یخ آ سہیل
نوشت : ایوان بنین ( روس )
براہوئی مٹ و بدل : سعدیہ بلوچ
دی بلوچستان پوسٹ
دا سال جون ئٹی او ننا جاہ آ رہینگنگ کن بس ۔ نن اودے ساندہ تینا خاہوت نا اسہ بندغ ئس سرپند مسونہ ۔ اونا کہوک آ باوہ کنا باوہ نا خڑک ءُ سنگت و ہمسایہ ئس ئسک ۔ پانزدہ جون آ فرڈینینڈ ءِ سراجیوو ئٹ کسفنگا ۔ شانزدہ تاریخ نا سہب ڈاک خانہ آن اخبار آک بسر ۔ کنا باوہ نن ئنا اخبار آتان اسٹ ئس دُو ٹی ہلیسہ خواننگ ءِ اِلا اِرغ کنوک آ کوٹی ٹی بس ہراڑے ای ، لمہ و ہمو ہنین آ بندغ دائسکان تولوک چاہ کننگ ئسن ، او پارے : ” گڑا ، کنا سنگت ، ہُر جنگ لگوک ءِ ! آسٹریا نا ولی عہد ءِ سراجیوو ئٹ کسفنگانے ۔ دا تو جنگ بناء مسونے ! “
انتۓ کہ دا باوہ نا سَنت آتا دیک ئسر ، سینٹ پیٹرز ڈے ، آ ہر وڑ ئنا بندغ بسکہ گڑا دے آن نا اِرغ آن گڈ ، کنے اوڑتون اوار پارے ولے نوزدہ جولائی آ جرمنی روس نا برخلاف جنگ ئنا پڑو کرے ۔۔۔۔
ستمبر ٹی او ننے آ بس ، بیرہ بیست و چھار گھنٹہ کن ۔ او سپاہی نا ڈول راہی مننگ آن مہالو ننے آن رخصت کننگ خواسکہ ۔ او وخت نن ٹَک خلکونہ کہ جنگ بھاز ہُرے اسکان چلوف ۔ ننا برام ءِ بس ہتم اسکان پدی شاغار ۔ و او ننا رخصتی نا نن ئس ۔ ہڑدے نا ڈول ، نن ئنا اِرغ نا ایسر مننگ آن گڈ نن اسٹوپ ءِ خلکن ۔ باوہ دریچہ نا پارہ غا ہُرا ہراڑا مول تولوک ئس و پارے :
” دا سال سہیل ہبکئی ڈول ئٹ وخت آن مہالو و یخ ءِ ! “
او نن چھپ تولوک مسن ، بیرہ اسیکہ اسیکہ تینا راست انگا و ڈھکوک انگا خیال و احساس آتے ڈھکیسہ ، جارات تون اوار بھاز بے معنہ او لوز آتا بدلی کریسہ کرین ۔ انداخس کہ کنا باوہ ہم دروغ نا جارات تون اوار سہیل نا بابت ہیت کریسس ۔ ای فرانسیسی طرز نا دریچہ نا خڑک آ ہناٹ و تینا شال ئٹ شیشہ ءِ پھاک کریٹ ۔باغ ئٹ ، موننگا آسمان آ یخ انگا استار آک تیوہ آب ئٹ پاش وڑ ئٹ چمک تننگ ئسر ۔ باوہ تینا آرام کروک آ کڑسی آ بھلو بھاف ہلیسہ سگریٹ کشنگ ءِ بناء کرے ، او اسیکہ اسیکہ میز آ مروک چراغ ءِ بے جاراتی ئٹ نظر شاغنگ ئس ۔ کنا لمہ ، خنتیا چشمک تخیسہ ، اونا روشنائی ٹی بھلو محنت ئسیٹ ریشم نا اسہ چُنکو گھوتری ئس سلائی کننگ ئس ۔ نن غٹ سرپند مسونہ کہ انتسیکن ءِ ۔۔۔۔۔۔ دا کھل او وخت است ءِ خلکن کروک ئس ئسک ۔ باوہ ہرفے : ” گڑا ، نے یقین ءِ کہ نی نیرن نا ودار کننگ نا بجائے سہب وختی پیشتمنگ خواسہ ؟ “
” ہئو ، اگہ نی کنے اجازت ایتیسہ گڑا کنے کھل آن مہالو معلوم مروئی ءِ ۔ “ او پارے ۔ ” دا تو افسوز ناک ئسے ، ولے کنے داسکان ہم اُراٹی تینا گِڑاتے جُوان تخنگ نا گرج ارے ۔ “ کنا باوہ اسہ کڑمبو آڑسندہ ئس کشا ۔
” جوان ءِ ، ہمر کہ نا منشا ، کنا ہنین گڑا دا حالیت ٹی ، اگہ نن نے پگہ رخصت کروئی ان گڑا ننے پیرنگاتے دا وخت الم تینا بسترہ غاتیٹ پیہوئی ءِ ۔۔۔۔۔“
کنا باوہ بش مس و تینا مروک آ مار ئنا سینہ غا خیر و برکت نا دعا تننگ کن صلیب نا نشان جوڑ کرے ۔ او ادب ئٹ اونا دُو آن بُکس ہلنگ کن شیف مس ۔ و پدا کنا باوہ نا پارہ غا شیف مس ۔ نن ہڑتمکاک تنیا ئسن ، نن منہ وخت اِرغ کنوک آ کوٹی ٹی توسن ۔ ای سوچاٹ کہ وخت ءِ گدریفنگ کن تاش نا پتہ خلین ۔ او نیام ئٹ او چھپی ٹی کوٹی ئٹ چرینگیسہ ئس ۔ آخر او ہرفے : ” ہاں ، نی تازہ او چھرک ئس ہلنگ خواسہ ؟ “ کنا است ٹی ، کھل احساس آک گم مسر ، ولے ای بے تعلقی ئٹ ورندی تسٹ : ” کنے ہچو اعتراض ئس افک ۔ “ او دسکان اسہ گڑا ئسے نا بابت کڑمبو سوچ ئسیٹ گم ئس ہراتم نن مون ئنا کوٹی ٹی تیار مننگ ئسن ۔ اسہ زیباٶ بشخندہ ئسیتون فیٹ ( 1) نا نظم نا ذکر کرے :
” اوہ ، دا سہیل اخس یخ ءِ ! / تینا ٹوپ و شال تے بینوک مبو ۔ “
کنتون ٹوپ افک ، “ ای پاریٹ ۔ ” ارٹمیکو بشخ بھلا انتسے ؟ “
” کنے یات بننگ اف ۔ کنا خیال ئٹ دا کھل اندا وڑ ءُ : ” ہُر امر تارمہ انگا صنوبر آتا نیام ئٹ / خاخر بھلن مریسہ ہُننگ مننگ ءِ ۔۔۔۔ “
” یخینا ، دا طوبے کہی ہلنگ ئٹی ءِ ۔ دا کھل ہیت آتیٹ ہبکئی نا ڈول سہیل نا ہم ذکر مس ۔ ” تینا ٹوپ و شال ءِ بینک ۔۔۔۔ “ ننا پیرنگا وخٹ ئٹی ۔۔۔۔۔ اوہ ، اوہ خدا ! اوہ خدایا ! “
” انت ؟“
” اڑے ہچس اف ، کنا ہمدم ! ولے واہم ای مونجھا اٹ ۔ بھاز غم ئٹی اٹ واہم دا غُٹ کنے جُوان ہم لگیرہ ۔ ای گواچن ٹی ، گواچن ٹی نیتون مابت کیوہ ۔۔۔۔۔ “
اسہ وار ہراتم نن پُچ بدل کرین ، نن اِرغ کنوک آ کوٹی نا ماس آن گدرینگان و پیشن باغ ئٹ ہنان ۔ اول تو انداخس بھاز تارمئی مس کہ کنے اونا آستونک ٹی ہلوئی تما ۔ پدا ای نن ئنا آسمان آ استار آتا روشنائی ٹی درخت آتا مون انگا ٹھول آتیٹ کسر جوڑ کننگ بناء کریٹ ۔ او سلیس و اُرانا پارہ غا ہُرا ۔
” ہُر ، کھل اخس جتاء ءُ ، دریچہ غاک اخس سہیل نا ڈول ءُ ۔ ہراتم اسکان ای زندہ اٹ ، کنے دا نن مدام یات مرو ۔ “
ای اودے ہوراٹ ، او کنے سوئس چغے بینوک تینا خمب ئٹ خلک ۔ ای تینا دروشم آن پرہ نا گُد ءِ ارفیٹ و تینا کاٹم ءِ سُرفیٹ تانکہ او کنے آن بُک ئس ہلنگ کے ۔ اوکان گڈ او کنا دروشم نا پارہ غا پام تس و ہورا ۔
” نا خنک اخس روشن ءُ ، “ او پارے ۔ ” انتئے نے یخ مننگ ءِ ؟ “ چھرک زرس یخ ءِ ۔ اگہ او کنے کسفے گڑا نی راستی کنے اسہ وار آ استان تو دروفیس نہ ؟ “
ای است ئٹ ٹَک خلکٹ :“ و انت مرو اگہ او گواچن ئٹ اودے کسفے ؟ و انتئے ای راستی اودے منہ وخت ئٹی گیرام کروٹ ؟ اندن کہ نن ایسر ٹی کھل ءِ گیرام کینہ ۔۔۔۔؟ “ و ای تینا خیال آن خُلیسہ اودے ورندی تننگ کن اشتافی کریٹ :
” دُن پاپہ ! اگہ نے گِڑاس مریک گڑا ای دا صدمہ آن اسل پیشن پیشتمنگ کروفٹ ! “
او اول تو چھپ مس ولے پدا او اشکنو توار ئسیٹ پارے ۔
” اچھا ، و اگہ ای کسکٹ گڑا سما ءِ نے انت مرو ؟ ای ہموڑے نا ودار کروٹ ۔ ہراڑسکان نا سیالی ارے ، بس زندہ مر ، ہرا خوئشی تے دوئی کننگ کیسہ اوفتے پٹے ، و پدا کنے آ بر ۔ “
و پدا کنا سورنگا خڑینک آک وہنگ ءِ بناء کریر ۔۔۔۔۔
سہب نا او پیشتما ۔ کنا لمہ اودے ہمو نوشتہ تران نا گھوتری ئس تس ، ہرادے او ہنوکا نن آن گھنڈنگ ئس ۔ اوٹی حضرت مریم نا خیسُن نا اسہ مورتی ئس ئسک ، ہرادے کنا بھلا باوہ و کنا باوہ جنگ ئنا وخت تینتون دریرہ ۔ نن اودے اسہ وڑ ئنا مونجھائی ئٹ رخصت کرین و خُلیسہ اونا سینہ غا صلیب نا اسہ نشان ئس جوڑ کرین ۔ اسہ کڑمبو مونجھائی ئس تالان ئس ۔ گنگ انگا زبان ئٹ نن اودے پورچ ٹی سلوک ہِننگ ئٹ ہوریسہ ئسن ۔ مدام اندنو چھپی ئس تالان مریک ہراتم اسہ مرغنو جتائی ئسے آن مالو کس ئسے رخصت کینہ ، ننا دامون ہیمون ئٹ جواننگا ، دے ئنا چمکوک آ سہب ، شبنم نا پھڑینک آتیان بئیک غٹ ہموئن ئسر ولے طبیعت ئٹ امرو ہبکہ مروکو تضاد ئس ئسک کہ کھل گِڑاک بے وزن و بیدس مناسب لگنگ ئسر ۔ ہراتم نن اوکان ہاسلات مسن گڑا نن اسہ ہورک ءُ اُرا ئسے نا تہٹی ہنان ۔ ای کوٹی نا پد ئٹی دوتے تفیٹ ، و کوٹی تیٹ پاریسہ پاریسہ ہننگ ئسٹ ۔ سما اف کنے تینتون انت کروئی ئس ۔ کنکن ہوغنگ جوان مرو یا تینا تیوہ غا توار ئٹ شعر پاننگ ۔۔۔۔
او کسفنگا ۔ امرو عجیبو لوز ئسے نہ دا ! اسہ تُو ئسے آن گڈ ، گالیسیا (2 ) ئٹی او کسفنگا ۔ و ہمو وخت آن ہلیس دا وخت اسکان دائسکان سی سال ئنا مرغنو وخت ئس گدرینگانے ۔ پین بھاز گِڑا ، دا سال آتیٹ کنے آ بھاز گِڑا گدرینگانے ، ہراتم نی دا سال آتا بابت سوچ خلیسہ گڑا دا وخت بھاز مرغن لگیک ۔ دا نیام ئنا انت انت معجزه کاری ، مشکل آک و سرگڑدانیک زہن نا پڑدہ غا سُوار مریرہ ۔ ہمو کھل یات آک ہرافتے نن ہنوکا وخت پانہ ، ہرا دماخ و اُست ئنا طاغت آتیان طاغت والا ءِ ۔ 1918 ء نا ہتم نا مد ئٹی ، ہراتم کنا لمہ و باوہ مالو آن ہم مِش ئنا تہٹی خاچوک ئسر ، ای ماسکو ٹی سمولینسک مارکیٹ ٹی اسہ سودا بہا کروک نیاڑی ئسے نا تہہ خانہ ٹی رہینگاٹہ ۔ او کنے آ مخاکہ ، کنے آ ملنڈ خلککہ مسخرہ خلککہ ۔ بھاز جوان ، عزت ماب ، نا حالیت آک امرو ؟ ای ہم اسہ نیام ئنا کچ اسہ پوریا کروک ئس ئسٹ و دا وخت بھاز آ ایلو بندغ آتا ڈول ای ہم پاپاخ (3) و اوور کوٹ بینوک سپاہی تے اندنو گِڑا بہا ئٹ تسٹ ہرا کنتون دائسکان ہم ساڑی ئسر ۔ اسہ چھلو ئس ، اسہ چنکو صلیب ئس ، گھوگڑا تا کنوک ءُ فر نا کالر ۔ و پدا اسہ دے ، ہراتم ای کاریم آ ئسٹ ، ای اسہ گچینو و زیباٶ روح والا بندغ ئسیتون مِلاٹ ، اسہ پیرنگو سپاہی ہرا بھاز مالو ریٹائر مسوسس ۔ زوت ئٹ ای اوڑتون برام کریٹ و اپریل ٹی نن ایکٹیرینودر [ 4 ] ئکن اوار روانہ مسر ۔ نن اونا ایڑ ئنا مار ئتون سفر کرین ، ہرا کم و ود ہودہ سال نا مار ئس ئسک و کاریم کروک آ فوج ئٹی اوار مننگ کن ہم ہننگ ئس ۔ دا سفر ئٹ کم و ود اِرا ہفتہ لگا ۔ ای ، ای پیرو نیاڑی ئس ، چھال ئنا پازوار بینوک ، کنا ارِغ اُشکنا ریش ئتون ، تینا جُبہ ٹی ئس ۔ نن اِرا سال آن زیات ڈان و کوبان نا خڑک و جوار ٹی رہینگان ۔ یخ ئنا مُد ئنا نیام ئٹ اسہ طوفان ٹی ، نووروسیہ [ 5 ] نا بے کچ گیشتر رکھ ہلوک آتون اوار نن سمندر آن ہیپار ترکی نا پارہ غا روانہ مسن و کسر ٹی ، معیادی ہِل ئنا سوب کسک ۔ اوکان گڈ ، کنکن ڈغار آ بیرہ مُسہ بندغ رہینگار : کنا ارِغ نا ایڑ ئنا مار ، اونا ورنا غا زاہیفہ و اوفتا ہفت تُو ئنا چُنا ۔ ولے ہڑتمکا ارٖغ زاہیفہ پدا تینا چُنا ءِ کنتون اِلار جنگ ئٹی اوار مننگ کن کریمیا پدا ہنار ۔ کنے سما اف کہ اوفتون انت معاملہ ئس مس ۔ او صفحہ ہستی آن ہم خنتیان چپ مسر ۔ و اندا ڈول ای منہ سال ئکن قسطنطنیہ ٹی رہینگاٹ ، تینکن و اندا چُنکا چنا کن انتس کننگ کریٹہ کریٹ ۔ بیدس قانودی رہینگنگ و بھیم بش کروک حالیت آتیٹ کاریم کننگ آک کنا مُخ ءِ پرغار تخار ۔ ای ہم ہموکان الاٹ بسٹ و اندا مسڑ ءِ کم و ود ہر جاگہ غا تینتون اوار دریٹ بلغاریہ ، سربیا ، چیک لینڈز ، بیلجیم ، پیرس ، نیس [ 6 ] بہر حال ۔۔۔ مسڑ منہ سال مالو بالغ مسس و او پیرس ئٹ رہینگنگ نا فیصلہ کرے ۔ او داسا اصلی ءُ فرانسیسی نیاڑی ئسے ۔ او بھاز زیبا ءِ و کنے آن بھاز وے تعلق ءِ ۔ او میڈلین نا خڑک اسہ چاکلیٹ نا دکان ئسے آ کاریم کیک ، اونا کاریم رنگی آ کاغد آتے چنکو چنکو ڈبہ آتے اوار کریسہ تینا منی کیورڈ دُو و بھلا ہورتے تیٹ اوفتے سنہری ءُ فیت ئسیٹ تفِنگ ءِ ۔ ہراڑسکان کنا تعلق ارے ، ای ہم اللہ نا فضل ئٹ نیس ئٹی رہینگیوہ ، ای اولیکو وار 1912 ء ئٹی رہینگاسٹ ۔۔۔۔ و دا دے تیٹ ای سوچ ہم خلتویسٹ کہ مُستی کنتون انت مرو ۔۔
و اندن ای حالیت آتیٹ بےدادی ٹی زندہ مسٹ ، ای اونا موت ئنا صدمہ ءِ سگنگ کروفٹ ۔ ولے ، ہراتم کنے ہمو کھل یات بریرہ ہرا اوکان گڈ مسوسر گڑا ای ساندہ تینے آن اسہ سوج ئس کیوہ : نا زند ئٹی وختس زند ئس یا ہم ؟ و گڑا ای ورندی ایتیوہ : بیرہ یخ انگا سہیل ہمو شام ۔ انتۓ او راستی ہمو شام بسس ؟ جی ہئو ، او بسس و داکان بیدس ای انتس گدریفیٹ او بیرہ اسہ ضیاع ، اسہ وے کار او تُغ ئس ئسک ۔ کہ او اوڑے کنا ودار کننگ ءِ ۔ اندا مابت ، اندا ورنائی تون اوار ، اندن کہ اندا شام ئتون کھل توانائی تیان جتاء ئس ۔ ” بیرہ زندہ مر ، انت خوئشی دوئی کننگ کیسہ اونا پٹ و پول ءِ کر ، و پدا کنے آ بر ۔۔۔ “ ای زند گدریفینٹ ، کنے زرس خوئشی ملانے ، و داسا کنا ہِننگ نا وخت بسونے ۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک
