مشی آ نما یار ئے دنیا گچین ءِ
تلاری آ درنگ آ تا سیخا گچین ءِ
غلامی نا زند ئٹ کہوکاک پین او
کہک حق آ تینا اے ورنا گچین ءِ
دا شنز آ تا نیاما کسر اف نے داسہ
مرک پو نی بش مر وطن نا گچین ءِ
کہنگ آ تو دے ئس کہیسہ نی الم
کہنگ کہ ولے ڈے دا تینا گچین ءِ
جہان نا ئے خوشی ءُ شوخی تینا چٹ
ائے ماران نا دامان آ زبیا گچین ءِ
دیار بلوچ
بلوچستان ئٹ کسر شکست نا تدینی تیٹ بھیم بش کروک کچ اسکان ودکی اس مون آ بسنے ہرا نئے بیرہ بندغی ساہ تا زوال مننگ نا سوب جوڑ مریسہ ءِ بلکن ہزار آ خاہوت آتے ترند ذہنی، مالی و بدنی تادی تا گواچی کریسہ ءِ۔
میڈیکل ایمرجنسی ریسپانس سینٹر نا 6 توہ ای رپورٹ نا رد ئٹ برجاء سال جنوری آن جون اسکان نا نیام ئٹ تیوہ صوبہ ئٹ 12,110 کسر شکست تدینی رپورٹ مسر ہرافتیٹی 239 بندغ مرگ ئنا گواچی و 15,690 ٹپی مسر۔
رپورٹ ئٹ پاننگانے کہ بیرہ N-25 وندر نا ہند آ 724 تدینی مون آ بسر، ہرافتیٹی 952 بندغ ٹپی و 25 مرگ ئنا گواچی مسر، اندن N-50 ٹراما ژوب ئٹ 4,201 و N-25 ٹراما خضدار ئٹ 2,412 تدینی ریکارڈ کننگار۔
پین دا کہ جون ئنا توہ ئٹ 2,454 تدینی مون آ بسر ہرافتیٹی 3,449 بندغ ٹپی و 51 بندغ مرگ ئنا گواچی مسر دا تدینی تیٹ گیشتر تدینی خضدار، ژوب، سبی و پشین نا علاقہ آتیٹ مون آ بسر۔
اندا وڑ 4 جولائی 2025 آ اسہ دے ئٹ کسر تدینی نا بھیم بش کروک لہر اس خننگ مس ہراٹی 69 تدینی مون آ بس رپورٹ نا رد ئٹ اوفتیٹی 97 بندغ ٹپی مسر واہم خوش قسمتی ئٹ ہچو جانی نسخان رسینگتو۔
چاہندار آتا رد ئٹ بلوچستان ئٹ کسر تدینی تا بھلا سوب آتیٹ ترند رفتار، خراب انگا کسرک، ٹریفک قانود نا برخلافی و تفوک ادارہ غاتا بے پامی اوار ءِ اُلسی کُڑدہ غاک اسہ وڑ گِلہ کریسہ ءُ کہ سرکاری دعویٰ آتیان گڈ ہم کسر تا جوڑ کننگ، ٹریفک کنٹرول و ریسکیو سہولت آتیٹ ہچو نوانی اس خننگ ئٹ بننگ اف۔
اندا وڑ سال 2024 ئٹ اشتماعی ڈول ئٹ 20,300 تدینی تیٹ 471 مرگ و 17,500 آن گیشتر بندغ ٹپی یا اسُلی کن منڈ مننگ نا گواچی مسر۔
شاری، چاگڑدی گل و بندغی حق آتا جہدکار آک دا کچ و حساب آ بھاز خلیس پاش کریسہ برانز، لانگ مارچ و خواست کرینو کہ بلوچستان نا کسر تے رکھنگ کن ترند و عملی گام ارفنگہ۔
واہم دائسکان حکومتی تلہ غا اسہ ہم جوانو ردعمل اس مون آ بننگتو ہرا نا سوب اُلسی غم و غصہ گیشتر مریسہ ءِ۔
بلوچستان نا جتا انگا ضلع آتیٹ مون آ بروکا تدینی تیٹ اشتماعی وڑ ئٹ اِرا چنا تون اوار 6 بندغ مرگ ئنا گواچی اندن اِرا بندغ ٹپی مسنو۔
شابیتی حوال تا رد ئٹ قلات نا کیب ئنا علاقہ غوث آباد ئٹ نادرست بندغ تا سم کاری آن سلمان احمد ولد عبدالقدوس زہری مرگ ئنا گواچی مس، قلات پولیس سر مریسہ جون ءِ کاروائی کن ڈسٹرکٹ ہیڈکوارٹر اسپتال آ سر کرفے۔
واہم تدینی نا سوب آک دائسکان سما تمتنو، پین کاروائی بست و بند کریسہ ءِ۔
قلات ئٹ کوئٹہ کراچی بھلا کسر آ بینچہ نا ہند آ اِرا گاڑی نا ڈک لگنگ نا سوب اِرا بندغ ہمو وخت مرگ ئنا گواچی مسر اندن اِرا بندغ ٹپی مسر، ٹپی بندغ تے دمدستی وڑ ئٹ ڈی ایچ کیو ہسپتال قلات سر کننگانے۔
جعفرآباد نا بنجائی شار ڈیرہ اللّٰہ یار ئٹ بجلی نا کرنٹ لگنگ نا سوب اِرا جتا ءُ تدینی مون آ بسر ہرافتیٹی اسہ 22 سال ئنا ورنا و اسہ 4 سال ئنا چنا اس مرگ ئنا گواچی مسنو۔
اولیکو تدینی بھٹی محلہ ئٹ مس ہراڑے 22 سال ئنا ورنا امجد پٹھان اُرا نا چھت آ بجلی نا تار ءِ خلنگ ئس کہ ناگمان بجلی نا بننگ آن اودے ترند چنڈی اس تسا و او ہمو وخت کسک۔
ارٹمی تدینی جتوئی کالونی ئٹ مون آ بس ہراڑے 4 سال چنا بنگن جتوئی اُرا ئٹ گوازی کریسہ بجلی نا پاش انگا تار ءِ دو خلک، ہرا نا سوب او ہشنگا و ہمو وخت دم تِس۔
اندا نیام ئٹ مُسہ دے مالو سریاب روڈ چکی شاہوانی نا علاقہ ئٹ اُرا نا حویلی ئٹ گوازی کریسہ چنک سن چنا اس بی بی مومنہ ناگمان سم ئسے نا گواچی مریسہ ترند ٹپی مسوسُس، ہرا دراخ متئو و ایلو دے ٹراما سینٹر ئٹ دم تِس۔
ایمنسٹی انٹرنیشنل اسہ ہلہلئی رپورٹ اس شینک کریسہ پاکستانی کوالخواہ تیان خواست کرینے کہ او بلوچ یکجہتی کمیٹی نا دزگیر مروک کل جہدکار آتے دمدستی و بیدس شرط آ یلہ کے۔
دزگیر مروک جہدکار آتیٹی ڈاکٹر ماہ رنگ بلوچ، بیبرگ زہری، بیبو بلوچ، شاہ جی صبغت اللّٰہ، غفار قمبرانی و گلزادی بلوچ اوار ءُ۔
ایمنسٹی نا رد ئٹ دا کل ءِ باسک آتے اوفتا پرامن جہدوجہد و بندغی حق آتیکن توار ارفنگ نا “ڈو” ئٹ دزگیر کننگانے، ہرا جہانی و ملکی قانود آتا پاش برخلافی ءِ۔ اوفتا دزگیری بلوچستان ئٹ برجاء ریاستی کریک ڈاؤن نا بشخ ئسے، ہرا نا مسخت پرامن برانز، آزادیِ اظہار و سیاسی کاریم تے پدماندہ کننگ۔
دا ہیت کننگ نا لائخ ءِ کہ او دا جہدکار آتے مُسہ توہ اسکان 3MPO نا رد ئٹ دزگیر ئٹ تخنگ آن گڈ اندا منہ وخت ئٹ انسداد دہشت گردی نا عدالت ئٹ پاش کننگا، ہراڑے اوفتا دہشت گردی نا دوبہ ءِ خلیسہ جیل آ سر کننگانے۔
ایمنسٹی انٹرنیشنل تینا رپورٹ ئٹ خلیس پاش کرینے کہ دا بندغ آتے دزگیر نا وخت جوان ءُ جان جوڑی سہولت فراوان کننگسہ اف و اوفک ناروا سلوک یا بیدادی آن بار انگا بھاز بھیم ئنا گواچی ءُ۔
رپورٹ ئٹ پاننگانے کہ انسداد دہشت گردی و اُلسی جہدکار آتا برخلاف سلاہ نا ڈول کاریم ئٹ ہتنگسہ ءِ، ہرا بنداوی بندغی حق آتا بھاز بھلو برخلافی ئسے۔
ایمنسٹی انٹرنیشنل جہانی برادری، بندغی حق آتا جہدکار و سول سوسائٹی آن خواست کرینے کہ او پاکستانی حکومت آ زور شاغر تانکہ دا کل بلوچ راہشون آتا دمدستی یلہ کننگ و بلوچستان ئٹ شاری آزاتی نا شرف ءِ یخینی جوڑ کننگے۔
کنا استاد کنا راہشون کنا کسر تا چیدہ ماما قاضی جان
نوشت کار: بارگ بلوچ
دی بلوچستان پوسٹ
جون ئنا 30 تاریخ ئس سنگت منٹ سہب ئنا مالو تون رینج ئنا کنڈ آ پیشتمار راج و ڈیہہ ئنا حوال ءِ ہلنگ کن گڑا بیگہ نا وخت آ سنگت آک وتاخی آ کاریم تا بناء ءِ کریر ایلو کنڈ آ رینج والا سنگت آتا ودار ئٹی ئسن کہ بریر گچینو حوال اس ہتیر، بیگہ نا دیگری نا وخت آ رینج والا سنگت آک بسر تو پریشان پریشان ئسر، بسر سلام دعا مس ایتون تا و سنگت آتے پارین حوال ءِ ایتبو انتئے مونجا مونجا اُرے گڑا سنگت پارے کہ نن ہچ پاننگ کپنہ اینو ننے آن ننا راہشون ہنا گڑا نن ہرفین کہ دیر ہنا او پاریر کہ سنگت باسط زہری عرف قاضی، اندا پن ئتون ننا رغاک اسیکہ سلیسر اُست چِکی اس کُنگ ملی سن مس۔
نن ہبکہ مسن اندا پن ئنا ہلنگ تون بولان نا تہو سلیس، رخت آک مونجا مسر، پھل آک گیمرینگار، مشک گوڑینگار، بولان چٹ چپ مس، وتاخ چٹ بے زینت مس، و ہر سنگت سوچ ئٹی ئس بولان فرزند نا غم تیٹی ہنا، ای راہشون لیڈر استاد ابا جان قاضی نا یات ئٹی ہناٹ ذہن ئٹی ہزار سوال ودی مس کہ دا گواچن ئٹ ہمو قاضی ءِ ہراد آن نن ہر وخت دلیری نا کسہ غاتے بنگونن یا پین ئسے دا امروس مرو داخس بھلو لیڈر ئسے امر ننے آن جتا مس ننے کشکا ہنا، اندن بلوچ لبریشن آرمی نا چینل ہکل آ بیان ءِ خوانان گڑا دا بیان ننے اُست ئنا رغ تیان کشکا اسُل اُست ءِ ہوغفے چٹ اسیکہ بدن و اُست ژند بند مسر۔
تیوہ غا نن اونا دروشم نظر ئٹ سراکہ چڑہ اُست جیڑہ غاتیٹی ئس کہ قاضی جان ہنا ننے چھوری کرے اینو تیوہ غا بلوچ راج ءِ چھوری کرے اسہ کنڈ نا قربانی، نا دلیری، نا جوزہ غاتا ناز ئسک کہ دنو ہستی اس مسونس ایلو کنڈ اُست ئٹی ارمان ئس کہ ننتون اینو ملخموت انت گوازی اس کرے دا ژدغہ انگا بدن نا اُزبہ اس کشکا درے ننے انگہ ژدغہ کرے دسکان تو قاضی ءِ انگہ مروئی ئس دا جہد ءِ داڑے اسکان سر کریسس انگہ اودے سلوئی ئس نن کور آتے سنبھالاس ننا او استاد ئس راہشون ئس باوہ لمہ ئس دسکان دا جہد ئٹی اونا شہیدی آن زیات زندہ مننگ المی ئس ولے جنگ ءِ، جنگ لازم جوان انگا بندغ آتے گچین کیک ننے آن دیک۔ بس ننا قول اندادے قاضی جان آستون کہ نن نما فکر ءِ نما دا آجوئی نا جہد ئٹی مخلصی ئٹ انشاء اللہ کاریم کرون دا کاروان ءِ مستی درون دلجان و امیر جان نا وڑ ایسری دم و ایسری سم اسکان دژمن نا مون آ سلون گڈیکو دم تے اسکان نما فکر ءِ نن بٹوفن قاضی جان نی ہمیڑے ہناس گڑا کنا کنڈ آن شہید حئی جان، دلجان، مجید، امیر جان و کل ءِ شہید آتے سلام پاس رخصت اف اوارن قاضی جان۔
نن اگہ جہان نا جنگی آ دیہاڑ آ نظر اس شاغن گڑا ننے ہمو جنگ سرسہب نظر بریک ہرا نا اسہ سرمچار سپاہی آن ہلیس تنظیم نا لیڈر راہشون اسکان مخلصی ئٹ کاریم کرینو۔ انتئے کہ اگہ اسہ گوریلا جنگ اس مریک یعنی کہ اسہ حق ئسے نا جنگ مریک یا کہ آزادی نا جنگ ءِ گڑا دا جنگ ئٹی ہر اسہ بندغ بروکا رضاکارانہ مریک و او تنخواہ اسیکن جنگ کپک بلکن او تینا آزادی نا جنگ ئکن بسنے اندا سوب او رضاکارانہ ءِ گڑا اسہ رضاکارانہ فرض ءِ کہ او تینا جہد ئٹی مخلص مرے جنگ ءِ مستی دے اسہ پوسکنو دروشم اس ایتے گڑا مخلص آ راہشونی نا مثال نن استاد اسلم نا مثال ءِ ہلنگ کینہ ہرا دا جہد ئتون انداخس مخلص ئس کہ تینا بھلا مار ءِ ریحان جان ءِ قربان کرے مخیسہ گڑا داڑان ننے گمان مریک کہ او اخس جہد ئتون مخلص ئس۔
گڑا مخلص آ راہشون آتیٹی اسہ راہشون لیڈر سنگت باسط زہری عرف قاضی جان تُد ارے سنگت باسط زہری عرف قاضی جان جہد ئتون انداخس مخلص ئس او تینا ایلم باوہ کل ءِ قربان کرے آجوئی کن، نی 2006 ئٹی بلوچ لبریشن آرمی ٹی اوار مسس چار سال شاری گوریلا کاریم کریس، نا شاری کاریم آن سرکار لڑزہ ٹی تما، زہری خضدار پورا بلوچستان ئٹ دژمن نے آن بھیم ئٹی ئس سردار و میر آک نا پن آن خلیسرہ، ننے چنکی آن نما قربانی نما دلیری تا کسہ ءِ بنفینو اُست ئنا ارمان ئس کہ نا ای ہمو جل پری آ چہرہ نا دیدار ءِ کروٹ ولے اُست ئنا ارمان پورا متو نا دیدار متو نی ننے آن ہناس۔ ولے نی جسمانی وڑ آ ہناس نا فکر نا ذکر نا آزادی نا تغ نا قربانیک نا مسخت آجوئی ننتو زندہ ءِ ننا اُست ئٹی ءِ ننا رغ رغ ئٹی ءِ ننا دماغ ئٹ جہی ءِ۔ قاضی جان نا شاری کاریم نا کسہ اس سنگت اس کرے پارے کہ ”نا برام مننگ ئس نی ہمو دے آ شاری کاریم اسیٹ ہناس گڑا نی ہمودے آ سرکار نا مُسہ مخبر خلکس بسس۔“
نی انداخس تیز و چالاخ و شاری کاریم کریسہ نا برام نا دے ئسک اُراٹی مخنگ ئس خوشی ئس نی ہمو مخنگ خوشی تے الاس بلوچستان نا غم ءِ ایڑ لمہ تا غم ءِ ہرفیس ہِناس دشمن تے دھک خلکس نا دلیری و ہمت و جوزہ نا شاہدی ءِ خضدار نا ہر ہر اسہ گلی ایتک کہ نی اخس دلیر ئسس۔ خضدار نا تہو تیٹی نا فکر ئنا گند ءِ زہری نا ہر بوچ ہر خل ہر گواڑخ نا دلیری نا ذکر ءِ کیک نا ہننگ آن پد اینو تیوہ غا بلوچستان مونجا مس۔ مالو حئی نثار جان نا جتائی زہری ءِ ہوغفے داسا نا جتائی زہری خضداری آ فرزند آتے غُٹ ءِ چھوری کرے۔
سنگت باسط اسہ مہروان ءُ سنگت اس ئسک اسہ شفیق ءُ باوہ اس ئس نا ہمو مہری آ لہجہ شوری آ تہو ٹی کوکار خلیسہ ءِ نا مخنگ بولان ئٹ شوکار کریسہ ءِ نی اسہ استاد ئسے اُس نی اسہ راہشون ئسے اُس نا کڑدار نا قربانی نا عمل ئٹ بھاز زیبا ءِ ہرا ننا لوز آتیٹ بیان مفک، سرکار وس کرے تینا بے سہب آ چم آتون نا فکر ءِ نزور کننگ کہ ولے نی اونا مونا شاشان نا مش ئنا وڑ سلیسس نی اسلمی ءُ کڑدار اس زر تسس، نی شور ءِ دتر ئٹ رنگ تسس، نی بولان ءِ سنج کریس نی ناگاہو ءِ مست کریس، نی نوروزی آ ہنکین زہری ءِ پدا تاریخ ئٹ پوسکن رنگ تسس، نی پدا دلجان ءِ اُست آ ہتیسہ تینے قربان کریس نی نشان تسس کے راہشونی امر مریک امر ننے دا جہد ءِ مستی دروئی ءِ نی کل ءِ پاریس کہ ننے قربانی و عمل ئٹ دا جہد ءِ پوسکنو رنگ تروئی ءِ۔
نیکن اینو شوری آ ہر اسہ گواڑخ ہوغک نیکن اینو پدا سلمانجو قصیدہ خوانک نیکن اینو پدا دُگن لے لڑو پائک نیکن اینو سوہندہ شعر تفیسہ ءِ نیکن اینو مولہ افسانہ لکھیسہ ءِ نیکن اینو تیوہ غا بلوچستان ہوغیسہ ءِ یار قاضی جان کنے آن ہچ لکھنگ مفک نیکن قاضی یار دا قلم نا انت بیان ءِ کرو۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
سدا زندہ سَلوسک انت کَروسک ؟
مُدامی مے مَروسک انت کَروسک؟
زِراتے نا دَرے دا گوآدر ئے اَم
چَڑہ نی چُپ ہُروسک انت کَروسک؟
امو عِلم ئے عَمل تو ات بدل کر
چڑہ نی مُر مُٹوسک انت کَروسک؟
دِتر جونے سَفا ٹپّی دِماغے
ننے مُر آن بِنوسک انت کَروسک؟
اَرا ویدن تِکے جانے تِروکو
اَمو تے سُم خَلوسک انت کَروسک؟
سَلہ باغی امو باطیل ئتو نی
نواب ئے جی کَروسک انت کَروسک؟
ملاسی تے اگہ ناوڑ کُٹفپک
دتر دیخہ تِروسک انت کَروسک؟
خرینو دا کنا ہیتو سَلہ بن
غزل نظم ئے ہُشوسک انت کَروسک؟
مَتوسک زند ئٹی بِجار ئتو گر
کنا مَرگا بَروسک انت کَروسک؟
بجار بلوچ
بلوچستان ئٹ بشام نا پر آک ترند تباہی کننگ ءُ، ہرا نا سوب آن جتا انگا تدینی تیٹی زالبول و چنا تون اوار کم و ود 16 بندغ مرگ ئنا گواچی مسنو اندن 8 بندغ ٹپی مسنو۔
مرگ آک اُرا تا تمنگ، سیلابی دیر تا بنگ و ایلو پر تیتون تفوک تدینی تا سوب مسر۔
زہمی علاقہ آتیٹ ژوپ، زیارت، موسٰی خیل، خضدار، لورالائی، لسبیلہ و کوہلو اوار ءُ ہراڑے شیفکو علاقہ غاتے دیر ارفے، ہراڑان ہندی آبادی ءِ ترند سختی تیتون مون تِس ءِ۔
پی ڈی ایم اے بلوچستان نا رد ئٹ 28 جون آن برجاء پر تا وخت صوبہ نا جتا انگا ضلع آتیٹ 58 اُرا تے نسخان رسینگا ہرافتیٹی 11 اُرا تیوہ بھس مسر و 47 دیخہ در نسخان مسر۔
کوالخواہ نا پاننگ ءِ کہ زہمی علاقہ آتیٹ خوراک، ٹینٹ و ایلو بنداوی کمکی مڈی فراوان کننگسہ ءِ اندن ریسکیو ٹیم آک ہندی بست و بند و پی ڈی ایم اے کارندہ غاک کمکی کاریم تیٹ گھٹ ءُ۔
اُلس ءِ پنت تننگانے کہ او بشام نا وخت ڈور تیان مُر مریر، بیدس المی سفر کپس و ہندی کوالخواہ تا پنت آ عمل کیر تانکہ رسینگ کروک نسخان آتیان رکھنگ مرے۔
بلوچستان نا ضلع قلعہ عبداللہ غان استو برمتہ مروک 2 بندغ نا جون آک خننگار۔
لیویز کوالخواہ تا رد ئٹ گلستان بازار آن استو برمتہ مروک اِرا بندغ نا جون آک کاریز نا علاقہ غان خننگانو۔
لیویز کوالخواہ نا پاننگ ءِ کہ ہڑتوم آتا کہوک بندغ آک سیال ئسر ہرافتے برمتہ کننگ آن گڈ بیدادی ئٹ کسفنگا۔
لیویز کوالخواہ نا رد ئٹ برمتہ و خون نا تدینی اِرا ٹولی ئٹ دژمنی نا سوب مون آ بسُنے اندن تدینی نا بابت پین پٹ و پول کننگ برجاء ءِ۔
پِنا ماما باسط نا
اف سما نے ہرانگ مر درے زندگی
پٹینہ ہر نشانے نا نن خلق ئٹی
پین اف دڑد ہچ دڑد بس دا سلیس
گنگنے نا جتائی سفا باسطی
دڑد ئنا تاب اف سیک وساک اِنار
مرگ ئنا پلو ئٹ زند ئنا تاک تُڑار
پن بٹیر چوژ الکر تینے ہِس کریر
نے کفن تو چوخت ئس گلاباک خنار
مٹ الے گر کس ئس اونا مِلپ بدل
گلشن ئٹ اف اسل دونو گواڑخ کنول
چر ئٹی عاشق آتا تینا ڈیھ ئنا
پین کس ئس مرو مف، مرو او اول
شون الے جہد پین خواہش آ ساہ ۓ تس
ڈیھ ئنا تؤش ئسے کوپہ سیخا ۓ تس
خمپ ہچ دڑد الم راج دا بیوس آ
نا کنا زند ئکن یار دنیا ۓ تس
چٹ زہیری او دا خنک بر نی پدا
شون ایت بر سبخ آتو زندے کنا
پد نیان سنگر ئٹ ماما چپی ئسے
زیب مجلس تا زینت نے تو اِنا
میرو بلوچ
بلوچستان نا ضلع کیچ نا علاقہ تمپ ئٹ پاکستانی لشکر کیہی بندغ آتے زوراکی ئٹ بیگواہ کرے۔
زوراکی ئٹ بیگواہی تا دا تدینی درو تمپ نا علاقہ میرآباد ئٹ مون آ بس ہراڑے پاکستانی لشکر بازار و ایب کیب ئنا علاقہ آتیٹ چھاپہ آتا وخت کیہی بندغ آتے زوراکی ئٹ بیگواہ کرے ہرافتیان ایلو بندغ آک یلہ کننگار واہم 5 بندغ دائسکان فورسز آتا دزگیر ئٹی ءُ۔
زوراکی ئٹ بیگواہ بندغ آتا چاہنداری ایوب ولد واحد بخش، فضل ولد فدا، سعید ولد داد محمد، ضیاالحق ولد اسداللہ و عابد علی ولد اسداللہ اوار ءُ۔
بلوچستان ئٹ زوراکی ئٹ بیگواہی تا تدینیک ہڑدے نا بُنداو آ رپورٹ مریرہ اندن زوراکی ئٹ بیگواہ مروک بندغ آتا جون آتا مِلنگ نا لڑ ہم برجاء ءِ۔
