نظم
(ماہ رنگ نے سماء ءِ )
خرون ہتم نا مُد ئٹ
روچہ نا پاک آ تُو ئس
دیگر قضہ نا وخت آ
سریاب ئنا سڑک ائے
ژُونگارہ سُم تا مسّک
پُھل آ چُناک کُنگُر تیر اتے اُستخان ئٹ
اِمداد دلبر انگا انداڑے ساہ ءِ تسّک
نعمت مَنگُلی آ سینہ ٹی سُم تے کُنگک
پھل آ حبیبؔ ئنا جُون مسّک اسٹ دتر ٹی
سریاب ئنا سڑک آ خیسن دتر تا لپ اک ڈڈر تفیر ہمو دے
سُم تا توار داخس ترند ئسّکہ ہموتم
آزان ئنا توارے بِنتورا رُوچہیک ہم
ہر نیمہ غان پراد اک پلویڑ شال ءِ الکُر
روح اک جتا مریسا اسمان آ بال خلکُر
ساعت ئٹ خرین و سخت آ
باتی تیتون تفوکا بامڑد اسٹ ئسّک
ماہ رنگ ہمو نی اسوس
لاش اتے شُون کروکا
ٹپی تیتو سلوکا
۔۔۔
ماہ رنگ نی خناسک
لاش اک تخوک ئسر ورنا تا ہر مُسیٹ آ
خاہوت اوفتہ الئو
نی اسوسہ کہ اوفتہ راہشونی ءِ کریسہ
نی اوفتیکن سڑک ءِ سریاب ئنا تفیسک
اُومیت ہٹی نی اسوس انصاف دافتے مِلّے
لیکن متو تو دا وڑ !
زُوراک دا نہارا ولدا اُروش کرے اک
ہیڑ اتے گِر کرے اک
تینا لغوری ءِ او سابت کرے ہمودے
کہ الک نے درے اک
زندان آ بند کرے اک
ماہ رنگ ہراتم آ کہ زندان ہٹی نی مسوس
سریاب عاجز انگا نیکن خڑینک شولا
نیکن نا بزگ انگا باتیک آئید کتور
نے نا اُمید کتور
۔۔۔
ماہ رنگ نے سماء ءِ ؟
نا واپسی کہ صبیحہ ہر وڑ نا ڈُکھ خنانے
ہر درگہ غا انانے
مکران ئنا ڈغارا برانز بش کرینے وختس
لکپاس آ تینے وختس تنیا اسٹ خنانے
سخت انگا ساعت ہٹی دا سوگہو سلوکے صبیحہ
نیکن اُروکے صبیحہ
ماہ رنگ نے ہراتم بندی کریر زالِمک
نا سنگت اتے کُل ءِ تاغت نشان تسور
لالا وہاب ءِ خلکر
ماما زہیرے ارفیر
سمی ءِ شیرزال آ بندی کریر جیل ئٹ
ذیشان نا شیرزال آ ہیڑے جتا کریراک
ارفیر نظر مری ءِ
ماہ رنگ نیکہ ہرکس ارفے توار بش مس
الکُر اودے دریراک
لنگڑ نہار ئنا وڑ پیہار نا ڈغارا
بیگواہ کریر بھلو باتیس راج ئنا نا
ماہ رنگ چاہسر دا بندی ءِ دافتہ راہشون
اف کس دافتیو پین !
ماہ رنگ نے سماء ءِ ۔۔؟
نے ان پد دا ڈیھ نا شوخ آ ندارک افس
گوادر نا زِر نا زِی آ نُود اک ہچ بفسا
پوشکن تفینے آٹی آسمان نا بلسمی آ
نیتون اوار کس پئے قدرت نا دروشم اتا رنگاک بندو قید ئٹ
طوبے نا شوخ آ رنگٹ ائے رژن مُست ئنا اف
اِستاک بلبلنگے اِلانو بھاز مُست آن
موسم تے سار افک
ساتئو پِر اتیان پد بوسال ئنا زباد ئٹ خشبو آوار افک
چلتن نا چشمہ غاتیٹ فکری آ ائے چُلک اف
مہردار ئنا مُرو تا چشمہ تئے ہچ بفک رَند
بیشون ءُ پد نیان دا درتی ئنا ندارک
نی داسہ باہدے بر
دا ڈیھ نا ہر اسہ مل نا واپسی ءِ خواہک
نا قدرے جوان چاہک
نا قدرے جوان چاہک
محراب بلوچ