پنٹ آفتاب جان نا

آفتاب رژنہ سے
آفتاب گم مفک
آفتاب ٹک تیک
نن نیمے غا

آفتاب رژنہ کیک
اسلمی جہدے نا
آفتاب واپس بریک
دلجانی سوچ ٸتو
آفتاب بیرک اے
راجی جہد ٸنا
آفتاب رژنہ سے
آفتاب گم مفک
آفتاب ٹک تیک
نن نیمے غا

آفتاب بک الیک
تینا مَش تے آن
او سرمہ خلیک
تینا مِش تے آن
آفتاب یار ٸسے
وتن نا مار ٸسے
آفتاب چپ مفک
آفتاب توار ٸسے

آفتاب رژنہ سے
آفتاب گم مفک
آفتاب ٹک تیک
نن نیمے غا

شاعر: نور بخش زہری

بلوچستان نا ضلع پنجگور، و مستونگ ئٹ ارا جتا ویل آتیٹ چناس و اسہ بندغ اس مرگ نا گواچی مسونو۔

بلوچستان نا ضلع پنجگور ٹی پاکستانی فورسز دے کہی بلوچستان نا ہندی اسہ بندغ ئسے سم کاری کریسہ کسفے۔

سم کاری نا ویل دے ٹکی و دے کہی بلوچستان ءِ جتا کروک سیم “ڈیورنڈ لائن” آ مس، سم کاری نا ویل ئٹی کہوک آ بندغ نا چاہنداری صادق نا مار احمد نا پن ئٹ مسونے، ہرا کہ دے کہی بلوچستان نا علاقہ بمپشت کَنت نا رینگوک ئسے، او تیل ئنا کاروبار کریکا۔

حوال تا رد ئٹ سم کاری نا ویل ہمو وخت مس ہرا وخت دا بندغ  پنجگور ٹی تیل بہا کننگ آن گڈ واپس ہننگ ئس کہ فورسز سم کاری کریسہ کسفے تا۔

یاتی مرے کہ دے ٹکی و دے کہی بلوچستان ٹی کاریم مفرنگ نا سوب آن بھازی ورناک تیل ئنا کاریم کیرا، بھازی دا وڑ ئنا ویل آک مونا بسونو ہرافتیٹ پاکستانی و ایرانی فورسز گاڑی تیا سم کاری کیرا ہرافتیٹ دا وخت اسکان بھازا ڈرائیور آک مرگ نا گواچی مسونو۔

برجاہ سال دے ٹکی و دے کہی بلوچستان ءِ جتا کروک آ گولڈ سمتھ لائن آ ایرانی فورسز سم کاری کریسہ 30 آن زیات بندغ ءِ کسفیسس۔

ایلو پارہ غان تدوکا دے مستونگ کرگاپ ٹی ریلوے  پاٹک فیلڈر کار گاڑی نا ڈک لگنگ نا سوب آن کسری چناس مرگ نا گواچی مس۔

چنا نا چاہنداری کلی حاجی میر بہاول خان رودینی آن تعلقدار لیویز سپاہی شہباز خان نا مار صابر ندیم نا پن ئٹ مسونے، ہرانا عمر 12 سال ءِ، کردگاپ لیویز فورس سہی وخت آ  کاروائی کریسہ ڈرائیور ءِ دزگیر و گاڑی ءِ کوزہ ٹی ہلک۔

اوغانستان نا صوبہ کابل و ہرات ئٹ چیک پوسٹ آ طالبان نا جہلو و بمب تراک نا سوب آن فورس نا 4 کارندہ تون اوار 8 بندغ مرگ نا گواچی مسونو۔

افغان میڈیا نا رد ئٹ صوبہ ہیرات نا ضلع فارسی ٹی چیک پوسٹ آ طالبان نا جہلو نا سوب آن 4 کارندہ مرگ نا گواچی و 5 ٹپی مسونو۔ اندن سیکیورٹی فورسز نا جوابی کاروائی ٹی 21 طالبان نا مرگ نا گواچی مننگ نا دعویٰ کننگانے۔

ایلو پارہ غان کابل ٹی اِرا بمب تراک نا سوب آن 8 بندغ مرگ نا گواچی و 9 ٹپی مسونو، اولیکو تراک چہار قلات ٹی مسافر کار نا خڑک مس ہراٹی 4 بندغ  مرگ نا گواچی و 4 ٹپی مسر۔ اندن 4 گھنٹہ آن گڈ ایلو تراک مس ہراٹی گاڑی گاڑی نا کمک ئٹ مسافر گاڑی ٹک کننگا ہرانا سوب آن 4 بندغ  مرگ نا گواچی و 5 ٹپی مسونو۔

افغان سیکیورٹی کوالخوا تا پاننگ ءِ کہ دا بمب تراک آتا ذمہ واری ءِ ہچو گروپ اس ہم ارفتنے، مستی سر و سوج برجا ءِ۔

یاتی مرے کہ منا دے مست ہم بمب تراک آتیٹ 10 بندغ مرگ نا گواچی و 12 ٹپی مسوسر۔

حوال تا رد ئٹ پاکستان ئٹ کورونا وائرس آن 83 بندغ مرگ نا گواچی مسونو، ہراڑان گڈ کہوک آتا کچ 21 ہزار 105 مسونے۔

پاکستان ٹی کورونا نا پک مروکا کیس آتا کچ 9 لکھ 28 ہزار 588 مسونے۔

نیشنل کمانڈ اینڈ آپریشن سینٹر نا پوسکنا حساب نا ردئٹ تدوکا 24 گھنٹہ نا نیام ئٹی اسہ ہزار 893 پوسکنو کیس رپورٹ مسونے۔

پنجاب ٹی 3 لکھ 41 ہزار 390، سندھ ئٹی 3 لکھ 21 ہزار 425، خیبر پختونخوا ٹی اسہ لکھ 33 ہزار 746 کیس رپورٹ مسونو۔

اندن بلوچستان ئٹ 25 ہزار 476، گلگت بلتستان ٹی 5 ہزار 623، اسلام آباد ٹی 81 ہزار 540 اندن آزاد کشمیر ٹی 19 ہزار 388 کیس رپورٹ مسونو۔

حوال تا رد ئٹ ٹنگی بودینزئی ٹی کڈ کروکا بمب نا ترخنگ نا سوب آن مسہ چنا مرگ نا گواچی مسر اندن ارٹ بھاز ٹپی ءُ۔

جہندمی وزیرستان نا سب ڈویژن لدھا نا علاقہ ٹنگی بودبینائی ٹی بمب تراک نا سوب آن ابو کاش، حکیم اللہ و عبدالصمد ہند آ ساہ تسر۔ اندن مسکان بی بی و عبدالقادر میکن ہسپتال ٹی دوا درمان کننگ آن گڈ ڈسٹرکٹ ہیڈ کوارٹر ہسپتال ڈیرہ اسماعیل آ سرکننگار۔

ہراڑے اوفتا حالیت ءِ خلیس ٹی پننگسہ، چنا تا عمر آک ہشت آن ژانزدہ سال ئنا نیام ئٹی پاننگسہ ءُ۔

حوال تا رد ئٹ قلات ٹی کبینی آ سبزی و سو نا نرخ آسمان ءِ  سر مس، قلات بند و بستی کوالخوا تیان کاروائی کننگ نا خواست۔

گیشتر حوال تا رد ئٹ قلات ٹی سبزی و کُکڑ نا نرخ آسمان ءِ سر مسونے و غریب مخلوق کبینی نا دو آن  پریشانی تا گواچی ءِ۔ قلات ٹی کُکڑ نا اسہ کلو سو 540 رپئی ءِ۔

اندن ٹماٹر 180 رپئی کلو، بھینڈی 100 آن 120 رپئی، تھری 120، گوبھی 80 آن 100 اندن ایلو سبزی تا نرخ آک ہم غریب مخلوق نا دو آن پیشن ءُ۔

روچہ ٹی بند و بستی کوالخواک نرخ آتے کنٹرول کریسر، قلات نا مخلوق و چاگردی علاقہ آک خواست کرینو کہ کبینی نا بر خلاف گام ارفنگہ۔

بلوچستان نا ایلو علاقہ پنجگور، حب، ڈیرہ بگٹی و ڈیرہ مراد جمالی ٹی جتا روڈ شکست آتیٹ 6 بندغ مرگ نا گواچی و 5 ٹپی مسونو۔

حوال تا رد ئٹ پنجگور نا علاقہ پروم گپ ٹی اِرا گاڑی نا ڈک لگینگ نا سوب آن  اِرا بندغ مرگ نا گواچی مسونو۔ ڈک لگینگ آن ہڑتوما گاڑی تیٹ خاخر لگا ہرانا سوب آن پنچی کہن کلگ آن تعلقدار عبد الکریم نا مار عبدالوحید و حضور بخش نا مار زوعيب پُتک ہلیسہ مرگ نا گواچی مسر۔

گیشتر حوال تا رد ئٹ جوْن تے ڈسٹرکٹ ہیڈکوارٹر ہسپتال پنجگور آ سر کننگ آن گڈ خاہوت نا دو ٹی تننگا۔

اندن حب شاہ نورانی موڑ نا خڑک اسہ روڈ شکست اسیٹ اسہ بندغ اس ٹپی و اسٹ مرگ نا گواچی مسونے۔ شکست سوب آن 25 سال ئنا سلیمان مرگ نا گواچی اندن 35 سال ئنا  حبیب اللہ ٹپی مسونے۔ ایدھی ایمبولنس نا  کمک ئٹ جون تے ہسپتال آ سر کننگار۔

اندن پین حوال ئسے نا رد ئٹ  ڈیرہ بگٹی ٹی روڈ شکست ئٹی اسہ بندغ اس مرگ نا گواچی و مسٹ ٹپی مسر۔ گیشتر حوال تا رد ئٹ  ترند بننگ نا سوب آن  ٹریکٹر نا اِرا ٹائر پیش تمار ہرانا سوب ٹریکٹر ویل نا گواچی مس۔ ٹپی آک دم دستی وڑ ئٹ خڑک ئنا ہسپتال آ سر کننگار ہراڑے دوا درمان کننگ آن گڈ ویلفیر ہسپتال سوئی آ ریفر کننگار۔

اندن ڈیرہ مراد جمالی ٹی میر مراد چوک نا خڑک ٹوڈی کار ارا کسری ءِ  ڈک تننگ آن گڈ  ترند ہننگ نا سوب آن کلٹی مس۔ گیشتر حوال تا رد ئٹ ٹوڈی کار ئنا کیرنگ آن بننگ نا سوب آن ارا بندغ مرگ نا گواچی و گاڑی ٹی سوار بندغ ٹپی مس۔

ویل ئنا حوال رسینگ تون ریسکیو ٹیم و پولیس ہند آ سر مس و جوْن تون اوار ٹپی ءِ ڈیرہ مراد جمالی ہسپتال آ سر کریر مرگ نا گواچی مروکا ہڑتوما ورنا ءُ مار ءُ۔

براہوئی کتاب آتا شینکاری برجاء ءِ۔ اوتان کلچر اکیڈمی نا پارہ غان عبدالرحیم زام نا افسانہ غاتا کتاب “تنیائی” شینک مس و آماچ ادبی دیوان نا پارہ غان حسن ناصر نا مٹ کروک کتاب “زندان نا سنگت” نا شینکاری نا پڑو کننگانے۔

حوال تا رد ئٹ نوشکے آن تعلقدار رحیم زام نا افسانہ غاتا ارٹمیکو کتاب “تنیائی” اوتان کلچر اکیڈمی نا پارہ غان شینک کننگانے۔ دا جمعی وڑئٹ رحیم زام نا مسٹمیکو کتاب ءِ۔ داکان مالو رحیم زام نا افسانہ غاتا کتاب “کنا بہشت” و ناول “سوزِ ہانل” شینک مسونو۔

کتاب نا سرلوز ءِ اوتان کلچر اکیڈمی نا سروک غمخوار حیات “کسہ ایسر متنے” نا سرحال تون نوشتہ کیک کہ ہر بندغ نا زندگی اسہ سرجمو کسہ ئسے و دا اسہ کسہ غان پین چندی کسہ غاک سر ہلسہ کیرہ۔ بازا بندغ آتیٹ دا گشاد ارے کہ او تینا زندگی نا کسہ ءِ لوزاتا دروشم ٹی ہتسہ بیان کننگ کیرہ بازاک کننگ کپسہ۔ رحیم زام ٹی دا گشاد ارے کہ او تینا زندے کسہ نا شکل اٹ بیان کننگ کیک ولے دا کسہ تیٹ اوڑتون ہمرہ پین چندی زندہ انگا کڑداک ہم اوار تمسہ تینا کسہ تے بیان کیرہ۔ گڑا رحیم نا پاروکا ہر اسہ کسہ ایسری آن پد ہم برجاء مریک دُنکہ اونا افسانہ تا اولیکو کتاب “کنا بہشت” اٹ ہراکہ کسہ غاک ئسر ہمو کسہ تا ارٹمیکو لڑ داڑے “تنیائی” ٹی ہم بیان مننگ ءِ۔ لہٰذا ہرتم اسکان “کسہ ساز” نا دَم ارے تو کسہ غاک برجاء مرور۔

اندن آماچ ادبی دیوان نا پارہ غان پڑو اٹ پاننگانے کہ حسن ناصر نا مٹ کروک کتاب “زندان نا سنگت – جارج جیکسن نا چھٹیک” زوت آماد ادبی دیوان نا پارہ غان شینک مرو۔

دا کتاب نا سر لوز ءِ پنی آ نوشتکار ڈاکٹر شاہ محمد مری نوشتہ کرینے۔ اندن ہڑتوم آ کتاب آتا ٹائٹل تے رحیم زام شون تسونے۔

“زندان نا سنگت” حسن ناصر نا مٹ کروک اولیکو کتاب ءِ داڑان بیدس اونا جمعی کتاب آک مسُٹ ءُ ہرافتیٹ افسانہ غاتا اِرا کتاب “مزل نا رند اٹ” و “چیہانٹ” اوار ءُ۔