وزارت داخلہ پاکستان افغانستان سیم چمن بارڈر کراسنگ پوائنٹ ءِ ہفتہ ئٹ ہفت دے ہن و بر کن ملا۔

نوٹیفیکیشن نا ردئٹ چمن سیم دے ئٹ ہژدہ گھنٹہ ملنگوک مرو۔

چمن سیم سہب ہشت آن بیگہ نا پنچ اسکان تجارت کن شش دے اکن ملنگوک مسکہ ولے پاسپورٹ آ سفر کروک آتے بیرہ ہفتہ نا دے ہن و بر نا موْکل ئس۔

یاتی مرے کہ تدوک سال 2 مارچ 2020 آ کرونا وائرس نا سوب آن سیم بند کننگاسس۔ داڑان بیدس پاکستان نیمکوئی ایشائی ملک آتون ٹرانزٹ ٹریڈ نا ردئٹ طورخم سیم آن افغانستان نا کسر تجارتی سامان ازبکستان کن سرہلکنے۔

بلوچستان نا علاقہ چمن ئٹ قلعہ عبداللہ بازار ئٹ پولیس موبائل نا رہی آ بمب تراک نا سوب آن اسہ کارندہ اس مرگ نا گواچی و پنچ ٹپی مسر۔

پولیس نا ردئٹ تراک کوئٹہ چمن بھلا کسر آ سلوک موٹرسائیکل ئٹ مس، تراک آن پولیس موبائل تون اوار ایلو گاڑی تے نسخان مس۔

پولیس کوالخوا تا پننگ ءِ کہ تراک نا سوب آن اسہ پولیس کارندہ اس مرگ نا گواچی و پنچ ٹپی مسر اندن تراک آن گڈ کوئٹہ چمن کسر آ گاڑی تا ہن و بر بند مس۔

بلوچستان ئٹ پاکستانی فورسز آ بیست و چار گھنٹہ ئٹ مروک آ دا ارٹمیکو تراک ءِ۔ داڑان مالو استو ضلع کیچ نا بنجائی شار تربت ئٹ ایف سی ءِ جلہو ئٹ ٹک کننگا۔

حوال تا ردئٹ تربت شار ئٹ ناکہ خلوک ایف سی کارندہ تیا موٹرسائیکل آ سوار نادرست بندغ آک چغلی بمب اس خسار و نرار، تراک آن چار ایف سی کارندہ ٹپی مسر۔

تربت جلہو نا ذمہ واری ءِ بلوچ آجوئی خواہوک سلاء بند تنظیم بلوچستان لبریشن فرنٹ ارفینے۔ اینو چمن اٹ مروک تراک نا ذمہ واری ءِ دائسکان ہچو تنظیم اس ارفتنے۔

شہیدا کو وتن نا دا
مُریدی آ خیال آ تون

تخانو ڈک وتن نے کن
بشیری آ کمال آ تون

تفینو او کفن سر آ
امیری آ حوال آتون

گنوکو او وتن نے کن
مجیدی آ سوال آتون

مرو آجوہ وتن دے اس
مڑِون اودے زوال آتون

سلال بلوچ

پاکستان ئٹ دین نا بناء آن دائسکان اسہ دے ئٹ تیوہ غاتیان زیات مرک رپورٹ مسونو۔ بھارٹ ئٹ تدوک بیست و چار گھںٹہ ئٹ مسہ لکھ 60 ہزار 960 بندغ ئٹ وائرس پک مسونے۔

پاکستان نا بنجائی ویزر منصوبہ بندی اسد عمر پارینے کہ اولیکو وار سہہ شمبے نا دے تیوی ملک ئٹ اسہ لکھ آن زیات ویکسین خلنگانے۔ اونا پاننگانے کہ تدوکا دے اسہ لکھ 17 ہزار 852 بندغ ءِ ویکسین تننگانے۔

اسد عمر نا پاننگ ءِ کہ جمعی وڑئٹ دائسکان 21 لکھ بندغ ءِ ویکسین خلنگانے۔ او اسیکہ وا اُلس آن خواست کرے کہ چِل سال یا اوڑان زیات عمر نا بندغ تے رجسٹر کننگ نا حوصلہ افزائی کیر۔

بھارت ئٹ تدوک بیس و چار گھںٹہ نا نیامٹ ریکارڈ کیس و مرک رپورٹ مسونو۔

وزارتِ جانجوڑی نا ردئٹ اسہ دے ئٹ پین مسہ لکھ 60 ہزار 960 بندغ ئٹ وائرس پک مسونے۔ بھارت ئٹ برجاء ہفتمیکو دے مسہ لکھ آن زیات کیس رپورٹ مسونو۔

جہانی دین نا گواچی پین 3293 مریض ساہ تسونو۔ اسہ دے ئٹ مرک ئنا دا تیوہ غاتیان بھلا کچ ءِ ہراڑتون اوار بھارت ئٹ جمعی مرک آک اِرا لکھ ئنا حساب آن گدرینگار۔

قطعہ غزل

سیائی نا اُو ہر قطرہ ءِ ہَــرفیکہ مہر ئتو
لکھاکـہ پِنـے تختی آ لیـــلی نا عشق ٹی

یاداتے شِنک مُتکن آ طُـــوبے آ گــنوکس
تُــولُـــوکے بُھـٹ ئسے آ تنیا نا عشق ٹی

کــس خنتے آ تِخک نمے دا اف نما کمال
دا شرف نمے مِـــلا مُــوسی نا عشق ٹی

رفتار سلیس وخت ئنا محبوب نا خاطر
کس کیک سفـر عرش آ مولا نا عشق ٹی

تما کِہ نظر وختس نا کُـــــوچہ نا گلی آ
ہــڑسا اُو پَـدی چکے ہُـــوغا نا عشق ٹی

اُو تینے کــرے ہِیر ئَـــس دا دور نا صنم
وا مہرے ہمے پٹک رانجــھا نا عشق ٹی

ہر لفظے زبان تِسک نا عشــــق ٹی نسیم
اَنتس کہ خَنا سُـــوچا لِکــھا نا عشق ٹی

فـــــرمان نســــیم

بلوچ یکجہتی کمیٹی شال نا پارہ غان ہوشاپ ویل نا ردئٹ کوئٹہ پریس کلب نا مون آ اسے برانزی مچی اس اڈ تننگا۔ دا برانزی مچی ٹی چنا، زالبول، پیرنگا تون اوار چندی ورناک اوار ئسر۔

وائس فار بلوچ مسنگ پرسنز نا وائس چیئرمین ماما قدیر بلوچ، بلوچ وومن فورم نا آرگنائزر زین گل بلوچ، بیگواہ غا سعید نا لمہ، بیبرگ بلوچ گپ و تران کریر۔

تران کروک آک تینا خیال آتا درشانی کریسہ پاریر کہ ہوشاپ ویل نا اخس کہ مذمت کین ام کم ءِ۔ ریاست نا سیکیورٹی کارندہ غاک ہرا بیدادی تے پنجاہ سال مست بنگلہ دیش ڈھاکہ ٹی کریر ہمو بیدادی تے ریاست و اونا سیکیورٹی کارندہ غاک بلوچستان ٹی کننگ ءُ، ہوشاب ٹی دہ سالہ چنا تون بے دادی کننگ ہموفتان اسٹ ءِ۔

او مونی پاریر کہ دا تنیا اسے سیکیورٹی کارندہ اسینا یا اسے بندغ اسینا ڈو اف بلکن دا ڈو غٹ ریاست و سیکیورٹی ادارہ غاک کرینو۔ اسے ایف سی نا کارندہ اس لیویز نا دوٹی تننگا دا بیدادیک ایسر مفسہ بلکن داڑکن غٹ سیکیورٹی نا کارندہ غاتون اوار ریاست ءِ تینا سوچ ءِ بدل کروئی و بلوچ تون ظلم و جبر ء بند کروئی ءِ۔

یاتی مرے منہ دے مُست ہوشاپ ٹی ایف سی نا کارندہ اس امیر مراد پنی ءُ ورنا اسیتون جانی بے دادی کریسس ہرانا برخلاف غٹ علاقہ والاک روڈ بند کریسہ برانزی مچی کریر اوکان گڈ دا ویل نا خلاف کیچ، گوادر، کوئٹہ پین کہی جاگہ غاتیٹی برانزی مچی مننگ ءِ۔ دا برانزی مچی تیٹی دا ویل نا خلاف و ریاست و اونا سیکیورٹی کارندہ غاتا برخلاف اُلس تینا سوختئی نا درشانی تے کننگ ءُ۔

بلوچستان نا ضلع کیچ نا بنجائی شار تربت نا علاقہ کوشک ٹی بجلی نا بند کننگ نا برخلاف علاقئی مخلوک نا ارٹمیکو دے ہم برانز برجاء مس۔ برانز کروک آک چاہ سر کراس روڈ آ ٹیر ہشیسہ و خل تخیسہ ٹریفک کن ہڑاند کریرـ

علاقئی مخلوک کیسکو کوالخوا و حکومت نا برخلاف نعرہ خلیسہ پوروی وڑ ئٹ بجلی نا ملنگ نا خواست کریر۔

دا وخت آ برانز کروک آک پاریر کہ کوشک تربت نا اسہ شاری علاقہ ئسے، بھاز باسنی و رمضان المبارک ٹی ننا کنڈا بجلی نا 11 ہزار وولٹ نا تار کاٹ کننگانے۔ ہراڑان تدوکا پانزدہ دے ئنا سے بجلی اف، نن روچئیک، چناک و زالبول آک باسنی ٹی عزاب اُن۔

او پاریر کہ اُرا تیٹ صاف ءُ دیر اف، باملنگ و سئور ہم زیمی ءِ، 11 ہزار وولٹ نا تار ءِ کاٹ کننگ و ٹرانسفارمر بند کننگ آن بل مچ کروک آ صارفین آک ہم زیمی مرور ولے دا غیرآئینی عمل ئسے۔

دا وخت آ تحصیلدار شیر جان دشتی و ایس ڈی او کیسکو مہیم بلوچ برانز آ بسر و برانز کروک آتو مذاکرات کریسہ یانزدہ ہزار وولٹ نا تار ءِ خلیسہ غیرقانودی کنکشن تے کاٹ کننگ نا فیصلہ کریر۔

تحصیلدار شیرجان، اڈیشنل ایس ایچ او روشن و ایس ڈی او کیسکو مہیم بلوچ نا بجلی ملنگ نا یخین تننگ آ برانز کروک آک تینئٹ ہڑاند آتے مر کریسہ ٹریفک یلہ کریر۔

ننا بندی تا قصہ ئے ننا بندیک نیتونو
امو بے مٹ منٹ اسر امو چندیک نیتونو

اموتے کلے نن چانہ پنٹ رنگٹ دروشم اٹ
اراتا مول دا پاہک جہی ہندیک نیتونو

امو بسر جھلٹ چھر اٹ دتر تے شولسہ تینا
کسر نا دنز تا پاہک امو ٹھپیک نیتونو

ارک ننتو سلیس انتس ارک نیتو رسینگا انت
ننا بھاتی تایاداکو ننا کپیک نیتونو

امر ای جو تفر نیتو امر جی پاو جی جی کیو
کنا کل بشخ انا منظور امو ٹیکیک نیتونو

پروفیسر منظور بلوچ

کوئٹہ نا سرینا ہوٹل اٹ مروک آ کار بمب تراک ئٹ پنچ بندغ مرگ نا گواچی و بھازاک ٹپی مسونو۔ تراک نا ذمہ واری ءِ تحریک طالبان پاکستان ارفینے۔

بلوچستان نا دارالحکومت کوئٹہ ئٹ چار شمبے نا نن آ دا تراک سرینا ہوٹل نا پارکنگ ئٹ مس ہراٹی پنچ بندغ مرگ نا گواچی و دوانزہ پین ٹپی مسر۔ ہندی وخت آ نن نا کم و وَد یانزدہ بجہ غا مس۔

پولیس کوالخوا تا ردئٹ پاش اندن گمان مریک کہ تراک نا مواد آک کاڑی اسیٹی تخنگاسر۔ مرگ نا گواچی مروک آتیٹ اسہ فرنٹ لائن منیجر و اسہ ہندی پولیس کانسٹیبل اس ہم اوار ءِ۔ ٹپ تے ہندی ہسپتال تیا دننگانے۔

ہندی ٹی وی چینل آک دا تراک آن گڈ دمدستی تون ندارہ تے شینک کریر، دافتیٹ پارکنگ ئٹ بُن ہلوک کار تے ہم خننگ مریک۔

دا جلہو آن گڈ زوت صوبائی وزیر داخلہ ضیاء اللہ اسہ پریس کانفرنس اس کرے و پارے “دا دہشتگردی نا تدینی تیٹ تینٹ ننا بندغ آک اوار ءُ۔”

حوال تا ردئٹ دا تراک اندنو وخت ئسے آ مس ہراتم چینی سفارت کار کوئٹہ نا دورہ آ ئس۔ واہم صوبائی وزیر داخلہ میر ضیاء اللہ نا پاننگ ئس کہ تراک نا وخت آ چینی سفارت ہوٹل اٹ اَلو بلکن کوئٹہ کلب ئٹ ساڑی ئس۔ او دا ہم پارے کہ تراک آن گڈ چینی سفیر تون اونا اوڑدئی مس ہرا گچین ءُ موڈ اسیٹی ئس۔

کوئٹہ: سرینا ہوٹل اٹ بم تراک

بلوچستان نا دارالحکومت کوئٹہ ئٹ پنی آ سرینا ہوٹل ئٹ بم تراک نا سوب آن بھازاک ٹپی و مرگ نا گواچی مسونو۔

بنائی حوال تا ردئٹ تراک ہوٹل نا پارکنگ اٹ مسونے ہراڑان بھازا گاڑی تے نسخان رسینگانے و خاخر لگانے۔#TBPNews | #Quetta pic.twitter.com/TGXlqhmRwM

— The Balochistan Post – Brahui (@TBP_Brahui) April 21, 2021

کوئٹہ ئٹ ہرا سرینا ہوٹل ئٹ دا تراک مس او دا شار نا اسٹ آ فائیو اسٹار ہوٹل ءِ و داڑے بروک آک زیات پیشن نا سیل و سوات کروک آک انداڑے ہندی مریرہ۔ سیکورٹی نا ردئٹ دا بھاز حساس ءُ علاقہ ئسے۔ اندا ہوٹل نا مون آ کوئٹہ نا فوجی چھاؤنی ءِ، اندن داڑتون بلوچستان اسمبلی ءِ و خڑک آ ریاستی ہوئی کورٹ ءِ۔

پاکستان نا رکھ خلنگوک شدت پسند تنظیم تحریک طالبان دا جلہو نا ذمہ واری ءِ قبول کرینے۔ دا گروپ حوالکاری ادارہ روئٹرز ءِ رادہ کروک اسہ کلہو اسیٹی پارے “دا اسہ وت کش جلہو اس ئس ہراٹی ننا اسہ وت کش بمبار اس مواد آن پُر اسہ کار ئسے ہوٹل نا تہٹی کاریم ئٹی ایس۔