افسانہ : زندان
نوشت: محراب بلوچ
دی بلوچستان پوسٹ
دا تہارا کوٹی کہ ہرانہ تہٹی ای زندانی اُٹ ، دا زندان ئسے نا تہٹی جوڑوک چار دیوال و اسہ چَت ئسے نا آٹی ئس اف کہ ہرادے ای زندان نا پِن ایتیو ، ولے ہان ای داخس پاننگ کیوا کہ دا کوٹی نا تہٹی ای زندانی اُٹ ۔ داڑے کنا ارمانک ، اُست خواہیک ، مہر ، جوزہ و احساس اک کُل بندی ءُ ، او ای اندنو کیفیت ئسے ٹی اُٹ دنکہ “ تازمامرت “ نا تہارا زندان اتیٹ قید مراکشی قیدی تہ کیفیت اک ئسر ۔ ولے دا کوٹی تو زندان ئس اف ، دانا دیوال اتئے اسہ نیم آرٹسٹ ئسے نا نا سرجم آ کیہی آرٹ اک کشوکو ، کہ ہرافتہ گواچن اسکان ہر عام و خاص سر مننگ کپک ، بلکہ دا آرٹ اتیٹ آرٹسٹ نا ہمو جوزہ غاتہ اظہارے کہ ہرادے او دا تہارا کوٹی نا تہٹی تموک تینے آ محسوس کرینے ۔ دا آرٹ اک ، دا تہارا کوٹی نا تہٹی تموک آ گنوکؔ نا ہمو آزموندہ غاتہ زکرے کہ ہرافتے او دا کوٹی ٹی تینے آ گدریفینے ۔ دا کوٹی نا دیوال اتئے اسہ تراشوکو پینسل ئسے نا بُوز ئٹ کیہی شئیراک لکھوکو کہ ہرافتے خواننگ تون بندغ تینا تہہ نا کُل احساس اتے تینا بدن ٹی ماریک ۔
دانا درگہ نا خیر آ اسہ آدینک ئس ہم خلوکے ہرا بندغ نا گواچن ءِ نشان ایتک ءُ درگہ نا خیر آ اسہ چنکو گلدستہ ئس تخوکے کہ ہرانہ تہٹی گِڑاس بارون ءُ پھل خلوکو کہ ہرافتہ پَن اتیان لگیک کہ دافک کیہی وخت اتیان ملاس ءُ ۔ دا کوٹی نہ آسہ کُنڈ ئسے آ ہفت فُٹ ئنا کَٹ ئس ہم تخوکے کہ ہرانہ سرجہ غا کیہی کتاب اکو ۔ دا زندانی آ کوٹی ٹی اسہ کُڑسی و ٹیبل ئس ہم تخوکے ، ٹیبل نا زِی آ نیم آرٹسٹ نا ہمو اوزار اکو کہ ہرافتہ کمک ئٹ او دیوال اتئے تینا نیم سرجم آ آرٹ اتے کَشیک ۔ دا کوٹی نا تہٹی اسہ چنکو روشندان ئسے کہ ہراڑان بیگہ نا وخت کہ اسمان خیسن تفک ، گُڑا روشنائی نا گِڑاس برانز دا روشندان ان برسہ تہارا کوٹی نا دیوال اتئے کشوکا آرٹ اتے رنگ ایترہ ، داڑان بیدس روشنائی ءِ مجال اف کہ او دا کوٹی نا نیمہ غا مون کہ ۔ دا کوٹی ٹی پین کس اف بیرہ ای اُٹ ، کنا تہہ نا آرٹسٹ ءِ ، تراشوکا پینسل ، گلدستہ و پھل اک ، آدینک ءُ سرجہ غا تخوکا کتاب اتو اوار کنا ہمو جوزہ و احساس اکو کہ ہرافک کنتو اوار دا کوٹی ٹی زندانی ءُ ، ننا زند ہم دا زندان ئٹ گدرینگسہ ءِ ۔
داڑے پین کس بفک بیرہ تینتو اختہ غا ای اُٹ ۔ کنے ان سوب و شام ئنا فرق انانے ، دا کوٹی نا تہٹی کنا زند اندن گدرینگنگ ءِ دُنکہ اسہ زندان ئسے ٹی بلوچ ورنا سے نا زند مرے ۔ ہڑدے انبار اینو ہم کنا حالیت اندنے ، اینو ای ٹیبل ان تراشوکا پینسل ءِ دُوٹی کرینٹ ءُ دا زندانی آ کوٹی نا دیوال ئسے آ گھڑی ئس کشینگ نا کوشست ہٹی اُٹ ءُ کنا گمان اندادے کہ نوائے دا گھڑی نا کشینگ ان گُڈ کنے وخت ئنا رُم ئنا سما لگے ۔ ولے دا کوٹی اندن تہارے کہ ای دیوال ائے پینسل نا روانی ءِ ہم خننگ افٹ ۔ ای داڑے شمع ئس ہم لگیفنگ کپرہ کہ ہرانہ رژن آ تینے اُشنگ کن پروانہ غاک بریرہ ۔ خیر رژن ئنا برانز اتا بننگ نا ودار ئٹ ای پینسل ءِ ولدا ٹیبل آ تخاٹ ءُ تینا ہفت فُٹی آ کَٹ ائے دم ئس آرام کریٹ ۔ ای وختس کہ خن تے ملاٹ تو کنا کوٹی نا روشندان ان رژن ئنا برانز اک کوٹی نا دیوال اتئے کشوکا آرٹ اتئے تمیسہ ئسر ، ای چاہسوٹ کہ ریکی نا خیسن انگا دیگر نا پاس ءِ ۔ ای رژن ئنا برانز اتا فائدہ ارفیسہ زو ئس تینا سرجہ غا تخوک کتاب ئسے آ دُو بِٹیٹ ، کنا دُوٹی طاہر بن جلون نہ کتاب ( یہ بصارت کُش اندھیرے ) بس ۔
ای رژن ئنا چکاس ءِ الینگ کن دم ئس تینا خیال اتے دا زندانی آ کوٹی ان کشنگ خواہسوٹہ ولے داڑے ہم کنا دُوٹی ہمو زندان اتا قصہ تیان پُر کتاب ئس دُو بس ۔ خیر مقدر ٹی لکوکا گِڑا ایہون چَپ مفک ، دا زندان و تہاریک ایہون ننا بشخ ہٹی ءُ ، تینے اندن باور کریفسہ ای دا کتاب ءِ خواننگ بناء کریٹ ۔ دا کتاب ہٹی مراکشی قیدی تا ہمو کُل زندان ئنا قصہ غاک ئسر کہ ہرافتے او تینا جان و جُون آ جلاسُر ۔ دا کتاب ئٹ خوانسہ ای مراکشی قیدی تا ہمو کُل احساس ، جوزہ و کیفیت اتے محسوس کننگ ئسوٹ کہ ہرا کیفیت اک اوفتہ زندان نا تہٹی ئسرہ ۔ ای ہمو احساس اتے مارینگ ئسوٹ کہ کنا خنک دا زندانی آ کوٹی نا دیوال اتئے کشوکا کنا آرٹ اتئے تمار ءُ کنا مِلی ٹی یکدم اندا خیال بس کہ دا آرٹ اتے کشینگ نہ وخت آ ای تینا تہٹی ہمو کُل احساس اتے ماریوا ہرا احساس و کیفیت اتے تازمامرت نا زندان اتیٹ مراکشی قیدی اک تینا تہہ ئٹ محسوس کرینو ۔۔
دا سوج کنا ملی آ نقش مس ءُ کنے سماء لگا کہ ای ہم اسہ اندنو کیفیت ئسے آن گدرینگسہ اُٹ کہ ہرا کیفیت اک اسہ زندانی ءُ بندغ ئسے نا مریرہ ۔ ای انداکان دا تہارا کوٹی ءِ زندان نا پِن تسوٹ ، ای چاہسوٹ کہ ننا داریرہ غا ہم اسہ اندنو چاگڑد ئس جوڑے کہ ہرا ننے تینا ہند اتیٹی ہم زندانی کرینے ۔ ای اندا سوچ اتیٹ ئسوٹ کہ کنا پام کتاب آ تما ولے داسہ کتاب ئنا لوز اک کنا خن تیان اودیم مسوسُر ءُ دیوال اتئے ہم رژن ئنا برانز اک خننگ متورہ ، ای چاہسوٹ کہ دیگری ایسر مسونے ءُ پدا ننے شام الکُنے ۔
اینو نا شام کنے آ بتر کُبین تمینگ ئس ، کنا مِلی ئٹ مدام اندا گِڑا چرخ کننگ ئس کہ نن دا چاگڑد ئٹ تو زند گدریفنگ افن بلکہ نن کُل داڑے زندانی اُن ، نن زند ئنا چکاس ءِ داڑے ہچبر التن اُن ، ننا سوب و شام خیال اک ، احساس و جوزہ غاک اندنو دنکہ اسہ زندان ئسے ٹی بندی بندغ ئسے نا کیفیت اک مریر ، گُڑا نن تینے امر آجو پانہ ؟ ۔۔ای اندا خیال اتیٹی گم و گار ئسوٹ ۔ ای تینا زند ئنا زِی آ سوچنگ ءِ گیشتر بنا کریٹ ، ای تینا تہٹی ہمو کُل گِڑا تے پٹنگ آ غور کننگ ئسوٹ کہ ہرا گِڑاک ننا بدن ئٹ دا احساس و جوزہ غاتے ودی کیرا ۔ کوٹی ئٹ تہاری جوان ترند ئس ، ای کَٹ آ لیٹوک تینا تہہ نا خیال اتیٹ ئسوٹ ، ای ہمو گِڑا غا سر مننگ نا جہد ئٹ اسوٹ کہ ہرا ننے دا حال اسکان سر کرینے کہ نن تینے ان تینا زند ئنا چکاس ءِ پُلان اُن ۔ ای اینو تہاری ءِ پرغِنگ کن تینا زندانی آ کوٹی ئٹ موم بتی ئس لگیفیٹ ، کنا گمان اندا ئس کہ رژن ان پد کنا مہون آ کوٹی نا کُل گواچنی آ رنگ اک پاش مریرہ و کنے سوچنگ نا گیشتر موہ ملیک ۔
ای موم بتی ءِ تِیلی ئسیٹی لگیفیٹ ، کنا زندانی آ کوٹی کیہی وخت اتیان پد رژن ئنا برانز اتے خنا ، ای بھلو وخت ئسے ان پد تینے کوٹی ٹی خلوکا آدینک ئٹ خناٹ ۔ تینے خننگ ان پد ای سرپد مسوٹ کہ دا زندان کنے ورناہی ئٹ پیر کرینے ۔ کنے تہہ ان انداخہ کُنگُنے دُنکہ اسہ پاٹ ئسے خورہ غاک کُنسہ کار ۔ اینو نا شام کنا کیفیت اک ہڑدے ان چَٹ جتا ئسر ، ای خوش مننگ ئسوٹ کہ ای تینا تہٹی اُومیت ئنا احساس اتے مارینگُٹ کہ ہرافک کنے ہمت ترسہ دا زندانی آ کوٹی ان کشیرہ ، ای چاگڑد ئنا ایلو بندغ اتیان بار کاوہ زندگی کیوا ۔
ای اندا اُومیت ئٹ اسوٹ ، کنا خیال اک ہڑدے ان جتا ئسر ، ای ہڑدے انبار سوچ خلنگ الوٹ ، کنا احساس و جوزہ غاک اینو جتا ئسر ، ای تینا مُست ئنا حالیت ءِ یِلہ کننگ نا گمان ئٹ ئسوٹ کہ ہرا کنے زند ان نا اُومیت کریسس ، ہرانہ سوب ای تینکہ ، تینا راج و چاگڑد اکن ہچس کننگ الوٹ ۔ ای داسہ اسہ زندہ و بندغ ئس مسوسُٹ ، کنا کوٹی ٹی روشنائی نا برانز اک ئسر ، ای تہار اتے پد بِٹنگ ئسوٹ ۔ ای اندا گمان ئٹ اسوٹ کہ سوب تمینگ تون ای تینا دا کوٹی ءِ یلہ کیوا کاوہ پیشن چاگڑد ئنا ایلو بندغ تیان بار زند گدریفنگ ءِ بناء کیوا ۔ ای آدینک ءِ خن ئس خلکُٹ ءُ اندا اُومیت ئٹ کاٹم ءِ سرجہ غا تخاٹ کہ ای تینا حالیت ءِ بدل کیوا ۔ ای ٹیبل نا زِی آ موم بتی ءِ الاٹ ، کنا کوٹی نا دیوال اک کیہی وخت اتیان روشنائی خنتوسُر ۔ ای داسکان تنگان انتویسٹ ، کنا سرجہ غا کاٹم تخوکے و ای سوچ خلینگ اُٹ ، ای تینا مِلی ئٹ اسہ گچینو زند ئسے نا خاکہ ئس جوڑ کننگُٹ کہ ہرانہ تہٹی مہر ، مابت ، امن و آزادی تخوکے ۔ ای اندا سوچ اتیٹی اُٹ کہ اسہ توار ئسے ہرا کنا مِلی آ برسہ کنا خیال اتے پرغیسہ ءِ ۔
ای تِپرہ دا دیر کِن ءِ ، ولے دا کنا مِلی ئٹ برسہ کنا گچین آ زند ئنا خاکہ ءِ پرغیسہ ءِ ۔۔ای داسکان دا توار اتا انجام آ سر مننگ افٹ ، کنا ملی ارفِنگ اف کہ دا دیر کِن ءُ ۔۔ ولے داخہ سرپد مننگُٹ کہ ننا داریرہ غا گِڑاس بندغ اتا وجود ارے کہ ہرافتہ توار کنا گچین آ زند ئنا خاکہ ءِ پرغنگے ۔ ای اندا توار اتا انجام آ سر مننگ نا جہد ہٹی اُٹ ، کہ کنا کوٹی نا درگہ غا موم بتی نا رژن ئنا سوب گِڑاس بندغ نا بوٹ اتا سیخا تما ۔۔ دم ئس گدرینگتوسُس کہ دافک کنا درگہ ءِ ترندی ئٹ ٹکیفنگ ءِ بنا کریر ۔ درگہ نہ دا ترند آ توار کنا کُل خیال اتے پرغا ءُ ای یکدم کَٹ ان جِک مرسہ درگہ ءِ ملینگ کن اناٹ ۔۔ درگہ ءِ ملینگ تون گِڑاس توفَکی او بندغ کنا رژنا غا کوٹی ٹی پُترینگار ءُ کنے دُوتے بُڑز کننگ نا پاریر ۔۔ کنا دُوک بڑز کوٹی نا دیوال آ تخوک ئسر ، توفکیک کنا کوٹی ٹی تخوک کَٹ آن کنا کتاب اتے تار تار کننگ ئسر ، اوفتان اسٹ ئس تینا توفک نا کُنداخ اسیٹ کنا کوٹی نا آدینک ءِ پرغا تانکہ مون مستی کس داٹی زندہ مننگ کن خن خلینگ کپ ۔
دا توفکیک کنا کوٹی ءِ مچ ائے پٹار ، داسہ داڑے پین ہچس سلوک اف کہ ہرانہ تلاشی متنے ۔ کنا دُوک بُڑزو ءُ مون دیوال کِن ءِ ۔۔ داسہ دا توفکی تیان اسٹ ئس کنا زِنچخ ئٹ الک ءُ کنے کوٹی ان پیشن برانڈہ ٹی کشا ، اوڑا کنتو اوار ہاسٹل نا ایلو کُل کوٹی تیان کشوکا ورناک سلوک ئسر کہ ہرافتہ خنک مہون آ پَٹی اتیٹ تفوک ئسر ۔ دافتیان اسٹ ئس کنا ہم خن تیکن پٹی ئس ایس کہ ہرادے اسٹ ئس کنا خنتے آ تفینگ ئس ۔ ای گڈی وار تینا کوٹی ءِ اُرینگ اسوٹ کہ ہرانا تہٹی توفکی ئس موم بتی ءِ کسفے ءُ تخوکا گلدستہ ءِ تینا بھلا بُوٹ اتیٹ لغت ئس خلسہ ٹُکر کرے ۔ اوکان پد ای ہچس ختوٹ کنا خن تئے پدا اندا مہون آ پٹی تفنگا ءُ نن زندان اتا گواچی مسون ۔۔
داسہ پدا ای اسہ تہارو کوٹی سیٹی اُٹ ۔ دانا دیوال اتئے ہچو آرٹ کشوک اف ءُ ناکہ داڑے تارشوکو پینسل ئس تخوکے کہ ہرادے ارفیسہ ای دا شئیرے لکھیو ،،
“ ہرا کہ لگیفر چراغ رژن بشخر اک ہرا
مدام داڑے سلپسہ مریرہ کُل تا بیگواہ “
داسہ داڑے ہچو آدینک ئس خلوک اف کہ ہرانا تہٹی ای تینے داڑے تموک خنیو ، داڑے ہمو بارون آ پُھل اتا ملاس آ گلدستہ ہم تخوک اف ، کہ ہرادے ای گند کشیسہ تینا زندہ مننگ نا گواچن ءِ محسوس کیو ۔ ولے ہان ، داڑے اسہ کَٹ ئس تخوک ارے ہرادے ای ہفت فُٹ اناس پاننگ کپرہ انتئے کہ دا کوٹی تینٹ پنچ فُٹ ان بھلون اف ۔ داسہ ای دا کوٹی ءِ زندان نا پِن ہم تننگ کیوا ۔
داسہ دانہ تہٹی ای زندانی اُٹ ، کنا ارمانک ، اُست خواہیک ، مہر و مابت نا احساس و جوزہ غاک کُل انداڑے بندو ۔ کنا اُستٹ زندہ مننگ نا ہچو اومیت ئس اف ءُ نئے کہ داسہ کنا مِلی ئٹ آسہ ازات ءُ زند ئسے نا خاکہ ئس جوڑ مریک ۔ داسہ کنا ہم کیفیت اک راستی ئٹ اندنو دُنکہ مراکشی قیدی تا تازمامرت نا زندان اتیٹ کیفیت اک ئسر ۔ داسہ ای دا گِڑائے ہم سرپد اُٹ کہ ننا چاگڑد ئٹ اسہ اندنو تاغت ئس وجود تخک کہ ہرا زندان ان مست ہم ننا ملی تے زندانی ءُ پنجرہ سیٹی قید کریسس ، ننے ان زندہ مننگ نا جوازے پُلاسس ، ننے زندگی کننگ آخہ بلکہ زند گدریفنگ آ مجبور کریسس ۔۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔