کسر شون

نوشتکار: جعفر قمبرانی

دی بلوچستان پوسٹ

بلوچستان نا گواچن آ کسر شون آک ہمود ءُ ہرا بلوچ راج ءِ مزاحمت، کاٹم بڑز و زوراک تون مون پہ مون سلنگ ہیل ایتر، نئے کہ ہرا بھیم تالان کیر، پارلیمنٹ آ دُزی کن دیر و جی ہئو، جی ہئو نا زند گدارینگ نا سبخ ءِ ایتر۔

دیہاڑ نا پنّہ غاتے چپی راستی کننگ آن گڈ بلوچ نا ہر چنا تینا راجی راہشون تے گچین کننگ ئٹ سرسہب مریسہ کرینے۔ اینو ہم نن سرپند اُن کہ ننا و تیوہ غا راج ئنا راہشون آک دیر ءُ۔

مثیل اسیکن میر عمر و میر بجار میرواڑی آن پد بلوچ راج میر نوری نصیر خان ءِ بلوچ راج نا ہیرو و موکش دا سوب آن امنا کیک کہ او بیرہ بلوچستان نا سیم آتے پک کتو بلکن تیوہ غا بلوچ راج ءِ اسٹ کریسہ اوار کننگ ئٹ سرسہب مس و تینا سیبو کن زغم ارفنگ نا پارت ہم تس۔

داکان بیدس، محراب خان شہید ءِ اینو اسکان بلوچ راج ئٹی اسہ گچینو پن اسیٹ یات کننگ نا سوب ہم ہندادے کہ او تینا لائخی نا کچ بلوچ راج ئنا رکھ و انگریز دژمن ءِ مڑنگ کن جنگ تس و تینا دتر ءِ وہیفنگ آن ہم چک و پد متو۔ راستی دادے کہ محراب خان شہید تینا ساہ ءِ تریسہ بلوچ راج ءِ مزاحمت و سیال ئنا خن تیٹی خن خلنگ نا کلہو تس و بلوچ راج ئٹی مزاحمتی دیہاڑ نا اولیکو خشت ءِ تخا۔

اوکان پد انت؟

ریاست قلات نا گڈیکو کالخواہ خان میر احمد یار خان ہم ہمو محراب شہید نا پدریچ ئسک ولے اینو تیوہ غا راج ئٹ اونا خلیس آن پُر و لپڑزہ انگا فیصلہ تا دو آن ہر لس بندغ ءِ اوڑان بد بریسہ ءِ انتئے؟ اسہ پوسکنو مسلمان ملک ئسے نا موکش بریک و اودے سنگتی یاری نا پن آ ریفسہ نزور کیک و اونا ریاست ( قلات) نا زی آ جلہو کیک ولے احمد یار خان تینا بلوچی دود آتے گیرام کریسہ جی ہئو کریسہ مزاحمت اسکان کننگ کپک۔ پک انگا ہیت دادے کہ احمد یار خان تینا باوہ پیرہ ئی آ دود ’مزاحمت‘ ءِ گیرام کرے گڑا اینو تیوہ غا راج اودے گیرام کرے۔ یخینن اینو کس اس اودے یات کپک اگہ کیک ہم تو مُرمٹیسہ۔

ایلو پارہ غان خان عبدالکریم خان اینو ہر بلوچ زنک ئنا است ئٹ زندہ ءِ انتئے کہ او مزاحمت کرے و زوراک نا مون آ سلیس۔ حق ءِ حق و دروغ ءِ دروغ پارے۔ غوث بخش بزنجو کہ بلوچستان ئٹ بھلو پن ئسے ولے اینو راج دوست آتا نغد آتا مون ٹی ءِ انتئے؟ دا سوب آن کہ او آزاتی نا جاگہ غا غلامی تون امنا کریسہ ریاست قلات نا آزاتی آخہ بلکن ’ون یونٹ‘ نا پِرغنگ کن جہد کرے۔ دن ہم تو مننگ کریکہ کہ او ہمو وخت ون یونٹ آخہ بلکن ریاست قلات نا الحاق و اواری نا برخلاف پڑوْ ءِ کریسہ راج ءِ اوار کروس۔ غوث بخش بزنجو ہم اینو بیرہ تینے آنبار انگا غلامی ءِ امنا کروک آتا نیام ئٹ زندہ ءِ بس! ننکہ او ہم ہنوکا لڑ ئنا بشخ ئسے۔

پاش انگا ہیت دادے کہ اینو بلوچ راج نا ہیرو احمد یار خان افک، بزنجو اف بلکن کریم خان ءِ، خیر بخش ءِ و سرلٹھ آن ہلیس سیاجی و شور آن ہلیس ہربوئی نا ٹُل ئٹی ہندی ورناک ءُ ہرافتا پن آ جیرت نا چیدہ غاک جوڑ مریرہ۔ ہرا تینٹ ہم مزاحمت کریر و مزاحمت نا کسر تیکن در ملار۔ پک انگا ہیت دادے کہ بلوچ مالو آن بار داسا ہم، بلکن داسا پین زیات، دا ہیت آن سرپند ءِ کہ بلوچ راج نا گواچن آ راہشون، موکش و ہیروک دیر ءُ۔

ہمو ہرا مزاحمت ہیل ایتک، مزاحمت لکھک و مزاحمت نا ہیت آتے کیک۔ ساڑی وخت ئٹ ہرن تو چارمیکو شیڈول آن پد بھاز انگا ادیب و شاعر آک تینا کڑد ءِ گیرام کریر، بھاز انگا سیاسی سنگت آک تینا مول مراد آتیان پد ہنار و بھاز انگا سنگت آک بھیم ئنا گواچی مریسہ نئے بیرہ تینٹ چُپ کریر بلکن لس مخلوق ءِ ہم چُپی پہریز نا پارت تریسہ راجی جہد آن پد و چک کننگ نا کوشست کننگ ٹی ءُ۔ داسا آخہ ولے بلوچ دیہاڑ ئٹ یخینن دن انگا خواجہ تا جاگہ اسہ ادیرہ ئسے آن بار بھاز تنک و چُنک مرو۔ دیہاڑ ہر ہیت ئنا پک انگا شاہدی ءِ پک ایتو۔ باور کیس کہ ہر ہمو سیاسی آ بندغ ہرا مزاحمت کیک چیئرمین زبیر آن بار مدام زندہ سلک۔ و ہر ہمو ادیب ہرا مزاحمت لکھک، چیئرمین غلام محمد آن بار مدام کندیل نا وڑ ئٹ روشن مریک۔ داڑیسکان کہ ہر ہمو لس بندغ ہرا مزاحمت نا ہیت کیک و بلوچ راج ئٹی اسہ چیدہ ئسے نا وڑ ئٹ مدام سوگو جِک سلوک مریک، مدام راج ئکن مثیل اس جوڑ مریک۔ مدام یات کننگک۔

ولے خن شیف، کاٹم لڑونج و عمل ئٹ چک و پد انگا ہر بندغ اسہ وار دا کوڑی آ جہان آن ہنا تو او اسلی کن ہنا۔ دن چا ودی متو۔ اینو ہُر کہ ننا اخس سیاسی بندغ، ادیب شاعر و استاد ماشٹر میر سڑدار و ازگار آک مدامی کہنگ کن زندہ ءُ کہ بروکا پدریچ آن پِٹ مِٹ جلیسہ تینا گڈیکو خاچوک جاہ (ادیرہ) ٹی جہی مننگ کن زند تدیفنگ ءُ۔ بروکا وخت تینٹ ننے آن سوج کرو کہ راج ءِ انت تسوس؟ پدریچ نا مون ءِ ارانگ ہڑساس و انتئے ہڑساس؟
دا ہیت ئٹ ہچو شک اس اف کہ بلوچ راج ئنا بھلا گرج مزاحمت ءِ و کل آن بھلا سبخ ہم ہندادے۔ داڑے زندہ ءُ گڑا بیرہ جک سلوک، خن تیٹی خن خلوک و سینہ کشوک آک، ایلو تیوہ غا راج ادیب، شاعر، سیاستدان، میر، سڑدار، مُلا زگری نمازی کل کہوک ءُ۔ سفا کہوک!

افسانہ: بے توار آ راج

نوشت: نمیران بلوچ

دی بلوچستان پوسٹ

راج ئنا تیوہ غا غم تا باریم ءِ کوپہ ترسہ ہراتم کہ خلق ئٹ کنے شام ہلک گڑا تینا کوٹی نا تہار آ روشندان نا شیف پنوک آ دراز نا زی آ تخوک بانسری نا کیرغ آن الجزائری قلم کار فرانز فینن نا کتاب ”سامراج کی موت“ ءِ تخوک خناٹ گڑا کنا تہہ نا ہُجوز ءِ خواننگ نا ملاسی تُرندی اٹ ارفسہ کرے۔ ای تینا تہہ نا ملاسی ءِ ٹمبہ کننگ کن کتاب ءِ دوٹی کرسہ خلق ئنا مُون قبلہ نیمہ غا قبرستان نا رئی آ لنگاری نا بُٹ اسکان تینے سر کریٹ۔

بُٹ آ زنڈوک دم کشسہ کتاب دوٹی ئس، ای خلق ئنا نیمہ غا کاٹم ءِ بڑزا کریٹ و اُراٹ تو خلق ئٹ اندنو چُپی اس تالان ئس کہ کس پئے خلق ئٹ ہچو چنا اس مف۔ اسہ نیمہ غا ڈیہہ ئٹ تالان بے جارات آ زند ئنا ویل آک و ایلو نیمہ غان مخلوق نا بے تواری ہرا کنا ہجوز ئنا ملاسی ئٹ پین ترندی بشخسہ ئس۔ خلق ئنا دا چُپی کنا ہُجوز ءِ ملاس کرسہ خواننگ نا خواست ءِ پین زیات کرے ای ہراتم کتاب ئنا اولیکو پنہ ءِ ملاٹ تو کنا ملی آ خلق ئنا چُپی نا سوب آک برسہ کریر۔ کنے اندا خیال ارفے کہ نوا خلق ئنا چپی بیرہ گڑاس ساعت ئنا ءِ، سہب تمنگ تون خلق کل بش مرو دا بے تواری ءِ ایسر کرو ولے راست دن الو۔ ای بیرہ تینا ملی اٹ تالان خیال آتیان تینے دلاسہ ترسہ ئسوٹ، بلکہ دا خلق ئنا چُپی ڈیہہ اٹ تالان ہمو غلامی نا زنگی آ زمزیر آتا بے رند آ نشان آتا ئس ہرا ہفتاد و ہشت سال آن زیات دا راج ئنا باتی تیا برجاء ءِ۔

دم ئسے آن گُڈ ای خیال اتٹیان پیشن مرسہ دوٹی کتاب ئنا ملوک آ پنہ غا لکھوک لوز آتا خواننگ ءِ بناء کریٹ، ای ہراتم کتاب ئٹ لکھوک الجزائری مخلوق آ فرانسیسی سامراج نا نفسیاتی جنگ، ہرا بیرہ چاگڑد ئٹ ودی کننگاسس، ءِ خواناٹ تو کنے کنا ڈیہہ ئنا خلق خلق ئٹ تالان آ بے تواری نا فکر ارفیسہ کرے۔ ای بیرہ دا بے تواری ءِ سامراجی ویل اس پہہ مرسہ تینا مِلی ئنا جارات ءِ گوہسہ ئسوٹ۔

ای اندا خیال آتیٹی اضطراب ئنا حالیت ئٹ ئسوٹ کہ کنتو مون پہ مون ہُلی گری نا شم تیان طوبے پاش کننگ نا ندارہ ئس، طوبے نا روشنائی انداخہ زیات ئس کہ ای تینا سیخا ٹی تینا ہُجوز ئنا ملاسی ءِ خناٹہ، طوبے نا رژن آن کنا سیخا نا تہٹی کنا بے جاراتی تا عکس جوڑ ئس۔ گڑاس ساعت اکن ای تینا ہوش ءِ آسمان نا بِلبلوک آ استار آتے سیل کننگ ئٹ گداریفیٹ۔ طوبے نا رژنائی آسمان نا استار و جمھر تا چنکا کوکِر تے پین سینگاراسس۔ خلق اٹ چُپی جوان برجاء ئس کس ئنا ہم تُک و توار الو ای آسمان ئٹ جوڑوک آ ندارہ ءِ سیل کننگ ئسوٹ، اندا طوبے نا ندارہ ٹی دڑوک آ خیال آتیٹی ئسوٹ کہ کنے ہجوز ئنا ملاسی ولدا ٹوہا۔

ای وختس کہ آسمان نا مون آن خنتے شیف کرسہ دوٹی تخوک کتاب نا سلوک آ پنہ آتے مون مُستی خواننگ ءِ بناء کریٹ و اندن الجزائری باتی تئے فرانسیسی سامراج نا نفسیاتی و جسمانی جنگ ئنا برخلاف الجزائری مخلوق نا جہد و قربانی تا بابت خوانسہ کریٹ تو کنا بدن اٹ تالان آ بے جاراتی شیف تمسہ کرے۔ دا نا سوب دا ئس کہ کنا ڈیہہ ئٹ تالان دا بے توار آ ناجوڑی تا ایسری نا نقش کنا ملی ئٹ جوڑ مرسہ ئس ای بیرہ تینا مِلی ئٹ ساڑی دا مرض ئنا درمان نا نیمہ غا ہنسہ ئسوٹ۔

کتاب ئٹ نوشتہ غا الجزائری مخلوق نا قربانی و سامراج نا خلاف مزاحمت ءِ تینا راج ئتون مون پہ مون کریٹ تو خناٹ کہ کنا راج ئٹ دنو ہچ بیداری ودی متنے کہ ہرا سامراج نا مِڑنگ کن کمک مرے۔ خیر ای مدان مدان کتاب ئنا ایسری نا نیمہ غا ہنسہ ئسوٹ کنا گمان ئٹ اندا نقش جوڑ ئس کہ ای کتاب نا ایسری اسکان تینا تہٹی سامراج نا خلاف جوان ترندو مزاحمتی کسر اس خنوٹ۔ کتاب دوٹی و خواننگ برجاء ئس کہ کنا خنتیان کتاب نا پنہ غاتا لوز آک اودیم مننگ ئسر ای وختس کہ کاٹم ءِ بڑزا کریٹ تو کنے آسمان آ ہمو ندارہ نظر بتو ہرا گڑاس ساعت مُست آسمان نا مون آ ئس، آسمان آ زوت تہار ءُ ندارہ اس جوڑ مرسہ ئس ہرا آسمان نا مون آن اونا مُچ رنگ ءِ کیدسہ ئس۔ ای وختس کہ طوبے آ اُراٹ تو طوبے ءِ ماگیر الکسس۔ ماگیر نا سوب آن طوبے نا رژنائی آسمان آن ایسر مننگ ئس۔

آسمان ئٹ تہار ءُ ندارہ اس جوڑ ئس۔ ہر نیمہ غا تہاری ئس استارک تینتو کروک آ دیوان ءِ ایسر کریسر جمھر نا کوکرک ہم آسمان نا مون آن ایمون مسوسر۔ خلق ئنا چُپی برجاء ئس۔ تہاری نا سوب کتاب ءِ بند کریٹ کہ نوا دا ماگیر طوبے ءِ یلہ کے و ای تینا تیوہ کتاب ءِ خوانیو، ای اندا خیال آتیٹی گم ئسوٹ کہ ناگمان چُپ انگا خلق ئنا نیمہ غان جوان ترند ءُ توار اس بش مس، ای خیال آتا کُڑمبی آن پیشن مرسہ خلق ئنا نیمہ غا اُراٹ تو خلق ئنا باتیک تینا روایتی آ توفک آتے کشسہ مون آسمان نا نیمہ غا تیر خلکرہ و خلق ئنا چُپی اسہ دم سُم تا ترند آ توار ئٹ بدل مس۔ ای حیران و ہبکہ بش مسٹ چادر ءِ کوپہ غا شاغاٹ و اندن خلق ئکن مون کریٹ، ای ہراتم خلق آ سر مسوٹ تو خلق مُچ نن نیمہ غا سماء ئس او تیر باران کننگ ئس۔ ای حیران مرسہ تینا خلق ئنا باتی ئسے آن سوج کریٹ کہ ”خیر ءِ خلق مُچ نن نیمہ غا مون آسمان کن توفک آتا مون ءِ ترسہ سم خلسہ ءِ؟“
تو باتی اس ورندی تس کہ ”اینو طوبے ءِ ماگم الکنے ماگم طوبے آ قوضہ کرینے۔“ او مُون مستی پارے کہ ”ہراتم بلوچ نا ڈغار و آسمان دیو و بلا تا گواچی مسونے تو مدام بلوچ اوفتے جارات اکن التنے، داسہ ام خلق ئنا باتیک تینا دود آتے برجاء تخسہ دا بلا ءِ جارات اکن السہ افس۔“
ای سنگت آن ولدا سوج کریٹ کہ ”او تو جوان نی داسہ نا حوالے ایت داسہ کہ ہرا بَلا ہفتاد و ہشت سال آن دا ڈغار آ جاگہی ءِ دا بلا ءِ مِڑنگ کن خلق ہراتم بش مریک۔۔۔؟“
ہچو ورندی اس رسینگتو چُپی اس ولدانا تالان مس۔

بلوچستان: جنگ یا راجی مزاحمت؟ – ٹی بی پی سرگپ

بلوچستان نا متنازع وزیر اعلیٰ سرفراز بگٹی کوئٹہ ئٹ 17 میکو نیشنل ورکشاپ نا وخت آ بلوچستان ئٹ برجاء سلہہ بند جہد ءِ بھارتی ایجنسی ”را“ ئنا چم اس گوندسہ بلوچ راجی تحریک ءِ دہشتگردی تون تفے و پارے کہ دا جنگ بیرہ فوج ئنا آخہ بلکن تیوہ غا راج ئنا ءِ۔ دا ہیت بلوچستان نا زمینی گواچنی تیتون لگپک انتیکہ اسہ ہم مزاحمتی تحریک اس السی مخ تفی آن بیدس اِرا دہائی اسکان برجاء مننگ کپک۔

بلوچستان ئٹ پاکستانی لشکر نا کاروائی تے ”راجی جنگ“ پاننگ اسہ بے گواچن بیانیہ ئسے۔ السی تلہ غا دا جنگ نا برخلاف چرجوئی ئٹ رد عمل ارے، و مزاحمتی ٹولیک جتا وخت آتیٹ دوارہ سوگو مریسہ مونا بریسہ کرینو۔ طاغت نا کاریم ئٹ ہتنگ آن دا تحریک آتے چپ کرفنگ نا کوشست آک چنکو وخت اسیکن الم مننگ کیرہ ولے بھلو وخت ئسے نا حل فراوان کپسہ۔

تدوکا سال تیٹ بلوچستان ئٹ مزاحمتی کاروائیک ترند مسنو۔ کسرک و حکومتی تنصیبات آک بے رکھوک مسنو، جہانی ڈٹ بندیک و فوجی ہدف آک بھاز وار ٹک مسنو۔ دا کل اندا ہیت ئنا شاہدی ءُ کہ آجوئی نا سلہہ بند جہد تینا عملی لائخی ءِ ودفینے۔

اگہ آجوئی نا جنگ گواچن ئٹ بیرہ پروپیگنڈا اس مسکہ گڑا فوج ءِ جتا علاقہ تیٹ بھلو آپریشن کننگ نا بکار ہم متوکہ۔ چُنا و نیاڑی تا کسفنگ آن اندا درشان مریک کہ لس آباتی پاش زہمی مننگ ءِ۔

پاکستانی مقتدر طاغت آتا زمینی گواچنی تیان نمن مننگ بلوچستان نا جنگ زدہ حالیت ئٹ ہچو بدلی اس ہتنگ کپک۔ چنکو وخت ئسے اسکان جہان آن حالیت آک ڈھکنگ مریرہ ولے بھلو وخت ئسے اسکان نہ۔ بلوچستان نا ساڑی آ حالیت پاش درشان کیک کہ بلوچ راجی جہد تینا طاغت تون جہانی تلہ غا اسہ نہ اسہ دروشم اسیٹ منّنگو۔