بلوچستان ئٹ بیست چار گھںٹہ ئٹ جتا علاقہ تیٹ چار جلہو، تیوہ غاتا ذمہ واری تے بلوچ سلاء بند آجوئی خواہوک تنظیمک ارفیر۔

بلوچ لبریشن آرمی بلوچستان نا دارالحکومت کوئٹہ اٹ اینو یک شمبے نا دے مروک بم تراک نا ذمہ واری ءِ ارفے۔

بی ایل اے نا ترجمان جیئند بلوچ نادرست ہند ئسے آن ای میل نا کمک ئٹ بیان شینک کریسہ ذمہ واری ءِ ارفے، او پارے کہ بی ایل اے نا سرمچار آک اینو یک شمبے نا دے کوئٹہ نا علاقہ ہزار گنجی ئٹ سبزی منڈی نا ہند آ ریاستی ڈھکوک ادارہ نا اہم آ کارندہ حاجی آزاد خان مری ءِ اونا ہمراہ تیتون “وی بی آئی ای ڈی” تراک اٹ ٹک کرے، ہراڑان او تینا ہمراہ تیتون اوار خلنگا۔ دا جلہو نا ذمہ واری بی ایل اے ارفک۔

ترجمان پارے کہ حاجی آزاد خان مری پاکستانی فوج و ڈھکوک ادارہ آتا اسہ خاص کارندہ اس ئس، ہرا دژمن نا مخ تفی ئٹ بلوچ سرمچار آتا خاہوت ءِ تنک کننگ، جہد کار آتے دژمن نا مونا سلاء بٹنگ آ بیوس کننگ، غریب بلوچ آتا ڈغار تے کوزہ کننگ و بلوچ سرمچار آتا برخلاف ڈیتھ اسکواڈ ٹہیفنگ کون آ راجی غداری و گناہ تیٹ اوار ئس۔ آزاد خان مری نا زوت ڈو نیوکاہان ئٹ غریب مری بلوچ آتا ڈغار تیا کوزہ کننگ اوار ءِ۔

جیئند بلوچ نا پاننگ ئس کہ بلوچ لبریشن آرمی مالو ہم پامدار کریفینے کہ ہرا بندغ بلوچ تحریک نا برخلاف دژمن تون اوار سلوک مرو، او تینا بد حالیت نا ایسری کن تیار مرے و تیوی بلوچ آتے ہم دن انگا راج دژمن تیان خیالداری کچ ئسے اسکان مُر مننگ نا تڑی تننگانے۔ دننگا بندغ آتیا ہر جاغہ و ہر وخت آ جلہو مننگ کیک۔ اوفتیا جلہو نا سوب اگہ اوفتیتون اوڑدئی و خڑکی کروک کس لس بندغ اس نسخان ارفک گڑا او تینا نسخان نا ذمہ وار تینٹ ءِ۔

او پارے کہ دا ساہت آ بلوچ لبریشن آرمی دا المی سرپد مریک کہ اینو کوئٹہ ٹی مروک پی ڈی ایم نا مُچی نا بابت تینا ہیت ءِ مونا تخہ۔ پی ڈی ایم اندا کوزہ گیر ریاست نا ارٹمیکو کنڈ ءِ، ہرافتا دوک بلوچ نا دتر آن رنگی ءُ۔ پی ڈی ایم ئٹ اوار کم و ود تیوہ غا وفاقی جماعت آک تدوک وخت ئٹ بلوچ نسل کشی ئٹ اندن اوار مسونو، دنکہ اینو تحریک انصاف نا حکومت ءِ۔ اینو مسلم لیگ ن نا مریم نواز ءِ دنکہ بلوچ آتا مسیحا نشان تریسہ مونا ہتنگسہ ءِ، اونا باوہ نا ارٹمیکو حکومت نا وختا چاغی ئٹ ایٹمی آزموندئی کریسہ بلوچ سرزمین نا سینہ ءِ ہر و دِر کننگا و مسٹمیکو دور حکومت ئٹ اونا امنائی ئٹ ہزار آک بیگواہ و شہید کننگار و پیپلز پارٹی نا تدوکا دور حکومت ئٹ بلوچستان آن اجتماعی قبر آتا خننگ بناء مس، خل و چغل ایت نا پالیسی بناء مس و ڈیتھ اسکواڈ ٹہیفسہ بلوچ چاگرد آ گڈو کننگا۔

بلوچ ڈغار آ دا اواری نا مسخت بلوچ تون استخواہی آکہ بلکن اقتدار دوئی کننگے۔ پاکستان ئٹ ہرکس نا ہم حکومت مریک اوڑان دائسکان بلوچستان آ ہچ فرخ تمتنے۔ بلوچستان اسہ کوزہ مروک سرزمین ئسے، ہرا دا تیوہ غا سیاسی جماعت آتا امنائی ئٹ مون پہ مون فوج  نا کوزہ و کنٹرول ءِ۔ بلوچ آتا اسہ ہم دنو سیاسیی سیوت آن بدلی نا امیت تخنگ آمخ آتا جنت ئٹ مننگ ءِ۔ اسلام آباد ئٹ توفک ہرکس نا کہ دوٹی مرے بلوچ ہمون ٹک کننگ مریک و خون تا مریسہ کرو۔ بلوچ راج نا تینا پام و طاغت جُوان آ خونی نا گچین کننگ نا جاگہ غا، قتل و کوش آنا دو خلاسی و آجوئی نا پارہ غا بائدے مرے۔

جیئند بلوچ پارے کہ بلوچ لبریشن آرمی اسیکہ وا ہمو تیوہ غا ریاستی کارندہ غاتے پامدار کیک کہ او بلوچ راجی تحریک آجوئی نا برخلاف دژمن فوج نا مخ تفی ئٹ کاریم کننگو اوفک تینا راج دژمن کاریم تیان دو ارفر نئے تو دننگا تیوہ غا بندغ تا ایسری حاجی آزاد خان آنبار مرو۔

یاتی مرے درو آن بلوچستان نا جتا علاقہ جھل مگسی، تمپ، بولان و کوئٹہ ٹی چار جلہو مسونو۔ ہراڑے جھل مگسی ئٹ بلوچ ریپبلکن گارڈز ایف ڈبلیو او نا روڈ آ کاریم کروک ڈمپر ءِ بم تراک جلہو، تمپ ئٹ بلوچ لبریشن ٹائیگرز ایف ڈبلیو او و پاکستانی فوج آ سلاء بند جلہو، بولان ئٹ بلوچ لبریشن آرمی پاکستانی فوج نا پیادہ کارندہ تیا بم تراک و کوئٹہ ئٹ بلوچ لبریشن آرمی بم تراک نا جلہو تا ذمہ واری ارفیر۔

فنانشل ایکشن ٹاسک فورس (ایف اے ٹی ایف) پاکستان ءِ گرے لسٹ ئٹ برجاء تخنگ نا فیصلہ کرینے۔

ایف اے ٹی ایف ورچوئل اجلاس ٹی منی لانڈرنگ و ٹیرر فنانسگ نا برخلاف پاکستان نا گامگیج آتیا چمشانک شاغنگا۔

یاتی مرے کہ پاکستان نا پن جون 2018 آن فیٹف نا گرے لسٹ ٹی اوار ءِ، تدوکا سال فروری ٹی ایف اے ٹی ایف پاکستان ءِ جون اسکان گرے لسٹ ئٹی تخنگ نا فیصلہ کریسس۔

فنانشل ایکشن ٹاسک فورس نا باسک آتا کچ 37 ءِ ہراٹی امریکا، برطانیہ، چین، بھارت و ترکی تون اوار 25 ملک، خیلج تعاون کونسل و یورپی کمیشن اوار ءُ۔

تنظیم نا بنماسی ذمہ واریک جہانی پڑ آ منی لانڈرنگ و دہشت گرد آتا مالی کمک ءِ توننگ کن گامگیج کروئی ءِ۔

جہانی واچ لسٹ ٹی پاکستان نا پن اوار مننگ آن اودے جہانی کمک، وام و سرمایہ کاری بھاز اوننگ آن گزرینگوئی تمو ہراڑان پیشن نا سرمایہ کاری زیمی مرو و ملکی زرگزرانی آ منفی زہم تمو۔

یاتی مرے کہ داڑان مالو 2012 آن 2015 اسکان ہم پاکستان ایف اے ٹی ایف واچ لسٹ ٹی اوار ئس۔

دسمبر 2019 ٹی چین آن بناء مروکا کورونا وائرس دین ئنا سوب آن ہراڑے تیوہ آ جہان ئٹ 40 کروڑ مزور کاری ابدی کن ایسر مننگ نا گُمان ارے۔

اندن پوسکنا سروے تیان سما تمانے کہ بروکا وخت 5 سال ئٹی دین ئنا سوب آن مزور کار آتیٹ کاریم نا بدلی نا سوب آن 8 کروڑ 50 لکھ انسان مزور کار آتا جگہ ءِ روبوٹ آک الور ۔

حوال تروک ادارہ رائٹرز نا رد ئٹ ورلڈ اکانامک فورم (ڈبلیو ای ایف) نا کنڈان شینک کروکا پوسکنا پٹ و پول رپورٹ ٹی پاننگانے کہ ایلو پنج سال ئٹی 8 کروڑ 50 لکھ انسان مزورکار آتا جگہ ءِ روبوٹ مزور کار آک الور۔

رپورٹ نا رد ئٹ جہانی فورم نا کنڈان تیوہ آ جہان ئٹ 300 بھلا ادارہ و کمپنی تیٹ بروکا سروے آتیان خبر تمانے کہ ہر 5 آن 4 ادارہ تینا کاریم ءِ ڈیجیٹلائیز کننگ خویرہ۔

یعنی ہر پنچ آن 4 ادارہ اندا خوائک کہ ناجوڑی و ایلو ویل آتا سوب آن انسان مزور کاری آ امنائی کننگ نا جگہ آ روبوٹ نا خذمت آتے دوئی کبو۔

عالمی اکانامک فورم نا پاننگ ءِ کورونا نا دین آن مالو2007 و 2008 نا معاشی بحران آن گُڈ کمپنیک انسان آتا جاگہ آ روبوٹس و مشین آتیان کاریم الینگ بناء کریسر۔

داسکان کورونا آن گُڈ کاریم نا نوعیت بدلی مننگ آن گُڈ ایلو 5 سال یعنی 2025 اسکان تیوہ آ جہان ئٹ 8 کروڑ 50 لکھ انسان آتا جاگہ روبوٹ یا مشینیں آک الور۔

مستونگ نا علاقہ خلق پیرکانو ٹی نا درست آ بندغ آتا سم کاری، ہرانا سوب آن اِرا بندغ بیران مسر، اسٹ اس ٹپی مسونے۔

مونی حوال نا ردئٹ بیران مروکا ہڑتوما بندغ آک سید لعل شاہ، نور محمد السادات قبیلہ غا تعلق داری تخرہ۔

سم کاری نا تدینی آن پد نادرست آ بندغ آک ہمو جاگہ آن فرار مسونو۔ پولیس نا پاننگ کہ ڈوہدار آتا پٹ و پول برجاء ءِ۔

یاتی مرے بیران مروکا ہڑتوما بندغ آتا جون تے مستونگ سول ہسپتال آ دننگانے۔ ٹپی مروکا محمد عامر باوہ نا پن حبیب الرحمٰن ءِ مونی علاج کن کوئٹہ غا راہی کننگانے۔

کنے توبہ ءِ، کنا باوہ ءِ توبہ ءِ

نوشت: سنگت آجو

دی بلوچستان پوسٹ

کل غریب ءُ مخلوق ئسے دعا کیرہ ننے ام ثواب ملیک ایہن کار پین تین پیسہ پُر کیر ہشت سد نو سد خرچ کیر داڑے مفت علاج تا مریک اوفتا ام کاریم مریک ننے ام ثواب ملیک، ایہن ام کنا تنخواہ افدہ ہزار ءِ نم تینٹ پابو دافتیٹ انت دو بریک، نُت انا گوڑی ام ہفت ہزار لگانے، بورہ سد روپئی کلو، سی دو سد روپئی ءِ سر مسونے، دا کبینی ٹی دا ڈپٹی آ دیر ءِ وارہ کنیک ولدا ام نن مخلوق نا خاطر آن تینا کل کاریم تے الان تینے انداڑے اختہ کرین داسکان مخلوق ناشکرات ءِ۔

علاقہ نا ڈاکٹر فل سوختہ اس مریض اس اودے پاریسس کہ نم ننا زی آ پیسہ کنیرے ای کاوہ بڑزا نما زی آ ایکشن الیفوہ۔

غریب نا اندا پانگ تو ڈاکٹر نہ اسٹ نہ ارٹ جوان ایت بنفے تا۔ مریض بے وس مس کسر ءِ تینا ہلک انا، ڈاکٹر ام پین تین تیار اس آخر تڑس بس تا یا پین کاریم اس تما تہ ہسپتال اٹ مون کرے۔ ہسپتال آ سر مننگ تو مریض ءِ خنا مچے خن تے کشا۔

نے پاریٹ ان ای نے چیک کپرہ نے کنا زی آ دروغ پاسہ، نی کنے پاسہ ای نا زی آ پیسہ کنگونٹ، دا جوان او چم اسے، ای تینا کل ءِ وخت ءِ نمکہ تیر کیو ولدا نم کنے آ خن کشبو۔ اینو نی اندن کیسہ پگہ پین اس کیک ولدا ای اٹ ئنا مریو۔

مریض باز معافی خواہس، منت زاری کرے۔ ڈاکٹر نا سوختئی ءِ مچے شیف شاغا۔ ڈاکٹر پارے نے دا سرپد مفیس کہ ای ایہن ءُ بندغ اسے اٹ، قومی ءُ جائیداد والو بندغ اسے اٹ، نی کنے خلیفسہ نی ہراڑے پاس ای ہموڑے بریوہ، ٹیپل آ پاس ہموڑے ام بریوہ نوا پاروس ڈاکٹر خلیس، ای خلوکو بندغ اس افٹ۔

آخر مریض ریش اٹ تا ہلک، ڈاکٹر نا سوختئی شیف شاغا، تینے ملامت ڈاکٹر ءِ سلامت کرے۔ تینا چغڑ ءِ ڈاکٹر ءِ نشان تس پارے داد اُر چیک کر پین دے ای دنو جَک خلپرہ، کنے توبہ ءِ کنا باوہ ءِ توبہ ءِ۔

سبق خواننگ کہ نتا سل دھڑاسس کس ننے ہتُو
و کوکارٹ ننا دا گٹ ہناسس کس ننے ہتُو

غریبی اٹی اُرائے نن تینا الان ننا استٹ
محبت علم نا رختس رداسس کس ننے ہتُو

ننا محنت نظر کسے بتو تو مسخرا خللک
و کہ طاقت تو تینا بادشاس اس کس ننے ہتُو

ہزار میل پیدن اٹ نن ہنانک انگہ اے دلبر
رقبس دان ننا جہد آ مخاسس کس ننے ہتُو

اسل بے وارثا تنا باء ہفینک گام ٹپ جھلان
نشانی گام نا چھرکٹ دُراسس کس ننے ہتُو

خبر اف انت کن نن بے وسی نا مسنک تصویر
سبب انت اسکہ شاید گڑاس اس کس کس ننے ہتُو

دتر تو خید کشانک گڑاس خنتان خڑینک ہم بس
کہ نن خنتون تسلی اس دلاسس کس ننے ہتُو

ننا دا بے یقین آ منزل آ اس کاروان راہی
و اٹی ہر اوسٹ بینگن ملاس اس کس ننے ہتُو

کروسن دیران گلہ دیران ننا تینا ننا الور
ضمیر خلقان ہمپیسس ہناسس کس ننے ہتُو

ننے خلکر کسر تا حادثہ تا اس بہانی اس چا
کہ دھرتی آ دتر جسم آن وباہسس کس ننے ہتُو

ہرادے جوڑ مرونی خیرخوا اسک ننا شہزاد
کسر تا او ننا ہم پت تخاسس کس ننے ہتُو

شہزاد سلطان بلوچ

سندھ نا بنجائی شار کراچی نا علاقہ شیریں جناح کالونی ئٹ بس ئسے نا رہی آ تراک آن شش بندغ ٹپی مسونو۔

ڈی آئی جی ساؤتھ بمب تراک ءِ پک کرے۔ او پارے کہ بمب ٹرمینل نا گیٹ آ تخنگاسس و ہراتم بس گدرینگا گڑا تراک مس، تراک آن شش بندغ ٹپی مسونو۔ تراک ئٹ بال بئیرنگ کاریم اٹ ہتنگا و تراک ریمورٹ کنٹرول ڈیوائس نا کمک تون کننگانے۔

پولیس کوالخواک پاریر کہ ٹپی تے تینا کمک تینٹ نا ردئٹ رکشہ غاتیٹ ہسپتال آ سر کننگا۔ بنائی وڑئٹ پولیس گمان نا درشانی کرینے کہ دا سلنڈر نا تراک ئسے واہم دوارہ پولیس ءِ بال بیئرنگ ہم دو بسر۔

پولیس و رینجرز علاقہ ءِ گیڑ کرینے و ٹرمینل نا پٹ و پول نا کاریم برجا ءِ۔ خلقت ءِ مُر توننگانے کہ شاہدیک زوال مفس۔

بلوچ آتا خواننگ کن پند

ٹی بی پی سرگپ

پاکستان پیپلز پارٹی نا حکومت سنہ 2009 ئٹ بھلو بیرفنگ اسیتون بلوچستان نا “احساس محرومی” تے مُر کننگ کن “آغاز حقوق بلوچستان” پیکج نا پڑو کریسس۔ دا پیکج ئٹ جنگ زدہ ڈیہہ بلوچستان کن سیاسی، معاشی، بست بندی و تعلیمی منصوبہ غاک اوار ئسر۔ نغدکار آک دا پیکج ءِ ریاست نا اسہ پین “کاونٹر انسرجنسی” چم اس پاریسہ دا پیش گوئی کریر کہ دا ہم اندا ڈول نا ایلو پالیسی تیانبار بے سہب مرو۔ دا پیکج اٹ بھاز سوغند آتیتون اوار دا سوغند ہم ارفنگا کہ بلوچستان نا خوانندہ تے ہائیر ایجوکیشن کمیشن آن اسکالرشپس ئٹ اسہ گچین ءُ کوٹہ اس تننگو، ہرانا ردئٹ او علاقئی و پیشن ملک بڑز تعلیمی ادارہ غاتیٹی تعلیم دوئی کننگ کرور۔

دا سوغند ءِ عملی وڑئٹ ٹہیفنگ ئٹ پین مُسہ سال لگا و سنہ 2012 ئٹ دود آتا ردئٹ اسکالر شپس نا پڑو کننگا، و پنجاب نا یونیورسٹی تے پاننگا کہ او بلوچ خواننگہ تیکن گچین ہند تخر۔ بنائی وڑئٹ دا سیٹ آتا کچ 600 ئس، ولے 2013 ئٹ مسکوئی سر وزیر بلوچستان ڈاکٹر عبدالمالک و مسکوئی وزیر اعلیٰ پنجاب شہباز شریف نا نیامٹ اوڑدئی ئٹ اوفتے زیات کننگا۔ شڑط آک آسرات ءُ ئسر کہ کس بلوچ خوانندہ اس پنجاب نا یونیورسٹی اسیٹی اوپن میرٹ آ سیٹ دوئی کیک گڑا اوڑان ہچو فیس ہلنگپرو، اوڑتون اوار ہاسٹل نا خڑچ ہلنگپرو۔

دا منصوبہ بلوچستان نا خوانندہ تیٹ بھاز پن کرے، ہرافتیتون بلوچستان ئٹ گچین تعلیم دوئی کننگ نا گچین کننگ مفرنگ نا کچ ءِ۔ ہزار آ خوانندہ غاک نن و دے خواری آن گڈ پنجاب نا جتا یونیورسٹی تیٹ داخلہ دوئی کریر، ولے ایلو منصوبہ تیانبار دا منصوبہ نا زند ہم چنک مونا بس۔

تدوک اِرا سال ئنا نیامٹ جتا وڑتیٹ دا خوانندہ تے دوئی آسراتی و وظیفہ تیٹ کمبوتی ہتنگسہ ءِ۔ بنائی وڑئٹ ہاسٹل ئٹ مفت ہندی مننگ نا آسراتی ایسر کریسہ، اوفتے حکم تننگا کہ تیوہ غا خوانندہ غاک ہاسٹل نا فیس ایتر۔ واہم بہاوالدین ذکریا یونیورسٹی نا خوالخواک اسہ گام اس مونی ہنیسہ دا پڑو ءِ کرینو کہ 2020 نا داخلہ سال آن بلوچ خوانندہ تیکن تیوی اسکالر شپس آک ایسر کننگور۔ یونیورسٹی کوالخواک دانا سوب حکومت پنجاب و بلوچستان نا پارہ غان فنڈز نا بند مننگ ءِ پارہ، ایلو پارہ غان پن کروک ہڑتوم آ حکومت آک اسٹ ایلو غا دوبہ خلکنو۔

دا یونیورسٹی تا بلوچ و پشتون خوانندہ غاک تدوکا اِرا تُوہ آن برجاء برانز کننگو۔ برانز نا اولیکو بشخ ئٹ دا خوانندہ غاک بہاوالدین یونیورسٹی نا بنجائی درغ نا مونا اسہ برانزی کیمپ اس خلکر، ہرا اسہ تُوہ ئسے آن زیات لگوک مس۔ برانز آن بیدس ہم خواست آتا پورو مفرنگ نا سوب دا خوانندہ غاک 800 کلومیٹر مرغن لانگ مارچ ءِ بناء کرینو، ہرا ملتان آن لاہور نا پارہ غا گام خلنگ ءِ، ہرانا مِزل پاکستان نا دارالحکومت اسلام آباد ءِ۔

برانز کروک بلوچ خوانندہ غاک دوبہ خلنگو کہ اسکالرشپس آتا ایسری نسلی ہڈ ئنا فرخ کننگ نا لڑ ءِ ہراڑتون اوفتے پنجاب اٹ مون تروئی تمنگ ءِ۔ دا دوبہ غاک ہند ہم تخرہ انتیکہ پنجاب یونیورسٹی، قائد اعظم یونیورسٹی اسلام آباد، بہاوالدین ذکریا یونیورسٹی ملتان و ایلو تیٹ خوانوک بلوچ خوانندہ غاک جتا وخت آتیٹ پاکستان نا بنجائی جماعت آتا خوانندہ گل آتا دو آن بیدادی تا گواچی مریسہ کرینو۔

دا اسکالرشپس آتے اسیکہ وا تننگ نا دمدرستی تون خواست ارے کہ جہان نا پدتموک ڈیہہ آتیان اسٹ بلوچستان نا خوانندہ غاک گچین تعلیم دوئی کننگ کیر و تینا ڈیہہ نا دیمروی و خوشحالی ئٹ کڑد اس ایسری تننگ کیر۔ دا بھاز بھلو خواست اس اف اگہ دا گڑا غا خوڑتی اٹ اوننگے کہ پنجاب نا فیکٹریک بلوچستان نا مڈی تیان چلینگرہ و او جاگہ نا دیمروی بلوچستان نا ڈغار نا مڈی تا منتواری ءِ۔ برانز آ بیوس خوانندہ غاک خواننگ آ حق خوارہ، اوفک نسلی شیف بڑزی سلوک نا گواچی کننگپس۔