حوال تا رد ئٹ بلوچستان ئٹ 24 گھنٹہ ئنا نیام ئٹی کورونا وائرس نا پین مسہ ناجوڑ مرگ نا گواچی مسر، کورونا وائرس نا 82 پوسکنو ناجوڑ پک مسونو، اندن 30 ناجوڑ دراخ مسونو۔

محکمہ جانجوڑی بلوچستان نا شینگ کروکا رپورٹ نا رد ئٹ ہفتہ نا دے بلوچستان ئٹ 1 ہزار 420 بندغ نا کورونا ٹیسٹ کننگانے، ہمو ٹیسٹ آتا سوب آن کوئٹہ ٹی تیوہ آتیان زیات 56 مثبت کیسز پک مسونو۔

گیشر حوال تا رد ئٹ بلوچستان ئٹ کورونا وائرس آن زیمی مروکا تا جمعی کچ 25 ہزار 83 مسونے اندن ایکٹیو کیس آتا کچ 1 ہزار212 مسونے۔ رپورٹ نا رد ئٹ بلوچستان ئٹ 24 گھنٹہ ئنا نیام ئٹی کرونا آن 30 ناجوڑ تا درواخ مننگ آن گڈ  بلوچستان ئٹ دراخ مروکا تا کچ 23 ہزار 595 مسونے، محکمہ جانجوڑی نا  رد ئٹ  بائی فلو  آکسیجن زیمی 31 ناجوڑ  ہسپتال آتیٹ تروک ءُ۔

بلوچستان ئٹ کورونا آن زیمی پین 3 بندغ مرگ نا گواچی مسر ہراڑان گڈ کہوک آ بندغ آتا کچ 276 مسونے، تدوکا 24 گھنٹہ ئنا نیام ئٹی
بلوچستان نا بیرہ 13 ضلع ٹی کورونا نا  ٹیسٹ مننگ کرینے۔ اندن 20 ضلاع ئٹ کورونا وائرس نا ہچ ءُ ٹیسٹ متنے، 4 ضلاع ئٹ کورونا وائرس نا اسہ اسہ ، 2 ضلاع ئٹ ارا ٹیسٹ کننگانے۔

خضدار، زہری قبائل تا نیام ئٹ جیڑہ، اسہ بندغ اس بیران مس۔

بلوچستان نا ضلع خضدار نا علاقہ زہری ٹی قبائل تا نیام ئٹ جیڑہ، اسہ بندغ اس بیران مس۔ لیویز نا رد ئٹ زیدی ئٹ زمین نا زی آ زہری قبیلہ نا ارا ٹولی نا نیام ئٹ جیڑہ نا سوب آن ملوک، شاہ نواز نا مار، قوم زہری ہند خیرواہ دا ویل ئٹ بیران مس. لیویز مقدمہ درج کریسہ مستی پٹ و پول بناء کرے۔

اندن اسہ پین ویل اسیٹی ژوب نا علاقہ ئٹ ارا گرپ آتا ویل نا سوب آن اسہ بندغ اس بیران مس۔

ژوب، کلی بئین مندوخیل ئٹ ارا گروپ آتا ویل ئٹ سم کاری آن اسہ بندغ اس بیران و اندن اسٹ اس ٹپی مس۔

گیشتر حوال تا رد ئٹ ژوب نا علاقہ کلی بئین مندوخیل ئٹ ارا گروپ ئٹ شکست اس مس ہرانا سوب آن زمان بیران اندن سلیمان ٹپی مس ہرانا جون و ٹپی اسپتال آ دننگار، پین کاروائی تعلقدار کوالخواک کننگ ءُ۔

کوئٹہ نا علاقہ آک جناح کالونی، رئیسانی روڈ، سبزل روڈ، قمبرانی روڈ و کرانی فیڈر تون اوار ایلو زیات آبات علاای آتیٹ ہژدہ گھنٹہ نا بیدس پڑو لوڈشیڈنگ کیسکو خواستگار آتے بھاز فریشانی تا گواچی کننگ ءِ، کیسکو کرانی فیڈر و بنجائی  شکائست سیل ہم غیر فعال تخنگانے۔

گیشتر حوال تا رد ئٹ کوئٹہ ٹی مد باسن مننگ تون بجلی نا بحران ترند مس، باسنی نا ترندی ٹی ودکی تون اوار کیسکو بجلی نا مرغن و بیدس پڑو لوڈشیڈنگ ءِ پین ودیفینے ہرانا سوب آن شاریک بھاز سختی تا گواچی ءُ۔

کیسکو شکائست مراکز تا ٹیلی فون نمبر تے سہب شام  گٹ تخیرہ تاکن مخلوق نا شکائست آتیان مر مننگ کیر جناح کالونی رئیسانی روڈ، سبزل روڈ، کلی قمبرانی، پشتون آباد سریاب، کرانی روڈ، نواں کلی تون اوار  بھازی زیات آبات علاقہ آتیٹ ہچو سوج کروک اس اف۔

اندن کرانی فیڈر نا علاقہ جناح کالونی و رئیسانی روڈ تدوکا پنج دے ئنا سے تیوہ آ شام سہب ئنا پنچ بجہ اسکان پنج گھنٹہ بجلی تننگ ءِ، اندن سہب و شام ئنا بجلی ءِ بند کننگ نا سوب آن خواستگار آک فریشانی تا گواچی کرینو۔

بجلی تفرنگ نا سوب آن شاری تا زند ئنا معاملہ آک زیمی مننگ ءُ، لس مخلوق وفاقی وزارت دیر و بجلی آن خواست کرینو کہ کوئٹہ ٹی بجلی نا دروغ نا بحران نا ایسری کن گام ارفر تاکن کیسکو نا ڈوہدار بے پروائی تا سوب آن خواستگار آک  پین سختی تا گواچی مفس خاص وڑ ئٹ کرانی فیڈر نا کارندہ آتیان سرسوج کیر۔

رسینگوک حوال تا رد ئٹ محکمہ مڈ آینو ہم پاکستان نا بھاز آ علاقہ آتیٹ  مد بھاز باسن مننگ نا  گمان ء، سندھ نا جتا علاقہ آتیٹ پارہ 49 اسکان ہننگ نا گمان ارے۔

اندن پنجاب، سندھ و بلوچستان ئٹ بھاز باسنی ء، بھاز آ علاقہ آتیٹ  تروند باسنی نا راج ء، آینو ہم سندھ ئٹی دادو و نوابشاہ ٹی باسنی نا کچ49 ڈگری اسکان امیت ء۔

بلوچستان نا جتا علاقہ آتیٹ ہم مد بھاز باسن ء، سبی ٹی پارہ 48 اسکان ہننگ کیک، پنجاب ٹی ہم مد بھاز باسن مننگ نا گمان ء۔

بلوچستان نا شار نوشکی آن تعلقداری تخوکا بیگواہ سمیع بلوچ و عبدالرب بلوچ یلہ کننگانو۔

دا بیگواہ بندغ آتا یلہ مننگ نا حوال ء وائس فار بلوچ مسنگ پرسنز نا چیئرمین حوالکاری سائٹ آ تریسہ پارے کہ نوشکی آن بیگواہ مروکا سمیع بلوچ و عبدالرب بلوچ یلہ کننگانو۔

یاتی مرے سمیع بلوچ و عبدالرب بلوچ براہوئی و بلوچی بولی نا پنی آ مزاحمتی گلوکار میراحمد نا مار بلال بلوچ و پین 8 بندغ تون اوار نوشکے نا علاقہ زنگی ناوڑ آن بیگواہ کننگاسر۔

اینو سمیع بلوچ و عبدالرب بلوچ یلہ کننگانو و بلال بلوچ تون اوار ایلوفک دائسکان بیگواہ ء۔

میر عبدالنبی بدوزئی بنگلزئی عرف چنکا میر بی ایل اے نا بھلا  کمانڈر آتون اوار حساب مسوکا۔

دی بلوچستان پوسٹ ء رسینگوک حوال تا رد ئٹ آینو پنج شمبے نا دے صوب ئنا وخت آ بلوچ لبریشن آرمی نا اسہ بھلو کمانڈر ئس میر عبدالنبی بدوزئی بنگلزئی عرف “چنکا میر“ سلاء بند بندغ آتا جہلو ٹی مرگ نا بیران مس۔

57 سال ئنا میر عبدالنبی نا تعلقداری ء بلوچستان نا علاقہ اسپلنجی کابو آن پاننگ ء، اونا تعلق بلوچ آتا بنگلزئی قبیلہ نا بدوزئی ٹول آن ئس۔

گیشتر حوال تا رد ئٹ میر عبدالنبی بنگلزئی سنہ 2002 آن بلوچ لبریشن آرمی تون تعلقدار ئس و او بی ایل اے نا بھلا کمانڈران آتون اوار حساب مسوکا،بی ایل اے نا کنڈان داسکان دا ویل ئنا نمن و پک مننگ مونا بتنے، و نہ پین پک  مروکو حوال مونا بسونے، کہ اودے ہرا حالیت ئٹ و ہراڑے سلاء بند بندغ آک ٹک کریر۔

ویل ئنا رد ئٹ داسکان پین سر و سوج مننگ ء کہ اودے ٹک کروکا سلاء بند بندغ آتا تعلق مننگ کروک وڑ ئٹ پاکستانی ڈکوک ادارہ آتیان ء۔