بلوچ اسٹوڈنٹس آرگنائزیشن آزاد نا مسکوہی چیئرمین زاہد بلوچ نا زوراکی نا بیگواہی ءِ ہفت سال پورو مس۔ دا رِد ئٹ بی ایس او آزاد نا پارہ غان پمفلٹ اس شینک کننگانے۔
پمفلٹ اٹ پاننگانے کہ بی ایس او تینا جوڑمننگ آن ہلیس اینونا دے اسکان اسہ خوانندہ گَل ئسے نا دروشم ئٹ ورنا تا ذمہ واری تے تینا کوپہ غا ہرفیسہ راجی جہد ئٹی تینا کڑد ءِ ایسری تننگ نا کوشست کرینے، دا وخت ئٹ پاکستانی ریاست بلوچ قوم ءِ نہ بیرہ زرگزرانی دروشم ئٹ نزور کرینے بلکن بلوچ راج ئنا وجود ءِ کننگ کننگ تون اوار او تینا زور اوری اٹ بلوچ ورنا تا مِلی تے شَل کننگ و اوفتا علمی و فکری ردئٹ ملی تے شَل کننگ نا کوشست ٹی ءِ۔
مُستی پاننگانے کہ ہرا وخت اسہ راج اسینا ورناک علمی و فکری ردئٹ نزور مریرہ تو اوفتا راج اکن دیمروی اوفتا وس آن پیشن مریک و اگہ ہندا راج غلامی نا زمزیل آتیٹی تفوک مسک تو اونا شناخت ہم رکھوک مننگ کپک ولے دا بلوچ راج ئنا خوش بختی مسونے کہ دا سخت انگا وخت ئٹی بی ایس او کونو تلہ اس اودے نصیب مسونے ہراڑے ورناک گواچنی وڑٹ علم دوئی کرینو ہراڑے اوفتے ریاستی بست و بند تعلیم آن سرپند کننگانے، ہراڑے اوفتے سرسہب انقلابی جہد آن سرپند کننگانے، بی ایس او ءِ بے سہب کننگ کن ریاست تینا ہر وڑنا چم بازی کاریم اٹ ایسونے، بی ایس او ءِ تہہ آن نزورکننگ آن ہلیستہ تنظیم نا راہشون تے بے گواہ و کسفنگ اسکان بیدس قانودی و بے بندغی آ وڑ ڈول تے کاریم اٹ ہتنگانے، ولے دا وخت و حالیت آتیان بیدس ہم بی ایس او اینو ہم اسے سوگوْ ءُ پروگرام اسیتون تینا جہد ءِ برجا تخانے۔
پمفلٹ ئٹ ورناتے پامدار کریسہ پاننگانے کہ 2009 آن ہلیس کہ اینو نا دے اسکان بی ایس او نا برخلاف تُرند ءُ کریک ڈاون اس برجاء ءِ، ہندا چُنکا وخت اٹ تنظیم نا سنگت آتا بیگواہ مننگ تون اوار اوفتا جشوک آ جوْن آک ہم رسینگانو و بھازا سنگت آک اینو ہم بے بندغی و بیدس قانود زندان تیٹ بے دادی تے سگنگ ءُ۔ دا تیوہ غا زوراکی تا مسخت بی ایس او ءِ راجی جہد آن مر تخنگ نا کوشست ءِ۔
ہندا بے گواہ آ سنگت آتیتون آوار تنظیم نا مسکوہی سرکماش سنگت زاہد بلوچ ہم اوار ءِ ہرادے 18 مارچ 2014 ٹی پاکستانی فوجیک مسکوہی چیئرپرسن شہید بانک کریمہ بلوچ نا مون آ بے گواہ کریر۔ سنگت زاہد ہمو انقلابی راہشون آتیٹی حساب مریک ہراکہ ہمو سخت انگا وخت اٹ جہد آن مُر سلتوس و ورناتے مُچ کریر، ہرا وخت ریاست کل کسر تے بند کریسس ولے زاہد ہمو وخت ہم تنظیم نا پروگرام آتے سلیفتو و پروگرام آتے مونی برجاء تخنگ تون اوار تنظیم ءِ پین فعال تخا، جہد آ باور کروک آ تنظیم نا سنگت آک تینا کماش نا باحفاظت یلہ مننگ کن کراچی پریس کلب نا مونا 46 دے ئنا تاریخی بین ہڑتال و کیمپ اس خلکر ہرادے بندغی حق آتا تنظیم آتا کنڈان ہندا امیت اٹ ایسر کریفنگا کہ زاہد بلوچ زندان آن بحفاظت یلہ مرو ولے افسوز نا ہیت دا دے کہ 7 سال گدرینگا سنگت زاہد بلوچ نا کیس ئٹی ہچ خاص ءُ گام ارفنگتئو و دا ہمو سوغند آتیان برخلاف ءِ ہرا سوغند آتے بین ہڑتالی کیمپ ئنا وخت آ بندغی حق آتا تنظیم آک کننگ ئسر۔
زاہد بلوچ اسے پرامن او ورناتا تنظیم ئسینا کماش اس ئسک ہرادے ہفت سال نا ءِ بیدس قانود و بے بندغی دروشم ئٹ زندان ئٹی کیز وبند کننگانے، بلوچ ورنا تا ذمہ واری جوڑ مریک کہ او زاہد بلوچ نا بحفاظت یلہ کرفنگ کن تینا کڑد ءِ ایسری ایتر، زاہد بلوچ نا یلہ کرفنگ کن جہد ننا شعور و فکر ئنا آجوئی نا جہد ءِ۔
مُستی پاننگانے کہ زاہد بلوچ شال آن ہلیس کہ کراچی اسکان ورناتے اوار کننگ و اوفتا فکر ءِ علمی وڑٹ سوگوْ کننگ کن جہد کرے، اینو وخت بسونے کہ بلوچ قوم ئنا ورناک تینا راہشون نا یلہ کرفنگ کن جہد نا کسر ءِ ہرفر۔ سنگت زاہد بلوچ گلی و خلق آتیٹ سیاست نا منوک ءُ راہشون اس ئسک، نن بندغی حق آتا تنظیم آتیان امیت کینہ کہ او زاہد بلوچ نا یلہ کرفنگ کن توار ارفر، اسہ پرامن تنظیم اسینا کماش ءِ دا وڑٹ بے گواہ کننگ اسہ بھلو ڈو ئسے و دا دو ءِ پاکستان کرینے، جہانی تنظیم آک زاہد بلوچ نا یلہ کرفنگ ٹی تینا کڑد ءِ پورو کیر۔
یاتی: دا پمفلٹ بی ایس او آزاد نا پارہ غان شینک کننگانے۔ ٹی بی پی داٹی ہچ ءُ رد و بدل کتنے۔
