئٹ 58 سال ئنا محمد وسیم نا تعلقداری کراچی آن ئس۔ اودے برجا سال بیست مئی آ اونا سنگت تون اوار قلات آن کم و ود 40 کلو میٹر مُر محمد تاوا آن ہمو وخت نادرست سلہہ بند بندغ آک برمتہ کریسر ہراتم او کوئٹہ غان کراچی آ ہننگ ئس۔

تدینی آن گڈ سی ٹی ڈی پولیس اسٹیشن ئٹ مقدمہ درج کننگاسس ہندن برمتہ مروک افسر و اونا سنگت نا یلہ مننگ کہ پولیس، محمکہ انسداد دہشت گردی (سی ٹی ڈی)، فرنٹیئر کور (ایف سی) و ایلو ادارہ غاتا پارہ غان سرچ آپریشن بنا کننگاسس واہم او سرسہب متوس۔

قلات ڈویژن بست و بند نا اسہ بھلو افسر اس پن ءِ ڈھکنگ نا شرط آ میڈیا ءِ پارے کہ چار شمبے آ محمد وسیم نا جون قلات پولیس تھانہ صدر نا خڑک آتیٹ توک پنی ءُ علاقہ ئسے آن خننگانے۔

قلات پولیس کنٹرول ہم تدینی ءِ پک کریسہ پارے کہ جون کوئٹہ و کراچی بھلا کسر آن کم و ود اِرا کلو میٹر دے ٹک نا پارہ غان اسہ گیاوان ءُ جاغہ ئسے آن خننگا۔

پولیس جون ءِ ضلعی ہیڈکوارٹر ہسپتال قلات آ سر کرے و المی کاروائی آن گڈ کراچی کہ رادہ کننگا۔

پولیس نا رد ئٹ اے ایس ایف نا ڈپٹی ڈائریکٹر محمد وسیم احمد بیست مئی آ تینا سنگت تون اوار کوئٹہ غان کراچی آ ہننگ ئس۔ او تینا ذاتی گاڑی ئسے ٹی سفر کننگ ئسر ہراٹی اِرا ڈرائیور ہم ساڑی ئسر۔

پولیس نا پاننگ ءِ کہ ہراتم گاڑی محمد تاوا نا علاقہ غا سر مس گڑا نادرست سلہہ بند بندغ آک اودے تورفیر۔ سلہہ بند بندغ آک اوفتا چاہنداری آن گڈ محمد وسیم و او نا سنگت ءِ تینتو اوار دریر، ہندن گاڑی و ہڑتوم آ ڈرائیور آتے ولدا یلہ کریر۔ ڈرائیور آک تدینی نا احوال ءِ صدر پولیس اسٹیشن قلات ئٹ تسر ہراڑان گڈ برمتہ مروک آتا پٹ و پول ءِ کننگ بنا مس۔

بلوچ لبریشن آرمی اے ایس ایف افسر ءِ دزگیر کننگ نا ذمہ واری ءِ ارفیسس۔ ترجمان جیئند بلوچ اسہ چنکو بیان ئسے ئٹ پارے کہ کوزہ گیر پاکستان نا وزارت دفاع نا ایئرپورٹ سیکیورٹی فورس (اے ایس ایف) نا ڈپٹی ڈائریکٹر و کمانڈنگ افسر وسیم احمد ننا کوزہ ٹی ءِ۔ بی ایل اے نا سرمچار آک اودے قلات نا بنجائی بھلا کسر آن چاہنداری آن تہ گڈ دزگیر کریر۔

جیئند بلوچ پارے کہ دا کاروائی بی ایل اے نا انٹیلیجنس ونگ زراب نا پارہ غان رسینگوک ڈھکوک حوال نا بنداؤ آ ایسر کننگا۔