امریکا ٹی کرونا نا سوب آن اسہ دے ئٹ جہانی کچ اٹ تیوہ غان زیات مرگ نا ریکارڈ

امریکا ٹی پنچ شمبے نا دے اسہ دے ئٹ کرونا وائرس نا سوب آن ریکارڈ 1169 بندغ نا کذیت نا پڑو کننگا۔ دا جہان ئٹ ملک اسیٹی کرونا نا سوب آن اسہ دے ئٹ مرگ ئنا گواچی مروک بندغ تا تیوہ غان بھلا کچ ءِ۔ دا حالیت آتا پد آن کرونا نا مریض آتا تدفین نا ویل آک زیات مسنو۔

امریکا ٹی کہنگ نا کچ ئٹ ودکی آن گڈ تیوی ملک و گچین وڑٹ نیو یارک ئٹ کرونا آن کہوک آ بندغ آتا تدفین بھاز پدی تمانے۔ جونز ہوپکنز یونیورسٹی نا پاننگ نا رِد ئٹ امریکا ئٹ کرونا آن کہوک آتا ریکارڈ کچ ئنا نوشت چار شمبے نا نن 30:8 آن ہلیس پنچ شمبے نا نن 30:8 نا نیامٹ بیست و چار گھنٹہ ٹی مس۔ دا وڑ ملک ئٹ دا دین آن مرگ ئنا باہ ٹی ہنوک بندغ آتا جمعی کچ 5926 مسونے۔

دا کان مالو اسہ دے ئٹ کرونا نا سوب کہوک تا تیوہ غان بھلا کچ (969) اطالیہ ئٹ 27 مارچ آ ریکارڈ کننگاسس۔ اطالیہ ئٹ دا وائرس آن کہوک آتا جمعی کچ 13,915 و ہسپانیہ ئٹ 10,003 ءِ۔ دا ہڑتوما ملک آک کہوک تا کچ ئنا حساب ئٹ امریکا آن دائسکان بڑز ءُ۔