نصیر کبدانی لبزانکی دیوان خاران نا پارہ غان بلوچی بولی نا پنی آ شاعر و ادیب عطا شاد نا یات اٹ اونا بیست و چارمیکو کذیت نا دے نا ردئٹ اسہ مجلس اس اڈ تننگا۔

دا مجلس مسہ بشخ ٹی ئس۔ اولیکو بشخ ٹی شکور زاہد، شمیم شاہ جی، جلال فراق، زبیر شاد و سید حق نواز شاہ عطاء شاد نا زند و شاعری نا بارہ ٹی تینا خیال آتا درشانی کریر۔

ارٹمیکو بشخ ٹی مجلس نا گچین آ مہمان بلوچستان نیشنل پارٹی نا ضلعی صدر میر محمد جمعہ خان کبدانی، نصیر کبدانی لبزانکی دیوان نا پوسکنا گچین مروکا عہدیدار آتیان سوغند ارفے۔

مسٹمیکو بشخ ٹی مشاعرہ اس اڈ تننگا ہراٹی خاران نا شاعراک تینا شعر آتے بنفیر۔

مجلس نا ایسر ٹی گچین آ مہمان میر محمد جمعہ کبدانی و نصیر کبدانی لبزانکی دیوان خاران نا پوسکنا گچین مروکا کماش قیوم سادگ تینا خیال آتا درشانی کریسہ پاریر کہ عطاء شاد نا ادبی کاریم آک کس آن ڈھکوک افس، عطاء شاد نا وڑ انگا شاعر، ادیب و مفکر راج  و بولی اسینا پجار مریرہ ہرافتا سوچ و خیال آتے صدی تسکان یات کننگا مریرہ۔

او مونی پاریر کہ خاران ٹی ادبی مجلس آتا اڈ تس اسہ خوشی نا ہیت ئسے، اُلس نا است بڈی تننگ دا پروگرام آک گیشتر جوان مریرہ۔

مجلس نا گڈ سر ٹی احمد مہر، حسرت خارانی، شکور زاہد، مسرور شاد، قیوم سادگ، حبیب دانش، زبیر شاد، غنی حسرت، لیاقت ادا، ماجد جمیل، کلیم ارمان، مومن مزار، اسلم سید، مقبول بسمل، ممتاز ارمان، شناس بلوچ، مسعود پنڈگ و ایلوفک تینا شعر آتے بنفیر ۔

فائل فوٹو

گورنمنٹ گرلز مڈل سکول ساکران ٹی ماڑی بد آ حالیت ٹی ءِ۔ خوانندہ و استاد آک خلیس و بیم نا گواچی ءُ، باز بھلو جانی نسخان نا خلیس ءِ۔

حوال آتا ردئٹ لسبیلا نا علاقہ ساکران ٹی گورنمنٹ گرلز مڈل سکول نا ماڑی نا بد حال مننگ نا سوب آن خوانندہ و استاد آک بھاز فریشانی و خلیس نا حالیت ٹی ءُ دا خلیس نا حالیت ٹی خواننگ و خوانفنگ زیمی ءِ۔

سکول ٹی لمہ باوہ تا کمیٹی (پی ٹی ایس ایم سی) راہشون آک یک شمبے نا دے پاریر کہ حکومت صوبہ ٹی تعلیمی ایمرجنسی خلیسہ خواننگ ءِ مونی دننگ نا دعویٰ کیک ایلو کنڈ آ لسبیلا ٹی خواننگ نا ادارہ غاک تباہ و ماڑیک تا بد حال ءُ۔

اوفتا پاننگ نا کہ پن کروک سکول نا ماڑی نا پلاسٹر نا ٹکڑ آتا تمنگ آن خوانندہ آک ٹپی مسونو ۔

اوفتا پاننگ ئس کہ بھاز افسوس و خلیس نا ہیت ئسے کہ گورنمٹ گرلز مڈل سکول ساکران آ پامداری مننگ اف۔ وزیراعلی بلوچستان جام کمال خان، ڈپٹی کمشنر لسبیلہ حسن وقار چیمہ و محکمہ تعلیم نا بڑز کوالخاہ تے آن خواست کریر کہ دا ویل نا زی آ دمدستی ئٹ گام ارفنگے۔

بلوچ اسٹوڈنٹس ایکشن کمیٹی کراچی زون نا صدر الیاس بلوچ گدرینگوک آ دے است ئنا دورہ نا سوب آن کذیت کرے۔
زونل صدر نا بیران مننگ آ تنظیم نا پارہ غان مسہ دے سوگ نا پڑو کریسہ تینا بیان ٹی مونی پارینے کہ تنظیم اسے مخلص، شعور یافتہ و فکری باسک ئسے آن محروم مس۔ الیاس بلوچ نا جہد اونا قربانیک ستا کرزہ ہرافتے تنظیم ہر وخت یات تخو۔

بیان ٹی مونی پاننگانے کہ سنگت الیاس بلوچ نا مخلصی و جہد تنظیم نا کتاب کاروان نا پنٹ کتاب ٹیکی کننگ نا پروگرام آتیان خننگ بریک کہ ہراڑے او کراچی نا بلوچ علاقہ لیاری، ملیر و ماڑی اسکان کتاب ٹیکی کننگ نا کیمپ خلیسہ تنظیم ءِ فعال کرے۔

یاتی مرے الیاس بلوچ اسے خوانندہ ءُ ورنا اس ئس۔ اونا بنماسی تعلقداری بلوچستان نا علاقہ بیسیمہ آن ئس۔ کراچی ٹی ایل ایل بی کننگ ئس۔ گدرینگوک آ چار سال آن بلوچ اسٹوڈنٹس ایکشن کمیٹی تون ہمگرنچ ئس۔ دا وخت ٹی بی ایس اے سی کراچی زون نا صدر نا اوغدہ آ ئس۔

اسلام آباد ٹی بیگوا بلوچ آتا زالبول و چناک بین ہڑتالی کیمپ ئٹی شاری تے ارفیسہ گمگار کننگ نا رویہ نا ایسری نا خواست کننگ ءُ۔

کیمپ ئٹی 10 بیگوا بلوچ بندغ آتا خاہوت آک برانز آ توسنو اوفتیٹ بیگوا ڈاکٹر دین محمد بلوچ نا مسڑ سمی بلوچ ہم اوار ءِ، او مخلوق آن خواست کرے کہ او حق و انصاف کن توار ارفر، او پارے  وزیراعظم عمران خان آن ہم خواست کینا کہ او اوفتا مخلوق ءِ دمدستی وڑ ئٹ یلہ کننگ نا موْکل ایتے۔ 

زوت سال آتیٹ پاکستان نا جتا شار آتیٹ زورٹ بیگوا کننگ نا بر خلاف بین ہڑتال، برانز و  لانگ مارچ مریسہ کرینے، ولے دا رویہ ایسر مننگ نا جاگہ غا پین زیات مریسہ کرے۔

پاکستان ٹی بندغی حق آتا کمیشن نا مسکوئی سر کماش و عوامی نیشنل پارٹی نا مسکوئی راہشون افراسیاب خٹک ہم  جمعہ نا دے دا بین ہڑتالی کیمپ آ بس۔

دا وخت او پارے کہ زورٹ بیگوا کننگ بندغی زند نا برخلاف ڈو تیٹ بریک دا دود نا ایسری مرے، دا قانود آن چھپ ءِ۔

او پاکستان نا ڈکوک ایجنسی تا پن ءِ ہلینگ آن بیدس پارے کہ، “ای سرپد مریوا کہ اینو یا پگہ او بندغ آتا زی آ المی قانود نا رد ئٹ کارروائی مرو، بھاز طاغت ور بندغ آک ہم اسہ دے قانود نا دوٹی بریرا۔

داڑان مالو پنج شمبے آ پشتون تحفظ موومنٹ نا راہشون و باسک راجی اسمبلی محسن داوڑ ہم بین ہڑتالی کیمپ آ بس و زیمی تون اُست ہسونی نا درشانی کریر۔

درو پشتون تحفظ موومنٹ نا راہشون منظور پشتین برانزی کیمپ آ بس و خاہوت آتیتون اوڑدئی کرے۔ دا وخت اوڑان پی ٹی ایم نا باسک آک تُد ئسر۔

منظور پشتین زوراکی نا بیگواہی تیا حکومت پاکستان آ نغد کاری کرے و بلوچ و پشتون تا اوار جہد کننگ نا خیال آتا درشانی کرے۔ وی بی ایم پی نا نصراللہ بلوچ اوڑتون امنائی کریسہ پارے کہ ہر مظلوم راج تون آئین نا تہٹی مریسہ جہد کن تیار اُن

بلوچستان نیشنل پارٹی نا راہشون و باسک صوبائی اسمبلی ثناء بلوچ نا پاننگ ءِ کہ مالو بلوچستان نا ساحل وسائل و داسا بلوچ آتے تینا نمائندگی نا حق آن ہم دو سلوئی تمنگ ءِ، اینو سینٹ نا سیٹ آک ہنار پگہ صوبائی و بنجائی حکومت آن ہم پیشن مرون۔

سینٹ آف پاکستان ہم سیاسی چیمبر اس سلتو بلکن سینیٹ آف کامرس، بزنس، تجارت و ایلیٹ کہ پن کننگ مرے۔

دا خیال آتے تدوکا دے تینا بیان ئٹ کرے کرے۔ ثناء بلوچ نا پاننگ ئس کہ مالو تو بلوچ آک تینا ساحل و وسائل آتا کوزہ نا بابت ہیت کریرہ داسا تو نمائندگی نا حق آن ہم دو سلوئی تمنگ ءِ تا ہرا بلوچستان نا دیر ءِ کنگنے، غیرت نا خواست ء کریسہ دا نا انصافی نا مون آ سلر۔

ثناء بلوچ نا پاننگ ءِ کہ دا ننا بے بختی ءِ کہ اینو بلوچستان بیرہ کاغذ آتے اسکان ءِ۔ غریب فنکار آتا کمک کہ کورونا نا ردئٹ 40 کروڑ نا رقم بینک آتے ئٹ تخوک ءِ ولے دا کل آن نن باخو اسیکن محتاج اُن، شش ارب روپئی بلوچستان نا کرونا نا ردئٹ خرچ کننگا ہرا بیرہ ڈبہ و بے فائدئی تا گواچی مسر۔

عطاء شاد

نومبر 1939، 13 فروری 1997

تو پہ سرانی گڈگ ء زندء ھیالاناں کشے
پہ سندگ ء داشت کنے پلان چے بو تلانی ء

بلوچ ادب ٹی ہرا وختا کہ شاعری، فکر و فن نا ہیت مریک ہموڑے عطاء شاد نا پن دوی آ بریک۔ بلوچی بولی و ادب مریک یا کہ اردو بولی و ادب تون تعلقدار دنو ادیب، شاعر و زانت کار اس اف کہ ہرا عطا شاد، اونا شاعری و اونا فکر و فن آن واخوب افس۔

اردو بولی نا ادیب و نغدکار ڈاکٹر وزیر آغا عطاء شاد نا و اونا فکرو فن نا بابت ٹی تینا خیال آتا درشانی کریسہ  پائک “عطا شاد وختس بلوچی بولی نا نظم آتیٹی عشقیہ داستان آتا حوالہ ایتک، وختس بلوچستان نا آثار چلتن و بولان نا ام ذکر کیک، ولے اونا شاعری ٹی بلوچستان نا سر زمین تون است ئنا حب اٹ مہر و مابت خننگک بریک ہراٹی شار ، خلق، باغ،  خن خنوکا خروسی، کشت و کشار آتا ندارہ اف بلکن اسے اندنو خلی ءُ ڈیہہ ئسے نا ندارہ ءِ ہرا باسنی ٹی اسل جوش کیک، یخ ٹی سو تڑوکا یخ امبار  یخ تفک۔”

عطا شاد نومبر 1939 ٹی تربت نا خلق سنگانی سر ٹی خواجہ لال خان نا اُراٹی ودی مس۔ اونا پن محمد اسحاق تخنگا ولے محمد اسحاق آن عطا شاد امر جوڑ مس دا کسہ ءِ عطا شاد تینا انٹرویو اسیٹی بیان کریسہ پائک کہ ہرا وختا ای اسکول آ ہناٹ گڑا اسکول ٹی کنتون اوار پین ام اِرا مُسہ محمد اسحاق پنی ءُ چنا ئسر اندا سوب آن استاد کنا پن ءِ محمد اسحاق آن عطا محمد تخا “پدا شاعری اودے عطا محمد آن عطا شاد جوڑ کرے۔

عطا شاد تینا بنماسی خواننگ ءِ ہائی اسکول تربت آن کریسہ 1956 آ مونی خواننگ کن ہائی اسکول پنجگور آن دئے جماعت پاس کرے۔

ایف اے 1959 ٹی گورنمنٹ دگری کالج تربت (اینو پگہ اونا پن عطا شاد ڈگری کالج ءِ) آن پاس کریسہ اندن گریجویشن 1964 ٹی گورنمنٹ ڈگری کالج کوئٹہ آن کرے۔

عطا شاد اسکول نا وخت آن شاعری ءِ بندات کرے ولے اونا بنداتی شاعری اردو بولی ٹی ئس۔

عطاد شاد نا اولیکو شاعری نا کتاب “سنگاب” 1985 ٹی چھاپ و شینک مس۔ اندن ارٹمیکو اردو شاعری نا کتاب اونا کذیت آن پد ” برفاگ” نا پنٹ چھاپ مس۔

ہرا وختا کہ نن عطا شاد نا اردو شاعری ءِ خواننہ گڑا اوٹی ام ننے بلوچ رنگ، بلوچ لوز آک دو بریرہ۔

عطا شاد بلوچی، اردو شاعری کننگ تون اوار اوار بلوچی بولی و ادب نا زی آ پین چندی پٹ و پولی کتاب نوشتہ کرینے دنکہ اردو، بلوچی لبز بلد “اردو بلوچی ڈکشنری” نا پنٹ 1972 ٹی چھاپ و شینک مس۔ اندن پٹ و پولی کتاب “دْرین” بلوچی بولی نا متکنا شعر آتے مٹ و بدل کریسہ اسے جاہ کرینے۔ جوان سال بگٹی نا کلام آتے اسے جاہ کرے ہرا “گفتار” نا پنٹ 1970 چھاپ مس۔ بلوچی پوسکنا دور ئنا شاعر آتا شاعری ءِ اسے جاہ کریسہ “گشین شاعری” نا پنٹ چھاپ و شینک کننگا۔

“شپ، سحار، اندیم”، روچ گر” دا عطا شاد نا بلوچی شاعری نا کتاب آکو۔ اندن خواجہ افضل مراد عطا شاد نا اردو شاعری اسے جاہ کریسہ “جب نیند ورق الٹے گی” نا پنٹ چھاپ کرینے۔ بلوچی اکیڈمی اونا کلیات ءِ “گلزمین” نا پنٹ چھاپ کرینے۔

عطا شاد شاعری تون اوار سرکاری بھلا بھلا اوغدہ غاتے کاریم کرینے۔ 1962 ٹی او اولیکو اوار ریڈیو پاکستان کوئٹہ غان کاریم کننگ نا بناء کرے۔ 1969 ٹی محکمہ اطلاعات و نشریات پاکستان نا پارہ غان انفارمیشن آفیسر نا حیثیت ٹی ڈھاکہ بنگلہ دیش آ راہی کننگا۔

29 جون 1972 ٹی صوبہ نا ڈائریکٹر تعلقات عامہ نا اوغدہ آ رسینگا۔ اندن 1973 ٹی پاکستان آرٹس کونسل کوئٹہ نا ایگزیگٹو ڈائریکٹر جوڑ مس۔ دا اوغدہ غاتون اوار اوار سیکرٹری گوازی، تقافت، جنگلات، تعلقات عامہ تون اوار پین چندی محکمہ غاتا سیکرٹری ام رہینگا۔

بلوچی و اردو بولی نا دا پنی آ شاعر و زانت کار 13 فروری 1997 نا دے کذیت کرے۔

کوہساروں کی  عطا  رسم  نہیں خاموشی
رات سو جائے تو بہتا ہوا چشمہ بولے

بلوچ بیگوا بندغ تا خاہوت آک نیشنل پریس کلب اسلام آباد نا مونا برانزی کیمپ ہڈ تسونو، برانز ٹی بلوچستان نا جتا علاقہ آتیان تعلقدار بیگوا بندغ آتا دئے خاہوت اوار ءُ۔

بیگوا بندغ آتا خاہوت آک تدوکا دے  اسلام آباد آ سر مسوسر ہراڑے اوفک برانزی کیمپ ہڈ تسر، وائس فار بلوچ مسنگ پرسنز نا چیئرمین نصراللہ بلوچ ہم برانز کروک آتیتون اوار ءِ۔

بیگوا بندغ آتا مخلوق نا پاننگ ءِ کہ او بیگوا بندغ آتیکن ہڈ تروک کمیشن نا رویہ و کارکڑد تون اوار سال آتیان بیگوا بندغ آتا یلہ کپرنگ نا برخلاف برانز ریکارڈ کننگن۔

تدوکا دے خاہوت والا تے  پریس کلب نا مونا برانزی کیمپ خلنگ آن مست پولیس نا کنڈان سختی تو مون تروئی تما اوکان گڈ معاملہ ایسر مس و خاہوت والاک برانزی کیمپ خلکر۔

پشتون تحفظ موومنٹ نا راہشون و باسک اسمبلی محسن داوڑ، نیشنل پارٹی نا سینیڑ اکرم دشتی، پشتونخواہ ملی عوامی پارٹی نا سینٹر عثمان کاکڑ و نامور صحافی حامد میر کیمپ آ بسر و بیگواہ بندغ تا خاہوت آتیتون اُست ہسونی نا درشانی کریر۔

محسن داوڑ دا رد ئٹ پارے ای بلوچ بیگوا بندغ آتا خاہوت والا تا برانری کیمپ آ ہناٹ ہر تینا آتا تیان بھاز  مور بسونو ہرفتا خواست ءِ کہ اوفتے پار کہ اوفتا بندغ آک زندہ ءُ یا خلینگانو۔

محسن داوڑ پارے کہ زورٹ بیگوا کننگ ءِ ڈو پاننگوئی تمو، نن دا عمل نا بر خلاف تینا  کوشست ءِ برجاہ تخون۔ نیشنل پارٹی نا اکرم دشتی نا پاننگ ئس کہ تیوہ آ سیاسی باسک آتے  یلہ کیر اگہ اوفتیا تومت ارے گڑا اوفتے عدالت آتیٹ اتیر۔

وائس فار بلوچ مسنگ پرسنز نا چیئرمین نصراللہ بلوچ  ٹی بی پی ءِ پارے کہ بیگوا بندغ آتا خاہوت آک اسہ امیت اس تخیسہ اسلام آ سر مسونو کہ مننگ کیک بنجائی حکومت، وزیراعظم و ادارہ غاک اوفتا ہیت ءِ خفتورر و بندغی حق نا ادارہ غاک خاہوت آتا توار ءِ جہان ئٹ سر کیر۔

نصراللہ بلوچ  پارے کہ ننا خواست دادے  کہ زورٹ بیگوا کننگ ایسر مرے و دا ویل ءِ قانودی وڑئٹ ایسر کیر۔

خاہوت آکک بیگوا بندغ آتیکن کمیشن نا کارکڑد آن است جم افس، اوفتا پاننگ ءِ کہ کمیشن خواست آتا بننگ نا پن آ وخت گدریفک، اندن بھاز آ خاہوت آک دا تومت ءِ خلینگ ءُ کہ کمیشن ٹی خواست آتے بننگ نا وخت آ جتا وڑ ئٹ اوفتے بے شرف کننگک، ہر وار اوفتے جتا کاغذ و خن خنوک شاہد ہتنگ نا پن آ پین  تاریخ تننگک۔

نصراللہ بلوچ نا پاننگ ءِ کمیشن نا گواچنی مسخت زورٹ بیگوا مروک بندغ آتا یلہ کننگ ٹی کمک تون اوار دافتیٹ اوار بندغ تا بابت سفارش تے مونی ہتنگ ئس ولے 2012 آن کمیشن ٹی بیرہ پن نا کیس تے بننگ مریسہ ءِ، اسہ بندغ اس ہراکا یلہ مرے گڑا کمیشن نوشتہ کیک کہ دا کیس ایسر کننگا۔

دی بلوچستان پوسٹ بیگوا بندغ تا کمیشن نا رد ئٹ بلوچ نیشنل موومنٹ نا بنجائی حوالکار سیکریٹری دلمراد بلوچ تو ہیت کارے گڑا اونا پننگ ئس کہ پاکستان ٹی کمیشن نا اسہ تاریخ ئسے ہرا حمودالرحمن کمشین آن بناء مریک، اینو اسکا اسہ کمیشن ئسے آ عمل کننگ مُر ءِ بلکن دادے خلقت نا مونا ہم ہتپسہ، ہرا وخت ہیت بلوچستان نا مرے گڑا دا کمیشن اوکان زیات بے اثر و بے نتیجہ مریک۔

دلمراد بلوچ نا پاننگ ءِ کہ ہرا وخت خضدار ٹی اشتماعی قبر آک خننگار گڑا جسٹس مسکان زئی نا سر کماشی ٹی کمیشن ہڈ تننگا، دا کمیشن ریاست ءِ بچفیسہ شفیق مینگل ءِ دانا ذمہ وار کرے، ایلو کنڈان شفیق مینگل اینو ہم آجو چرینگک بلکن او تدوکا گیچن کاری ٹی بخش ہلکونے۔

دلمراد بلوچ نا پاننگ ءِ کہ بیگوا بندغ  تا کمیشن بیرہ اسہ نشان تس ئسے، تاکن جہانی برادری یا جہانی ادارہ آتے نیشان تننگے کہ ریاست دا بندغی بحران ءِ ایسر کننگ نا کوشت ٹی ءِ، دا کمشین نا گواچن مسخت ریاست نا جنگی ڈو آتے ڈھکنگ و دانا تیوہ آ عمل آن ریاست ءِ ذمہ وار تینا دو خلاس کننگ ءِ، تاکن ریاست آ ہیت بف۔

اسلام آباد ٹی بیگوا بندغ تا خاہوت آتا برانز  ایلو دے ہم برجاہ مس، ہراٹی جتا ہر تپہ نا بندغ آک بسر، برانز کروک آتا پاننگ ءِ کہ دا برانز پنج دے اسکان برجاہ مرو و 14 تاریخ آ اسہ برانزی مسی اس ہم کننگو اندن  راجی حوالکاری میڈیا نا سائٹ آ بیگوا بندغ آتا رد ئٹ کمپئین اس ہم برجاہ ءِ۔

بلوچستان آن زورٹ بیگوا مروک بندغ آتا خاہوت تا کنڈان اینو پاکستان نا بھلا شار اسلام آباد پریس کلب نا مونا بین ہڑتالی کیمپ ہڈ تننگا، بلوچستان نا جتا علاقہ آتیان 10 بندغ آن زیات بیگوا بندغ آتا خاہوت والاک برانز ریکارڈ کننگ ءُ،
بیگوا بندغ تا خاہوت والاک تینا مخلوق نا یلہ کننگ کہ بے یلہ کننگ نا برخلاف اینو آن اسلام آباد پریس کلب نا مونا تینا برانز ءِ برجاہ تخور۔

اسلام آباد ٹی ہڈ تروک بین ہڑتالی کیمپ ٹی بیگوا ڈاکٹر دین محمد بلوچ نا مسڑ  سمی بلوچ، بی ایس او آزاد نا بیگوا  راہشون شبیر بلوچ نا ایڑ، بیگوا حسان و حزب اللہ نا خاہوت، بیگوا جہانزیب نا باوہ، متحدہ عرب امارات آن بیگوا راشد حسین نا لمہ و کراچی آن زورٹ  بیگوا مروک نسیم بلوچ و سعید بلوچ نا خاہوت تون اوار ایلو بیگوا بندغ آتا خاہوت آک ہم اوار ءُ۔

بیگوا ڈاکٹر دین محمد نا مسڑ سمیی بلوچ  ٹوئٹر آ نوشتہ کرے کہ ‏نن بیگوا بندغ تا خاہوت آک اسلام آباد آ سر مسونن بیگوا بندغ نا کمیشن نا رویہ نا برخلاف و وزیراعظم پاکستان عمران خان نا بیگوا بندغ آتے یلہ کننگ نا بیان آ اینو آن نن اسلام آباد پریس کلب نا مونا بین ہڑتالی کیمپ خلون۔

سمی بلوچ اسلام آباد ٹی ساڑی ہر تپہ نا بندغ آتیان خواست کرے کہ او بیگوا بندغ آتا خاہوت والا تا کیمپ ئٹی اوار مریسہ زورٹ ئٹ بیگوا کروک آتے انصاف تننگ ٹی کمک کیر۔

اندن سندھ نا دارالحکومت کراچی ٹی وائس فار بلوچ مسنگ پرسنز تا برانز 4220 دے پورو مس، اواری نا درشانی کروک آتیٹ، کراچی پریس کلب نا صدر جمیل فاضلی، مسکوئی صدر امتیاز فاران، سعید سربازی بلوچ و ایلو بندغ آک ہم اوار ئسر۔

وائس فار بلوچ مسنگ پرسنز نا وائس چیئرمین ماما قدیر بلوچ دا وخت آ ہیت کریسہ پارے ہرا حالیت ئٹ سیاست بے سہب مریسہ بننگ ءِ اینو امو  سیاسی ٹولیک و سیر آ مخلوق و ڈو کار بندغ آک  لس مخلوق نا است خواہی تے بہا کننگ ءُ و ہمو بندغ آتیان است ترخ و بیزار مسونو۔

بلوچ اسٹوڈنٹس ایکشن کمیٹی نا مسکوئی آ وائس چیئرمین فیروز بلوچ اسہ سال ءُ 10 توہ آن پد یلہ کننگا۔

فیروز بلوچ آئی ٹی یونیورسٹی آن انجینئرنگ کریسہ بلوچستان یونیورسٹی ٹی ایم اے بلوچی کننگ اس ہرادے تینا سیال جمیل بلوچ تون اوار 29 مئی 2019 آ پنجگور آ ہننگ نا وخت آ قلات نا علاقہ آن زبردستی بیگواہ کننگا ہرا اینو یلہ مریسہ تینا اُراغا رسینگا۔

یاتی مرے بیگواہ بلوچ آتیکن اوفتا خاہوت آک اینو پاکستان نا بھلا شار اسلام آباد ٹی ام تینا بندغ آتا یلہ کننگ کن برانزی کیمپ خلکنو ہرا برجاء ءِ۔

خالد پرکاڑی

نوشت: زرک میر

دی بلوچستان پوسٹ

خالد پرکاڑی اسے اندن ءُ ورنا سے ہرا نا براہوئی شاعری اسہ چنکو وخت ئسے ٹی بھاز دوست تخنگا، انتئے کہ اونا شاعری ٹی خیالاک سادہ انگا لوزاتیٹ کُڑمبی تخرہ اسہ جتاؤ دروشم اس ایترہ، اندا سوب آن  خالد پرکاڑی براہوئی شاعری نا پِڑ آ ایلو براہوئی شاعر آتیتون اوار اوار تینا تخلیقی پند ءِ خلّنگ ئٹی ءِ۔ کنے ہم ایلوفتے آنبار خالد پرکاڑی نا شاعری بھاز وڑک، انداڑان ای اونا شاعری آن بھاز چس ہلیوہ خوانیوہ۔ مزہ نا ہیت دا کہ اسہ دے خالد کنا و شیتل نا زی آ ہم منہ بند نوشتہ کرے تو کنے عجب ءُ خوشی اس رسینگا کہ براہوئی نا دا گچینا شاعر کنا مہر ئنا کسہ ءِ اخس دوست تخک۔ کنے ہڑدے اندا ڈکھ اس کہ دا ورنا وا دُننگا  گچینا خیال آتا خواجہ ءِ اسہ جُوان ءُ روزگار اس رسینگے ہراڑے او تینا زیبا انگا خیال آتے آسراتی ٹی درشان کننگ کے و براہوئی ادب کن تخلیق کے، ولے شوم آ بخت کہ اسہ دے بنگُن کہ خالد جان ءِ کینسر ءِ۔ کنے ایلو سنگت آتے آنبار بھاز ڈکھ مس کہ دا ورنا داسکا تینا زند ئنا چس ءِ ہلنگ کتو کہ او دا بلّا بیماری تون اختہ مس، ولے سنگت آک اسہ بھلو جُہد ئسے نا بناء کریر و چندہ  کننگ ئٹ تمار ہراڑان مخلوق نا کنڈان اسہ بھلو جوان ءُ جوزہ اس مونا بس و بننگ ءِ۔

خالد جان نن بے بخت ءُ قوم ئسے اُن، نن داسکا چندہ کینہ و نم کونا ورناتے علاج کرفنہ، ننا دا وسائل آک نم کونا ورناتیکن کاریم بفسہ انتیکہ دافک ننا دوٹی افس۔

نے زو اس جوڑ مروئی ءِ، نے زو اس ولدا بروئی ءِ، نے زو اس ولدا براہوئی شاعری کروئی ءِ کہ دا راج ءِ نم کونا شاعر و گچین ءُ خیال تخوکو ورناتا بھاز خواست ءِ، گُڈ سرئٹ  منہ لوز نُما خذمت ئٹ پیش ءُ؛

بیماری ءِ اللہ درو
تف مُخ نی مر خالد ننا

لکھہ غزل فعلن فعل
زو ئس نی بر خالد ننا

نی سنگت اُس غُٹ شار ئنا
نیتو کسر خالد ننا

نیکن منہ خُلّاٹ لوز
اف تا  اثر خالد ننا

اف نا درک وڑپک اسُل
نن درپدر خالد ننا

 شیتل تونے زرّک سلوک
باور نی کر خالد ننا