رسینگوک حوال تا رد ئٹ لورالائی ٹی دُون ئٹی کاریم کننگ نا وخت آبرمہ نا بشخ دربلی نا شیف آ بننگ نا سوب آن اسہ بندغ اس مرگ نا گواچی مسونے۔
گیشتر حوال تا رد ئٹ لورالائی نا علاقہ کلی شبوزئی ٹی نواب خان پنی ء ُبندغ اس دُون ٹی کاریم کننگ نا وخت آ برمہ نا بشخ دربلی نا شیف آ بننگ نا سوب آن مرگ نا گواچی مسونے۔ اندن ریسکیو کولخواک جون ءِ دو ٹی ہلینگ آن گڈ ہسپتال آ سر کریر، ہراڑے المی کاروائی آن گڈ جون خاہوت نا دو ٹی تننگا، پین کاروائی برجاہ ءِ۔
نائجیریا نا فوج نا چیف آف آرمی اسٹاف لیفٹینٹ جنرل ابراہیم عطاہیرو جہاز ویل ئٹ بیران مس۔
درملکی خبر ایجنسی نائجیریا نا ائیر فورس نا ترجمان نا بابت پاننگا کہ جمعہ نا دے جنرل عطاہیرو نا جہاز قطبی ریاست کدونا ئٹ تما۔ نائجیریا نا فوج نا چیف آف آرمی اسٹاف ءِ جنوری ٹی صدر محمدو بوہاری تخاسس۔ صدر محمدو بوہاری فوج ئنا اعلیٰ جنرل نا کہنگ آ بھاز افسوز نا درشانی ءِ کرینے و اودے ہیرو اس پارینے۔
نائیجرین فوج نا چیف آف آرمی اسٹاف نا تخنگ ملک ئٹ ودوکا پُرتشدد ویل آتےدو ٹی ہلنگ و شدت پسندی ء ِتوننگ کن سوگوْ ءُ گام آتیکن کننگاسس۔
حوال تا رد ئٹ پاکستان ٹی دا وقت قدرتی گئیسں نا ودی مننگ یومیہ3 ہزار 597 ملین مکعب فٹ ءِ، ہرا فروری 2017 نا تاریخ ئٹ تیوہ آتیان زیات4 ہزار 126 ایم ایم نا ایلف ڈی ریکارڈ کننگاسس۔
میڈیا رپورٹ نا رد ئٹ پاکستان نا مسہ بھلو گیسں فیلڈ آتیان 2017 آن گیس ئنا ودی مننگ ٹی کمی بسونے، قادر پور گیس فیلڈ آن فروری 2017 ٹی گیس نا ودی مننگ 337 ایم ایم سی این ڈی ریکارڈ کننگاسس435 فیصد کم مریسہ 19 ایم ایم سی ایس ڈی آ بسونے۔ کندھکوٹ گیس فیلڈ آن ودی مننگ 37 فیصد کم مریسہ 200 آن 130 ایم ایم نا این ڈی و سوئی گیسں فیلڈ آن 444 آن 348 ایم ایم سی ایلف ڈی مسونے۔
اندا وڑ ناشپا و مکوڑی ایسٹ گیس فیلڈ آتیان ودی مننگ 7 و 8 فیصد کم مریسہ 84 و 79 ایم ایم سی ایلف ڈی آ بسونے۔
گیشتر حوال تا رد ئٹ ٹاپ لائن سیکیورٹیز تا تجزیہ کار شنکر تالریجا پارے کہ ماڑی گیس فیلڈ آن گیس ودی مننگ ٹی 10 فیصد ودکی مسونے و دا641 آن 753 ایم ایم نا ایلف ڈی آ بسونے،اندن اوچھ آن ودی مننگ ٹی 3 فیصد ودکی مسونے وا دا 424 آن 436 ایم ایم نا ایلف ڈی مسونے۔
اوفک پین پارے کہ پاکستان ئٹ گیس نا واپس مچ کننگ جون 2020 ٹی 62 ہزار 11 بلین کیوبک فٹ بی سی ایفت ) نا مقابلہ ٹی 2 فیصد ودکی آن دسمبر 2020 اسکان 62 ہزار 964 پی سی ایفت مسوسس۔
اندن شنکر تالریجا نا پننگ ئس کہ دا ودکی ماڑی اچ آر ایل و ماڑی ڈیپ نا گئیں مچ کننگ ٹی بالترتیب 7 و 8 فيصد ودکی و5 پسکونو بقا، منگریو مامی کیلی جہندمی، توغ و عمیر نا اوار مننگ نا سوب آن مسونے۔
رسینگوک حوال تا رد ئٹ بلوچستان نا شار چمن ٹی مروکا بمب تراک نا مقدمہ سی ٹی ڈی تھانہ کوئٹہ ٹی نوشت کننگانے۔
تدوکا دے چمن نا علاقہ شہید ساجد مہمند روڈ آ جمعیت علماء اسلام نظریاتی نا مروکا مچی گام ٹی بمب تراک نا مقدمہ نمبر 35/202 ہفتہ آ پولیس نا ڈیوٹی آفیسر نا مدعیت ٹی سی ٹی ڈی تھانہ کوئٹہ ٹی نا درست دہشت گرد آتا بر خلاف نوشتہ کننگانے۔
گیشتر حوال تا رد ئٹ مقدمہ ٹی خون، گام خون ، ایکسپلوزیو ایکٹ، انسداد دہشت گردی ایکٹ نا دفعہ7 اوار کننگانے۔
یاتی مرے تدوکا دے کوئٹہ چمن ٹی فلسطین نا حق کن اسے مچیگام اس کشینگا، مچیگام نا ایسر مننگ تون اوار اسے تراک اس مس ہرانا سوب آن شش بندغ بیران مسر و جمعیت علماء اسلام نظریاتی نا بنجائی نائب صدر مولانا عبدالقادر لونی تون اوار بھاز بندغ آک ٹپی مسر۔
رسینگوک حوال تا رد ئٹ کراچی ڈیفنس کھڈا مارکیٹ ٹی سکیورٹی گارڈ نا سم کاری آن ارا بندغ ٹپی مسونو۔ پولیسں نا پاننگ ءِ سم کاری نا ویل ڈیفنس کھڈا مارکیٹ ٹی گاڑی پارک کننگ آ چنکو ہیت ئسے آ بناء مس اندا نیام ئٹ سکیورٹی گارڈ سوختہ مس سم کاری کرے۔
پولیس نا پاننگ ءِ کہ ڈبل کیبن گاڑی ٹی سوار انگا بندغ موٹر سائیکل سوار آتے مُر کننگ کہ ہارن تس اوکان گڈ گاڑی آن سکیورٹی گارڈ دڑینگا بس و موٹرسائیکل سوار بندغ تون خراب وڑ ئٹ ہیت کننگ ء بناء کرے۔
اوکان گڈ سکیورٹی گارڈ سم کاری کرے ہرانا سوب آن اسہ سم اس موٹر سائیکل سوار اصغر و پنڈوخ زالبول ئسے ہم لگا، ویل آن گڈگاڑی ٹی سوار بندغ گارڈ تون اوار نرا۔
گیشتر حوال تا رد ئٹ بندغ آک گارڈ ء ِتوریر،ویل ئنا حوال رسینگتون پولیسں ہند آ سر مننگ تون سکیورٹی گارڈ ذیشان ءِ تھانہ آ درے اندن ٹپی زالبول و نرینا ءِ ہم دوا درمان کننگ کن جناح اسپتال آ راداہ کننگا۔
رسینگوک حوال تا رد ئٹ کورونا وائرس آن پاکستان ئٹ پین88 بندغ مرگ نا گواچی مسونو ہراڑان گڈ کہوک آتا کچ 20 ہزار 177 مسونے۔پاکستان ٹی کورونا نا پک مروکا کیس آتا کچ8 لکھ 97 ہزار 468 مسونے۔
نیشنل کمانڈ اینڈ آپریشن سینٹر پاننگ ء ِپسکونا اساب نا رد ئٹ تدوکا 24 سائت ئنا نیام ئٹی 4 ہزار 7 پسکونوکیسز رپورٹ مسونو۔
اندن پنجاب ٹی 3 لکھ 33 ہزار 57، سندھ ئٹی 3 لکھ 6 ہزار 707، خیبر پختونخوا ٹی اسہ لکھ 29 ہزار 13، بلوچستان ئٹ 24 ہزار 413، گلگت بلتستان ٹی 5 ہزار 471، اسلام آباد ٹی 80 ہزار 156 آ ندن آزاد کشمیر ٹی 18 ہزار 651 کیسز رپورٹ مسونے۔
گیشتر حوال تا رد ئٹ پاکستان ٹی اینو آن ویکسی نیشن نا پوسکنا لڑ بناء کننگانے، این سی او سی نا رد ئٹ 30 سال آن زیات عمر نا بندغ آتا ویکسی نیشن بناء کننگانے۔ اندن 30 سال آن زیات عمر نا بندغ آک تینے رجسٹر کیر، تینا شناختی کارڈ نمبر 1166 آ ایس ایم ایس کیر۔
حوال تا رد ئٹ کوئٹہ تون اوار تیوہ آ بلوچستان ئٹ روچہ و عئید آن گڈہم ککڑ نا نرخ ئٹی کمی مننگ کتو، 500 آن 600 رپئی کلو اسکا سو سودا مننگ ءِہرانا سوب آن مخلوق بھاز پریشانی تا گواچی ءِ۔
کوئٹہ نا شاریک ہیٹ ئنا سو کبین مننگ آن ککڑ نا سو ہلکورا، عئید آن مست نرخ آتیٹ ودکی تو ئس ولے عئید آن گڈ ہم نرخ آک کم مننگ کتوس، 510 رپئی ٹی سودا مروکا ککڑ داسا 550 رپئی کلو و مُر علاقہ آتیٹ 600 رپئی ٹی سودا مننگے ہراکہ شاری تیا کبینی نا اسہ پین بارم ئسے، مخلوق ودوکا کبینی آن بھاز پریشان ءِ۔
شاری تا پاننگ ءِ کہ ہر گڑا کبین آن کبین مریسہ ءِ، و دا کبینی ٹی دا طوفان ءِ کنٹرول کننگ کس ئنا وس ئٹی اف۔ ککڑ نا سودا کروک آتا پاننگے کہ مال ایلو جاگہ آتیٹ کبین بریک ہرا نرج آتیٹ کبینی نا سوب ءِ۔
بلوچستان نا سیم سر شار چمن ٹی مرغی بازار ٹی تراک اس مس ہرانا سوب آن شش بندغ بیران مسر ، نو بندغ آن زیات ٹپی مسونو ۔
احوال آتا ردئٹ چمن ٹی فلسطین نا حق کن اسے مچیگام اس کشینگا ۔ مچیگام نا ایسر مننگ تون اوار اسے تراک اس مس ہرانا سوب آن شش بندغ بیران مسر و جمعیت علماء اسلام نظریاتی نا بنجائی نائب صدر مولانا عبدالقادر لونی تون اوار کہی بندغ آک ٹپی مسونو ۔
یاتی مرے اینو یعنی 21 مئی نا دے تیوی پاکستان ئٹ فلسطین نا حق کن ہر جاگہ مچیگام اڈ تننگانے اندن پاکستان نا بنجائی شار اسلام آباد ٹی اسے مچیگام اس اڈ تننگا اراٹی پاکستان قومی اسمبلی نا اسپیکر اسد قیصر و پاکستان سینیٹ نا چیئرمین صادق سنجرانی اوار مرسٹ تینا خیال آتا درشانی کریر ۔
نیاڑی نا خواننگ، ننا ربیدگ و اسلام
نوشت: نائلہ نصیر
دی بلوچستان پوسٹ
نیاڑی تے تعلیم ایتنگ راج آتے آبات کننگ ءِ۔ اسلام ئٹی علم دوئی کننگ ہر مسلمان نرینہ، نیاڑی آ فرض ءِ۔ داڑان بیدس نن تینا ربیدگ ءِ ارین تو نیاڑی تا تعلیم ءِ ہچو اہمیت اس تیتنو۔ نیاڑی تا خواننگ ءِ بھاز میار سرپند مسونو۔ نیاڑی تے خواننگ کن ہلیتنو۔ بس دیخہ بھاز دینی تعلیم تسونو تا۔ جوان جوان قرآن نا ترجمہ ءِ ہم خوانیفتنو تا۔ اگہ دنیاوی تعلیم الوکہ گڑا بائدے اسلام آن معلومدار کرفیرہ تا۔ اندا سوب آن نن کل راج آتیان داخس پدی اُن۔ اگہ اسے نیاڑی اس خوانیک تو او مُچہ خاہوت ئسے آبات کیک، اونا خلق آبات مریک۔ خوانفنگ آن خلق ئٹی مثبتو سوچ اس ودی مریک۔ ہر نیاڑی کن دینی و ایلو دنیاوی تعلیم خواننگ بھاز لازمی ءِ۔ داخہ اسلام ئٹی سختی اف داخہ ننا ربیدگ ئٹی سختی کیرہ۔ وخت اس ننا شریعت نیاڑی تے خواننگ کن موْکل تسونے گڑا ننا بندغ آک انتکہ ہلیپسہ تا۔ دا جہالت نا بھلو نشانی ئسے ایلو بے سہبی نا ہم۔
مچہ داسہ گڑاس ہوش کرینو کہ نیاڑی تے تینا خوانفنگ ءُ، ایلو پیشن ہم رائی کننگو تا علم دوئی کننگ کن ولے افسوز داسکان ہم بھازا خلق آتیٹی مُست آنبار گڑاس بندغ آک چُنا نیاڑی تے خواننگ کن ہلیپسہ، و چنکا سن ئٹی برام ایترا تا۔ دُن ظلم و زوراکی جائز اف اگہ خوانفننگ کن ہلپیرے تا تو گڑا بائدے اوفتا زند ئتون دُن ظالمی و زوراکی کپبو۔ دا جدید آ دور ئٹی ننا راج ئنا نیاڑیک بھاز پدی ءُ۔ داسہ ننے مونی ہنوئی ءِ۔ دا کشیده کاری، ہرانا کاریم تے ہلوئی ءِ بیرہ تعلیم نا باریم ءِ تینا کوپہ غاتیا ارفوئی ءِ، جوان خوانوہی ءِ، تینا راج ئنا پِن ءِ سرسہب کروئی ءِ۔ داڑکن ننا نرینہ غاتے تینا نیاڑی تے خواننگ کن موْکل تروئی تمو۔
دا جہان ٹی تعلیم آن بیدس پین ہچس اف۔ نن خوانن، ہر میدان ئٹی بشخ ہلین چاہے او سیاست مرے یا سائنس، ادب و تہذیب، کل ئٹی ننے مُستی ہنوہی ءِ۔ تعلیم آن راج آک آبات ءُ۔اگہ دا جہالت ننے آن ایسر مس گڑا ننا راج آبات مرو، اسے جوانو وڑ اسیٹ زند اس تیر کرو۔ تو ننے تینا، نیاڑی، نرینہ و چناتے خوانیفوہی ءِ۔ اوفتے دینی تعلیم تون اوار دنیاوی تعلیم ہم ایتوہی ءِ گڑا نن سرسہب مرون و مُستی ہنون۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
رسینگوک حوال تا رد ئٹ پنجگوربالی پَٹ آن فلائیٹ نا بند مننگ نا سوب آن علاقئی مخلوق بالی سفر نا آسراتی تیان بے بشخ مسونے، 2 فروری 2020 آن پنجگور بالی پٹ آن پی آئی اے نا فلائیٹ سروس تیوی بند کننگانے۔ و داڑتون اوار پی آئی اے نا کوالخوا پی آئی اے پنجگور نا تیوہ آ اسٹافت و مڈیک ہم ایلو علاقہ آتیٹ شفٹ کننگانو۔
پنجگور بالی پٹ بلوچستان ئٹی مست ئنا بالی پٹ آتیتون حساب مریک، دا بالی پٹ پاکستان نا ٹہیفنگ آن مست1940ٹی ساڑی ئس ولے او وخت انگریزی رجیم نا کاریم ٹی ئس 1963ٹی پنجگور بالی پٹ بلڈنگ نا کاریم بناء مس و 1965 ٹی پنجگور آن کراچی کن پی آئی اے نا سروس بناء کننگا ولے او وخت ئٹی رن وے کچا ئس، پِر ئنا مد ئٹی بھاز دے فلائیٹ پد بیٹنگاکا۔
اندن 1986 ٹی پنجگور بالی پٹ نا رن وے دیر گریڈ کننگ آن گڈ سوگوکننگا، پنجگور بالی پٹ بھاز اہمیت تخک، جہانی بالی روٹ آ ٹہیفوک نا سوب آن بالی
ٹریفک کنٹرول سسٹم ہم ارے،و پنجگوربالی پٹ آن ہڑدے کراچی کوئٹہ تربت کن فلائیٹ مسوکا۔
اندن اوکان گڈ فلائیٹ کم کننگا، و 2 فروری 2020 آن پنجگور فلائیٹ تیوہ بند کننگا و علاقائی مخلوق بالی سفر نا آسراتی تیان بے بشخ مسر۔
