جہانی منڈی ئٹ خام تیل نا نرخ پانزدہ ڈالر اسہ بیرل آن ہم شیف تما، ہراڑان گڈ امریکی خام تیل نا نرخ بیست و یک سال نا کمی آ سرمس۔

گیشتری حوال آتا رِد ئٹ کورونا وائرس نا سوب آن ودی مروک معاشی حالیت آتیان گڈ تیل نا نرخ آتیٹی شیفی نا لَڑ برجا ءِ۔ جہانی منڈی ٹی خام تیل نا قیمت ئٹی بھلو کمبوتی اس ریکارڈ کننگا، ہراڑان گڈ امریکی خام تیل 21 سال نا شیف ہند آ سر مس۔

امریکی خام تیل نا اسہ بیرل نا نرخ چانڑدہ ڈالر چِل و ہفت سینٹ مس، اندن برینٹ خام تیل نا نرخ 4.2 فیصد نا کمبوتی تون ریکارڈ کننگا و برینٹ خام تیل نا نرخ بیست و شش ڈالر نَود و یک سینٹ اسہ بیرل اسکان تما۔

جہانی منڈی ٹی خام تیل نا نرخ آتیٹی کمبوتی نا سوب خواست ئٹ کمبوتی ءِ، اندن امریکی خام تیل نا کاڑ آتیٹی مُچ کنن نا ہند کم تمانے۔

یاتی مرے تدوکا دے تیٹ سعودی عرب و روس نا نیامٹ تیل نا ہڑدیئی ودشت اٹ کمی ہتنگ نا معاہدہ مس کہ تیل نا خواست جوان و قیمت آک گچین مننگ کیر۔ دا پابندی تیوی تیل ودی کروک ملک آتیا مریک واہم دا فیصلہ آن بیدس ہم تیل نا نرخ آتیٹی برجاء کمبوتی ریکارڈ مننگ ئٹی ءِ۔

سرپدی تخوکاک خلیس نا درشانی کرینو کہ اگہ تیل نا خواست اٹ اندن کمبوتی مریسہ کرے گڑا نرخ آک گچین مننگ کپرور۔

بلوچستان نا جتا علاقہ تیٹ ہنوکا 20 سال آن جتا پروجیکٹس آک بھاز انگا جلہو تیٹ ٹک کننگانو۔ جلہو تا ذمہ واری ءِ زیات بلوچ سلاء بند تنظیمک ارفینو۔

ٹی بی پی نیوز ڈیسک ءِ ریسنگوک حوال تا رِد ئٹ سبی نا علاقہ تلی ٹی تیل و گیس پٹوکا کمپنی نا کارندہ آتے بمب جلہو ئٹ ٹک کننگا۔

کمپنی نا کارندہ آتے کلگری سرمند ٹی ٹک کننگا ہرانا سوب آن اوفتے جانی نسخان ارفوئی تمانے، ضلعی کوالخواہ تا پارہ غان دائسکان ہچو حوال اس تننگتن ءِ۔

جلہو نا ذمہ واری ءِ بلوچ سلاء تنظیم بلوچ لبریشن آرمی ارفینے۔ ترجمان جیئند بلوچ میڈیا ٹی شینک کروک حوال اٹ پارینے کہ بی ایل اے سرمچارک تیل و گیس کمپنی نا کارندہ غاتے بمب جلہو ئٹی ٹک کرینو۔ ہراٹی کمپنی نا اسہ کارندہ اس کسک و اِرٹ ٹپی مسونو۔

جیئند بلوچ نا مستی پاننگے کہ بلوچستان ئٹ برجاء استحصالی پراجیکٹ و بلوچ سائل تا لُٹ و پل ئٹ اوار کمپنی تے آ ننا جلہوک برجاء مرور۔

یاتی مرے اندا تُو ئٹ تیل و گیس پٹوکا کمپنی تیا مُسہ جلہو مسونو ہرافتیٹ بلوچ ریپبلکن گارڈ نا سبی و کاہان نا نیام ئنا علاقہ ٹی کپمنی نا گاڑی آ بمب جلہو و کاہان ٹی بلوچ لبریشن آرمی نا کنڈان جلہو اوار ءُ۔

داڑان مالو اندا تُو ئٹ لسبیلہ و ضلع خضدار نا نیام ئٹی کرومائیٹ نا ٹرک آتیا جلہو نا ذمہ واری ءِ بلوچستان لبریشن فرنٹ ارفیسس۔

تدوکا تُو ہم کاہان نا علاقہ کلگری ٹی تیل و گیس پٹوکا کمپنی ءِ ٹک کننگاسس ہرانا ذمہ واری ءِ بلوچ لبریشن آرمی نا ترجمان جیئند بلوچ ارفیسس۔ ترجمان نا پاننگ ءِ کہ جلہو ٹی کمپنی نا خیال داری کروکا کارندہ اس کسک و اسہ گاڑی اس ہم بُھس مس۔

تدوکا سال نا ایسر ٹی ضلع سبی نا علاقہ چھامور تنگی ٹی گیس نا کاڑ خننگا ہراڑان گُڈ اوڑے کمپنی نا کنڈ آن کیمپ خلیسہ گیس پٹنگ نا کاریم ءِ بناء کننگا۔

اندا پراجیکٹ آ کاریم کروکا ماڑی پیٹرولیم کمپنی لمیٹڈ نا مرکزی دفتر اسلام آباد ٹی ءِ اندن کمپنی نا کنڈان داڑان مُست بلوچستان نا علاقہ ہرنائی، زیارت، کوہلو، زرغون و بیلہ ٹی تینٹ و ایلو کمپنی تون شریکی تیل و گیس پٹینگ و کشینگ آ کاریم کننگ کرینے دا کمپنی سندھ نا علاقہ سکھر، کونج، سجل، فضل، ماڑی و ایلو علاقہ تیٹ انداوڑ کاریم کننگ ءِ۔

بلوچستان ٹی گیس و تیل پٹوکا کمپنی تون اوار تعمیرات کمپنی تیا جلہو آتا لڑ ہنوکا 20 سال ءِ برجا ءِ، 2006 ٹی نواب اکبر خان بگٹی نا شہیدی آن گڈ ڈیرہ بگٹی و ایلو اضلاع تیٹ گیس، تیل و ایلو تنصیبات تیا جلہو تیٹ ترندی بس۔

سی پیک ءِ بلوچ سیاسی و سلاء بند حلقہ تا کنڈان استحصالی منصوبہ گوندنگک۔ ہرانا سوب آن سیاسی حلقہ تا کنڈان تہہ و پیشن ملک آتیٹ برانز ارفنگ تون اوار بلوچ سلاء بند آجوئی خواہوک تنظیم تا کنڈان سی پیک و ایلو تنصیبات آتیا جلہوک مریسہ کرینو۔

سی پیک، سیندک و ایلو پراجیکٹس تا سوب آن بلوچستان ٹی چائنیز انجینئر و ایلو کارندہ تیا 2018 آن جند ندری جلہو تیٹ ترندی بسونے۔

اسہ بیگواہ ئسے نا دزگیری نا وارنٹ
دی بلوچستان پوسٹ سرگپ

پاکستان نا دہشت گردی نا برخلاف ٹہینگوک اسہ عدالت اس 16 اپریل نا تاریخ آ پانزدہ بندغ ءِ نروک پاریسہ اوفتا خلاف بیدس ضمانت دزگیری نا وارنٹ کشانے۔ دا بندغ غاتیا دوبہ خلنگانے کہ مننگ کروک وڑئٹ کالعدم تنظیم بلوچ لبریشن آرمی تون تعلقداری تخرہ، ہرا 23 نومبر 2018 ئٹ کراچی ٹی چینی قونصل خانہ آ جلہو نا ذمہ واری ارفیسس۔

اے ٹی سی دا مقدمہ نا بننگ ءِ سینٹرل جیل کراچی نا انٹری ٹیررزم کمپلیکس ئٹی کننگے۔ گوڑیفوک وڑٹ عدالت راشد حسین پنی بندغ ءِ ہم ایلو بندغ آتیتون اوار نروک گوندان ءِ۔ دا پِن کروک بندغ یک و نیم سال آن بیگواہ ءِ و اونا خاہوت دا نوشت نا وخت اسکان کراچی پریس کلب نا مونا برانز کننگے۔

راشد حسین نا خاہوت نا پاننگ نا رِد ئٹ 26 دسمبر 2018 غا اودے متحدہ عرب امارات ئٹ اماراتی ڈھکوک ادارہ غاک بیگواہ کریسہ دریسر، ہرانا اوفک ہمو وختا پولیس ئٹ رپورٹ ہم کریسر۔ راشد اگست 2017 آن امارات ئٹ بے وطنی زند گدریفنگ ئس۔

دا دعویٰ نا امنائی ءِ ایمنسٹی انٹرنیشنل نا یو اے ای بشخ ہم کرینے۔ ہرافک تینا کاغذ ایم ڈی ای نمبر 25/9880/2019 ئٹ اماراتی حکومت نا دفتر خارجہ ءِ پِن کریسہ خواست کریسر کہ راشد حسین نا بابت اونا خاہوت ءِ پاننگے و اونا خاہوت تون اوڑہی کن ہلنگے۔ ایمنسٹی انٹرنیشنل راشد حسین ءِ تینا کاغذ آتیٹ ”راجکاری باسک“ پاریسہ پِن کیک۔

واہم راشد حسین نا بیگواہی آن شش توُ آن گڈ پاکستان نا بھلا نیوز چینل آک حوال شینک کریسہ دعویٰ کریر کہ پاکستانی کوالخواہ تا خواست آ راشد حسین ءِ یو اے ای آن دزگیر کننگانے و انٹر پول نا کمک ئٹ اودے پاکستان ڈیپورٹ کننگانے۔

راشد حسین ءِ ہچو عدالت اسینا مونا ہتنگتن ءِ، اندن یک و نیم سال آن گڈ 16 اپریل 2020 آ پاکستان نا اسہ عدالت اس اودے نروک پائک۔ گوڑیفوک وڑ ئٹ پاکستانی میڈیا تینٹ اونا بابت اسہ سال اس مالو دعویٰ کریسس کہ او پاکستانی کوالخواہ تا دوٹی تننگانے۔

دی بلوچستان پوسٹ ءِ اماراتی ”فیڈرل اتھارٹی فارآڈینٹٹی اینڈ سٹیزن شپ“ نا پارہ غان شینک کروک اسہ ”ایگزٹ سرٹیفیکٹ“ اس رسینگاسس ہراٹی پاش خننگ مریک کہ راشد حسین امارات نا البتین بالی پَٹ آن 22 جون 2019 آ نوشکی پاکستان کن رخصت مسوسس۔ داڑان پاش مریک کہ راشد حسین ءِ اسہ چارٹرڈ جانز اسیٹی ڈی پورٹ کننگاسس۔ البتین بالی پَٹ گچین وڑٹ چارٹر جانز تیکن کاریم اٹ ہتنگک۔ پِن کروک بالی پَٹ اماراتی حکومت نا فضائیہ، نیوی و پولیس نا ایوایشن و ائیر ونگ ڈیپارٹمنٹ کن ہم کاریم اٹ ہتنگک۔ ایلو پارہ غا نوشکی ئٹ ہچو بالی پَٹ اس ساڑی اَف، خڑک ئنا بالی پَٹ دالبندین نا ءِ، ہرا تیوی وڑئٹ پاکستانی فوج نا دوٹی ءِ۔

راشد حسین نا خاہوت و وائس فار بلوچ مسنگ پرسنز نا وائس چیئرمین ماما قدیر بلوچ اِرا جتا پریس کانفرنس آتیٹ دعویٰ کریسہ پارینو کہ اوفتیتون اندنو پَک ءُ شاہدی ساڑی ءُ ہرافتیان دا پَک مریک کہ راشد حسین پاکستانی ادارہ غاتیتون ءِ و اودے نروک پاننگ، راشد نا زند ءِ مروک خطرہ آتیٹ ودکی نا سوب مرو۔

دا تیوی حالیت آتیان پاکستان نا عدلیہ نا بست و بند آ بھازا سوج آک ارفنگسہ ءُ۔ و امر کہ پاکستانی و اماراتی کوالخواک اسہ جاہ مریسہ دا ویل ءِ ایسر کننگ نا کوشست کریر دا بندغی حق آتے بھاز لڑنگ ءِ پاش کیک۔

پاکستانی کوالخواک دائسکان دا دعویٰ غان نمن متنو کہ راشد حسین ءِ متحدہ عرب امارات آن انٹرپول نا کمک ئٹ پاکستان ڈی پورٹ کننگانے۔ کورٹ نا دزگیری نا وارنٹ آتیان گڈ ہم ہچو ردعمل اس نشان تننگتنے۔ واہم سندھ رینجرز و کراچی ایوی ایشن اتھارٹی راشد نا دزگیری آن نمن مسونے۔

اسہ ویب سائیٹ اس ٹہیفنگانے ہرا راشد حسین نا بے گواہی نا دے تے حساب کننگ ءِ۔ دا ویب سائیٹ آ اینو خننگ مریک کہ راشد حسین ءِ بے گواہ مروک اسہ سال، مسہ تُوہ، مسہ ہفتہ و اِرا دے مسونے۔ دا امیت کننگسہ ءِ کہ دا نمبر آتا تسبیح بھاز اُرے اسکان دن بٹگنسہ مفرو، و بھاز زوت راشد حسین ءِ عدالت نا مونا ہتنگو، ہراڑے او تینا بے گناہی ءِ پَک کننگ کے۔

بلوچستان ئٹ کووڈ-19 (کرونا وائرس) نا کیس آک ترندی تون زیات مننگو، پین 41 بندغ ئٹ کرونا وائرس پَک مس۔

بلوچستن نا ہشت زیمی ضلع غاتیٹ جمعی وڑئٹ کرونا وائرس نا کیس آتا کچ 376 مس۔ کرونا وائرس آن زیمی اِرا بندغ نا جانجوڑی آند گڈ جمعی کچ 144 مسونے، 415 بندغ نا ٹیسٹ آتا حوال بروئی ءِ۔

محکمہ جانجوڑی بلوچستان نا پاننگ نا رِدئٹ بلوچستان ئٹ دائسکان 1351 بندغ نا اسکریننگ کننگانے ہرافیٹ 5485 شکی بندغ آتے ٹیسٹ کننگانے ہرافیٹ 4709 بندغ نا ٹیسٹ نفی اندن 41 پوسکنو کیس تون 376 بندغ نا رزلٹ مثبت بسونو ہرافتیٹ 227 کیس برجاء ءُ۔

محکمہ جانجوڑی نا مستی پاننگے کہ 144 زیمی بندغ آک جانجوڑ، اندن پنچ بندغ کذیت کرینو۔

محکمہ صحت نا رِدئٹ بلوچستان نا جتا قرنطینہ سینٹر آتیٹ ساڑی بندغ آتا کچ 357 ءِ۔ 148 بندغ نا ٹیسٹ نفی اٹ بننگ آ اوفتے اُراتیٹ رادہ کننگانے۔

اینو بلوچستان نا ضلع مستونگ آن چار کیس مونا بسر ہرافک اسہ خاہوت ئسے آن تعلقداری تخرہ اندن چاغی آن تبلیغی جماعت نا بندغ آتیان ہفت ئٹ کرونا وائرس پک مسونے۔

بلوچستان ئٹ کرونا وائرس آن زیمی ضلع غاتیٹ ودکی بسونے ہرافتیان گڈ زیمی ضلع غاک ہشست مسونو۔ وائرس آ زیمی پوسکنا ضلع غاتیٹ مستونگ، پشین و خاران اوار ءُ۔

بلوچستان نا جتا جتا علاقہ نوشکے، کیچ و ہرنائی ٹی جلہو تیٹ پاکستانی لشکر ءِ ٹِک کننگانے۔ ہرافتیٹ پاکستانی لشکر ءِ جانی و مالی نسخان ارفوئی تمانے۔ جلہو تا ذمہ واری تے جتا بلوچ آجوئی خواہوک سلاء بند گَل آک ارفیر۔

حوال آتا رِد ئٹ نوشکے نا علاقہ ریکو ٹی پاکستانی لشکر نا گاڑی ءِ بارود نا دھماکہ ٹی ٹک کننگا ہرا نا سوب آن لشکر نا کارندہ غاتے جانی نسخان ارفوئی تمانے۔ ضلعی انتظامیہ نا کنڈان دہسکان دا بابت ہچ ءُ حوال رہسینگتنے۔

نوشکے جلہو نا ذمہ واری ءِ بلوچ سلاء بند گَل بلوچ یونائیٹڈ آرمی ارفینے۔ گَل نا ترجمان مزار بلوچ نا پاننگے کہ  ننا سرمچارک پاکستانی لشکر نا گاڑی ءِ ریموٹ کنٹرول بمب اسیٹی ہمووخت ٹِک کریر ہراتم اوفک تینا ایلو چوکی آ ہننگ ئسر۔

مزار بلوچ نا مُستی پاننگے کہ جلہو ئٹ گاڑی تباہ مس و گاڑی ٹی سوار تیوہ غا کارندہ غاک جاگہ غا کسکر۔

پین حوال ئسے نا رِد اٹ ضلع کیچ نا علاقہ مند ٹی پاکستانی لشکر نا چوکی ءِ سلاء بند بندغ آک ٹک کرینو۔

رہسنگوکا حوال تا رِد ئٹ مند نا علاقہ گوک ٹی دیر تروکا ہند آ جوڑ مروکا فوج نا چوکی ءِ نا درست بندغاک راکٹ و ایلو سلاء تیٹ ٹک کرینو۔

جلہو نا ذمہ واری ءِ اسہ پین سلاء بند بلوچ گَل بلوچستان لبریشن فرنٹ ارفینے۔ بی ایل ایف نا ترجمان نا پاننگے کہ گوک ٹی چیک پوسٹ آتیا راکٹ و خود کار سلاء تیٹ جلہو کرین۔ جلہو ٹی اِرا کارندہ کسکر و اِرٹ ٹپی مسر، اندن چیک پوسٹ ءِ بھاز نسخان رسینگا۔

میجر گہرام بلو نا پاننگے کہ ہفت اپریل آ مند گوک ئٹ رودان نا مَش آ ہڈ تروک پاکستانی لشکر نا چوکی آ اسہ دے ئٹ اِرا جلہو کرین، ہراڑے سنائپر توفک ئٹ اِرا فوجی کارندہ ٹِک کریسہ کسفین۔

اندن ہرنائی نا علاقہ شاہرگ ٹی پاکستانی لشکر نا اسہ چیک پوسٹ ئسے آ نادرست سلاء بند بندغ آک جلہو کریر۔ جلہو کروک و فورس نا کارندہ غاتا نیامٹ اُرے اسکان سم کاری برجا مسونے، دوارہ جلہو کروک آک ہلانو ہنانو۔

دا جلہو نا ذمہ واری ءِ بلوچ آجوئی خواہوک سلاء بند گَل بلوچ لبریشن آرمی ارفینے۔ گَل نا ترجمان جیئند بلوچ نا پاننگے کہ شاہرگ نا علاقہ زردآلو نا ہند آ پاکستانی لشکر نا چیک پوسٹ آ بی ایل اے نا سرمچارک چنکا بھلا سلاء تیٹ جلہو کریر ہراڑان اِرا کارندہ کسکر و بھازاک ٹپی مسر۔

بلوچستان نا جتا علاقہ تیٹ بلوچ سلاء بند گل تا پارہ غا برجاء وڑٹ پاکستانی لشکر آ جلہوک مریسہ کرینو۔ دا جلہو تیٹ پاکستانی لشکر آ ترندو ہم جلہو مسونو ہرافتیٹ اوفتے بھلو جانی نسخان و مالی ارفوئی تمانے۔ ایلو پارہ غان پاکستانی لشکر بلوچستان نا ہرکنڈ آ تینا کیمپ و چوکی تے ہڈ تسونے، و اندن ہردے جتا علاقہ تیان لشکر کشی تا ہم حوال رسینگرہ۔

کرونا وائرس نا سوب آن اسہ دے ٹی 2108 بندغ مرگ نا گواچی مروکا تان گُڈ امریکہ جہان ٹی ہمو اولیکو ملک جوڑ مسونے ہراڑے دا دین آن اسہ دے ٹی 2000 بندغ کسکُنو ۔

جان ہاپکنز یونیورسٹی نا پاننگے جُما نا دے آ تیوی امریکہ ٹی کورونا وائرس آن کہوکا بندغاتا جمعی مُچ 2108 ئس ۔

حوال رسیفوکا ادارا اے ایف پی نا پاننگے امریکہ ٹی دہسکان کورونا آن 18 ہزار 586 بندغ کسکُنو ولے کرونا آن دہسکان کُل آن بھاز کہوک آک اٹلی ٹی بھاز مسُنو ہراڑے کہوک آک مُچ 18849 ءُ۔

امریکہ ٹی کورونا آن بیمار مروکا تا ہساب ہم جہان ٹی کُل آن بھاز 496535 مسونے و ہنوکا 24 گھنٹا نا تیٹی 35098 پوسکُنو کیس پک مسونے ۔

بلوچستان نا ضلع قلعہ عبداللہ ٹی نادرست بندغاک آک پاکستان فوج نا گاڑی ءِ بارود نا دھماکا ئٹ ٹک کرینو۔

رسینگوک آ حوال تا رد ئٹ چمن نا علاقہ دوبندی نا خڑک پاکستان افغانستان نا سیم آ باڑ خلینگ نا وختا پاکستان فوج نا پٹرولنگ گاڑی کَڈ کروک ءُ بمب سیٹ لگّا۔

حوال تا رد ئٹ دھماکا ٹی پاکستان فوج نا اِرا کارندہ کسکر و اِرئٹ ٹپی ءُ۔

حوال آتا رِد ئٹ شمالی وزیراستان ئٹ سلا بند جھڑپ اسیٹی ہفت بندغ تون پاکستان فوج نا اِرا کارندہ کسکنو۔

پاکستان فوج نا ادارہ آئی ایس پی آر نا پاننگے کہ جھڑپ اٹ سپاہی مومن شاہ و محمد ساجد کسکنو۔

آئی ایس پی آر نا مُستی پاننگے کہ سپاہی مومن شاہ نا تعلقداری ڈی آئی خان و سپاہی ساجد نا تعلقداری ایبٹ آباد آن ئس۔

آئی ایس پی آر ایلو پارہ غا کہوک ہفت بندغ نا بابت شابیتی اٹ حوال تتنے۔

بنگلا دیش نا جوڑ کروک راہشون شیخ مجیب الرحمان نا کسفینگ ٹی اوار نروک بنگلہ دیشی فوجی کیپٹن ءِ 25 سال آن گُڈ دزگیر کریر، اوکا گُڈ اونا سزائے مرگ ءِ ایسر تننگ نا بناء کننگانے۔

پیشن ملکی خبر ایجنسی نا پاننگے نروک فوجی کیپٹن عبدالمجید ءِ بنگلا دیش نا دارالحکومت ڈھاکا ٹی رکشا ٹی سفر نا وختا دزگیر کننگا۔

پیشن ملکی خبرایجنسی نا پاننگے شیخ مجیب الرحمان نا کسفینگ نا گُنا ٹى عبدالمجید ءِ ایلو فوجی افسر تون اوار مرگ نا سزا بنفنگاسس، پدا او نرا و بھارت ءِ ہنا۔

عبدالمجید منہ دے مُست بنگلا دیش آ واپس بسوسس و حوال رسینگ آ ہلنگا، شیخ مجیب الرحمان نا کسفینگ نا تومت ڈو اٹ اونا ایلو سنگت آتا سزائے مرگ تننگانے۔

بنگلا دیشی وزیرِ انصاف نا پاننگے نروک کیپٹن عبدالمجید نا سزائے مرگ ءِ ایسری تننگ نا تیاریک بناء کننگانو۔

بنگلا دیشی وزیرِ انصاف نا دُن ہم پاننگے کہ نروک کیپٹن بنگلا دیشی صدر عبدالحمید آن رحم نا خواست ءِ کننگ کیک ۔

بنگلا دیش نا صدر عبدالحمید دنکہ کسفنگوکا راہشون شیخ مجیب الرحمان نا مسڑ و ساڑی آ وزیرِ اعظم بنگلا دیش شیخ حسینہ واجد نا خوڑک ءِ اندا خاتر اومیت کننگسہ ءِ کہ رحم نا خواست واپس مرو و سزائے مرگ ءِ زوت اس ایسری تننگو۔

یاتی مرے بنگلا دیشی وزیرِ اعظم شیخ حسینہ واجد نا باوا شیخ مجیب الرحمان و اونا ایلو اُرا والاک 15 اگست 1975 ٹی مروکا اسہ فوجی جلہو نا وختا کسفنگار۔

حسینہ واجد او وختا یورپ ٹی مننگ نا سوب آن دا کسیفوکا جلہو ٹی بچّاسس ۔

بلوچستان نا ضلع خضدار نا علاقہ وڈھ آن تعلقدار براہوئی نا پنی آ شئر پاروک عبدالرحمٰن بلوچ یک شمبے نا دے تینا علاقہ وڈھ ئٹ کذیت کرے.

عبدالرحمٰن براہوئی بولی نا بھازا خلقی شئر تے زیبدارو دروشم اس تریسہ پارینے. او نہ بیدس وڈھ و جھالاوان اٹ پنی اس بلکن تیوی بلوچستان ئٹ مخلوق نا بھلو کچ اس اودے بنگوکا۔

اندن اونا توار اٹ زلکو، غازی نورا مینگل، شہید علی محمد مینگل نا پن تیا کروک شاعریک بھاز خوش کننگانو۔

عبدالرحمٰن بلوچ تینا تیوی زند ءِ براہوئی بولی کن تسوسن و اندا حالیت اٹ کوڑی ءِ یلہ کرے۔