مسکوہی نگران وزیر اعظم پاکستان و سینیٹر انوار الحق کاکڑ پارینے کہ بلوچ قوم پرست آک جنرل ضیاء نا سنگت و جنرل مشرف نا دشمن ئسر، بلوچستان نا آجوئی نا ہچو تحریک ئس الو 70 نا دہک ئٹی بیرہ مری قبیلہ جنگ کرے، برٹش بلوچستان قرارداد ئٹی خدا مرزی نواب اکبر بگٹی پاکستان نا حق ئٹی ووٹ تسس۔
دا خیال آتا درشانی ءِ او ٹی وی چینل ئسے آ انٹرویو ٹی کرے۔
سینیٹر انوار الحق کاکڑ نا پاننگ ءِ کہ بلوچستان ئٹی پنچ ڈیہہ اسر، ریاست قلات، ریاست خاران، ریاست بیلہ، ریاست مکران و برٹش بلوچستان ئٹی پشتون بیلٹ، کوہلو، ڈیرہ بگٹی و تفتان اوار اسر۔
او دعویٰ کرے کہ بلوچستان ئٹی کُل آن مُست نواب آف خاران عبدالرحمان نوشیروانی، جام غلام قادر بیلہ، بھائی خان گچکی مکران دستاویزات تیا دستخط کرسا پاکستان تون اوار مسر ہرا برٹش بلوچستان نا بشخ اس۔ او قرارداد پاس کریر۔
انوار الحق نا پاننگ اس کہ مرحوم نواب اکبر بگٹی پاکستان نا حق ئٹی ووٹ تسس۔ ہراتم قلات نیشنل پارٹی جوڑ مس تو او اسہ ریزولیشن ئس پاس کریر کہ ریاست قلات ءِ پاکستان ئٹی اوار مروئی الو او وختا غوث بخش بزنجو فاونڈر اس و سیوتی ہندوستان تون رہینگوکا بندغ آتیٹ اوار اس۔
اونا پاننگ اس کہ بلوچ قوم پرست جنرل ضیا نا سنگت و جنرل مشرف نا دشمن اسر، دیہاڑ ئٹی بلوچستان نا آجوئی نا ہچو تحریک ئس الو 70 نا دہک ئٹ بیرہ مری قبیلہ جنگ کننگ اس، او فیصلہ کریر کہ دا وار نا نن جنگ پاکستان نا ریاست نا برخلاف بناء کرون و دا مکران گوادر بیلہ اسکان ہراڑے بلوچ قبائل الو اوڑے ہم دا جنگ ءِ تالان کننگو، ای سرپند مریوہ کہ او داٹی سرسہب مسنو۔
