نیاڑی نا زند ، دیہاڑ و مذہب
نوشت: سلال ساوڑ
براہوئی مٹ: پُلھین بلوچ
نیاڑی تا بُنیاتی دیہاڑ نا بابت ئٹ پاننگک کہ اوفتا بناہی و مُتکن آ وخت ئنا انسانی چاگڑد ئٹ لُمئی خواجہی/حاکمی (مادرانہ نظام) مسونے۔
مورخ و دیہاڑ نا چاہندار آتا خواننگ آن پد سرپندی رسینگک کہ لُمئی خواجہی (مادرانہ نظام) ئٹی نیاڑی نا شرف بھاز بُڑز مسونے و نیاڑی ہچبر نرینہ نا دُو ئنا شیف آن / خواجہی ٹی بتنے۔ اودے ہر ڈول ئنا کاریم کننگ آ دُو ءُ نت تفنگ/ رَکھ الوّ و او زند ئنا مُچا کاریم تیٹی بشخ ہلینگ آ آجو ئس۔
نیاڑیک انسانی تہذیب ءِ گچین ءُ دروشُم اس تننگ ئٹ بھلو کڑد ئسینا خواجہ ءُ۔ اندا رِد ئٹ شاہ محمد مری تینا کتاب ”نیاڑی تا جُنز“ ئٹ نوشتہ کیک: ”لُمئی/مادرسری دور ئٹ نیاڑی چاگرد نا کُل آن زیات چسپان و کاریم کروکا ذات ئس ہراکہ تہذیب ءِ مُستی دننگ کِن تینا لائخی تے کاریم ئٹ ایسونے“
نیاڑی نا انسانی دود و ربیدگ و تہذیب ءِ رُدوم و مون مُستی دننگ نا راز اونا جوان انگا کاریم و کڑد ءِ اراکہ آرکیالوجسٹ آتا مونی ہتوکا مُست ئنا گڑاک (آثارِ قدیمہ) تا کُمک ئٹ پاش مسونے۔ زراعت نا بُنیات ءِ ام نیاڑیک تخانو، اوفک کُننگ کن وڑ وڑ ئنا تام جوڑ کننگ تون اوار پمبہ/پُٹی آن گُد و پُچ اڈ تننگ ، کشیدہ و سہت ءُ زیور آن زیبا ءُ نقش جوڑ کننگ ام نیاڑی تا لائخی نا پَد ءِ۔ رزان ءُ کندُوری ہم اوفتا جوڑ کروکو داکان بیدس ڈگی ، ہیٹ ِمر و ایلو سہدار آتے ولیفنگ نا بُنیات ءِ ام نیاڑی تخانے۔
اندا رِد ئٹ ڈاکٹر مبارک علی تینا کتاب ”نیاڑی تا جہان“ ئٹ نوشتہ کیک، ”آثارِ قدیمہ نا چاہندار آک پارہ کہ زراعت نا جوڑ کروک/بُنیات ءِ تخوکا نیاڑی ءِ“
نیاڑی تا ارٹمیکو بھلا کاریم دا مسونے کہ اوفک میڷ تا سَر ءُ سمبھال ءِ کرینو۔ پاڷ بیڑینگ ءُ پدا اندا پاڷ تیان خاسُن، سی ، خُرود ءُ خریش جوڑ کننگ ام اوفتا مِلی نا سبّری/ لائخی ئس، داکان بیدس وخت ئس کہ اوفک دا کاریم تیان دُو ہورک مسورہ گُڑا پُچ اَم مُوغارہ۔
گر نن دیہاڑ ءِ بیدس سیاسی شیفی ءُ بُڑزی ، راج/ خواجہی کننگ نا اِڑس و ایلو چم بازی تیان مچٹ ئس چِست مریسہ چاگڑدی ءُ دود و ربیدگی مٹّی/ ارتقاء ءِ سیل کین گُڑا ننے نیاڑی نا کِڑد نرینہ غان زیات گچین لگیک۔
امو دور و باری ہراکہ ”مادرسری نظام“ پاننگک او دیہاڑ نا چاہندار/تاریخ دان آتا خیال ئٹ جارات، مِہر و مابت، ایمنی ءُ رُژن خیالی، جمہوریت و سوشلزم نا ماڈل ءُ زمانہ ئس مسونے۔
داکان پَد دیہاڑ ئٹ مدان مدان آ نرینہ غاتا باوہ ئی حاکمی”پِدرسَری“ نا دور و باری مون آ بریک ءُ لُمہئی حاکمی دَم تریسہ مون شیفی نا پارہ غا کائک، ہراڈے نیاڑیک نرینہ غاتا دُو تا شیف آن/ غلام مریرہ۔ اوفتا خواجہی ءِ پُلیسہ و اوفتے قیذ و بند کننگ مریک و یکہ اوفتے چُنا ودی کننگ نا مڈی خیال کننگک۔
پدا دا دور ”پدرسری“ آن انسانی دیہاڑ ئٹ خَلینگ، پُلینگ ، نا تپاکی ، زُلم ءُ زوراکی و چندی پین جیڑہ آک کاٹُم ارفِیرہ۔
ایرک فرام ”چسپان آ چاگڑد” ئٹ نوشتہ کیک: ”لُمئی نظام ئٹ زند ءِ شرف بشخوک ئس ، بندغ آتون مِہر و مابت، اواری ، رُژن خیالی و جمہوریت ئسک ولے باوہ ئی نظام ئٹ آمریت ، فاشزم ، یکہی، بے مِہری و چندی پین جیڑہ غاک چٹ زیات ئسُرہ۔ دا نظام ئٹ گندہ غا ذہنیت نا روتہ غاک کُڑمّب مریسہ ہِنار ہراڑے بندغ ئسے نا خُڑکی قبیلہ یا ٹَک/ برادری تون مفروس گُڑا اودے نفرت و شک ئنا نظر ئٹ اُننگاکہ، اندا جوزہ غاتیان نسل پرستی نا بناء مسک۔
جہان نا جِتا جِتا غا مذہب آک نیاڑی نا بابت ئٹ محکومانہ/ غلامانہ ءُ خیال / نظریہ تِخیرہ۔
نیاڑی ءِ شیف خلینگ ، بَد و رَد کننگ و غلام و نزور ءُ جینڈر ئس پاننگک۔ اسلام ، یہودی و عیسائی تا خُڑک آ نیاڑی نا بابت ئٹ خیال آک دا وڑ ئٹ ءُ کہ نیاڑی اندُن ءُ سہدار ئسے ہراکہ ایلوفتیان نزور و چٹ شیف ءُ مخلوق ئسے۔
یہودی مذہب نا ” احکام عشرہ“ ئٹی دُن پاننگانے کہ ”نرینہ/اَرغ تینا نیاڑی/ زائیفہ غا خواجہی کے و اوفتا سیالی اسٹ ایلو تون بادشاہ و اُلس، بوتار و بزغر نا ءِ۔“، اَرغ تون دا خواجہی ارے کہ او ہرا وخت خوائے تینا زائیفہ ءِ مُسِٹ (یَلہ کننگ) ایتنگ کیک ولے زائیفہ ءِ دا حق ہچبر افک کہ او ورندی ایتے یا اونا گپ آن نامن مرے۔
یہودی تا دا پاننگ ئس کہ زائیفہ ءِ وے تواری ئٹ اسے کاریم کروک / خذمت گار اس جوڑ مروئی ءِ و اودے نہ زانت / تعلیم تِروئی ءِ نہ کہ او تینا اَرغ نا کاٹم آ خواجہی کننگ کیک یکہ اونا کُل آن جوانی اندادے کہ زیات آن زیات چُنا ودی کے۔
عیسائی تا خیال دُن ئس کہ زائیفہ ناپاک ءِ ، او جہان ئٹ گُناہ تے ایسونے۔ زائیفہ دوزخ نا در و شیطان نا سِلہہ ءِ و اودے رسواہی خیال کننگاکہ۔
اوفتا مذہبی مُلا تا خیال دا وڑ ئٹ ئس کہ ”اَرغ زائیفہ کن ودی کننگتنے بلکے زائیفہ اَرغ کن ودی کننگانے ، اندا خاطر آن زائیفہ غاتے اَرغ آتیان شیف و جاگہ ئس تننگے۔
اسلام پائک کہ ” النساء نا قصِات عَقلِ و دین“ البخاری(68/1) ، صہیح مسلم (1/86)
اسلامی مذہب ہم زائیفہ ءِ شیف و جاگہ اس تسونے، زائیفہ ءِ اَرغ نا میراث پاننگانے و ہر وڑ ئٹ اونا خواجہ اَرغ ءِ کننگانے۔
قرآن نا باز آ جاگہ تیا آیات ارے۔
اسلام ارغ ءِ جوان و بُڑز ءُ ولے زائیفہ ءِ شیف و نزور ءُ جاگہ اس تسونے۔
دا گپ آتیان پاش مریک کہ مذہب آک نیاڑی ءِ تیوہ انسان اس خیال کتنو و اونا مُچا بندغی حق آتے تننگ ئٹ بے سہب مسونو۔
دا کِڑد آتا رِد ئٹ نیاڑی ءِ شیفی و بُڑزی ، بزغر ءُ بوتار و شیف خلینگ یا نزور خیال کننگ نا روّشت مذہب آتیٹی خننگک و دا روشت آن مذہبی زورّاکی نا ڈَس رسینگک۔
نیاڑی تا اینو نا دور ئٹ مُستی بروکا سوگوّ آ دروشُم دا گپ ئنا تینٹ گواہی تیک و امنّا کیک کہ نیاڑی ہچو ڈول ئسٹ نرینہ غان شیف و نزور اَف بیرہ دا شڑط ءِ کہ اودے موکل تننگ مرے و تینا خواجہی و زوراکی نا خیال آتے مَٹ کننگے و تیوہ ءُ انسان ئسینا دروشُم ئٹ اونا کَسر ءِ یلا کننگ مرے و اونا بھری آ کُبین انگا دود آک تخنگ مفس، گُڑا او کُرد آتا ڈول ئٹ تینا لُمہ ڈغار نا رکھ و زیبلا آجوئی کن توفک ارفسہ جنگ کننگ ہم کیک۔ سیمون دی بووا نا دروشُم ئٹ باسما ءُ جُھدکار و قلم کار ءُ فلاسفر ئس جوڑ مننگ کیک۔
لوزانک، راج کاری/ سیاست، سائنس و زند ئنا ایلو پِڑ آتیا نرینہ آتیان ہچو ڈول اسٹ نزور و وے لائخ اف۔ بندی کننگ اوڑان دا مُچا لائخی تے پُلیسہ اودے یکہ تہاری نا نیمہ غا دیک۔
مُسکوہی دور ئٹ نیاڑی تینا زِند ئٹ چندی ڈُکھ و ویل و گڑتی تے خنا، اونا تدینگوکا زند زُلم ئنا کِسہ آتا گواہی ءِ تیک۔ نیاڑی تون مروکا زوراکی تا درشانی ءِ دیہاڑ نا پنّہ غاک دڑدی آ چیہانٹ آتون کیرہ۔
اینو نا دے اسکان ہم نیاڑی ننا پَد تموکا چاگڑد ئٹ غلامی ءُ بیوسی ئٹ دم ہلیسہ ءِ و چندی ڈُکھ ءُ ویل و زوراکی تا گواچی ءِ۔
اونا مُستی گام خلینگ ءِ بے شرفی نا جیڑہ ئس پاننگک و اودے تینا ہمگام ، آزات ءُ بندغ ئس خیال کننگ و اواری نا حق و اونا آجوئی نا گپ ءِ چاگڑد ئٹ بلو شغّان اس خیال کننگ مریک۔
نن یکہ اوڑتون اوار خاچنگ و چُنا ودی کننگ نا اُست خواہی ءِ تخینہ۔ نن خیال کینہ کہ نیاڑی یکہ اُرا نا تہٹی قیذ مرے و پیشن آ کس ئسے آ اونا نظر تَمپ ، نادُرست نرینہ غاتون ھیت و گپ آن مُر مرے و ہر وخت کاٹُم و مون ءِ ڈھکیسہ تینے بُوک کے۔ داکان بیدس ایلو راجی و چاگڑدی کاریم تیٹ کاریم تخپہ ءِ و یکہ چار دیوال نا تہٹی بندی مرے ، نہ کہ تینا اَرغ یا خواجہ/نرینہ نا گپ آتیان نامن مرے۔
نیاڑی ام سرجم ءُ بندغ ئسے اندُن کہ نرینہ ءِ، و نیاڑی ام نرینہ نا دروشُم ئٹ زند ءِ تدیفنگ نا خواہندار ءِ و دا اونا حق ہم ارے۔
نیاڑی نا آجوئی نا مون ئٹ حیاء و غیرت نا جیڑہ ءِ چِست کننگ اونا بندغی حق آتے پُلنگ نا دروشُم ئسے و دا اسے بلو زوراکی و بیدادی ئس خیال کننگ مریک۔
اسے گچین ءُ چاگڑد ئس امو وخت اسکان جوڑ مننگ کپک، ہرا وخت اسکان کہ نیاڑی نا مُچا بندغی حق آک اودے رسینگتنو و اودے اسے انسان ئس خیال کننگ متہنے۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
