بلوچ آجوئی خواہوک سلاہ بند تنظیم آتا سیوت “براس” نا احوال کار بلوچ خان نا درست ہند ئسے آن بیان شینک کریسہ پارینے کہ بلوچستان نا ضلع کیچ ٹی دشمن فوج تون اِرا جتا جاگہ غاتیٹی جنگ آن ننا مُسہ سنگت شہید مسونو۔ اندا جنگ ٹی دشمن نا چندی کارندہ غاک ام خلننگار۔
بلوچ خان مونی پارے کہ دشمن فوج تون اولی مون تس کیچ نا مشی آ علاقہ کلبر ٹی 25 اکتوبر آ ہمو وختا مس ہرا وخت دشمن فوج براس نا سرمچار آتے گھیڑ کننگ نا کوشست کننگ ئس۔ براس نا سرمچار آک مبشر ہوت پن کروک شاہ دوست و میر جان پن کروک عاجز دشمن نا گھیڑ ءِ پرغیسہ دشمن تون دو پہ دو مریسہ تینا ایلو سنگت سرمچار آتے رکھنگ ٹی دشمن نا گھیڑ آن کشننگ آ سرسہب مریسہ تینٹ جنگ تس نا وختا شہید مسر۔
بلوچ خان براس سرمچار آتا بابت شابیتی اٹ حوال تریسہ پارینے کہ شہید میر جان بلوچ پن کروک عاجز سیوتی تنظیم بلوچستان لبریشن فرنٹ نا سنگت اس ئس ہرا 2013 آن بلوچ راجی تحریک آجوئی ٹی اسے جوانو وڑ اسیٹی تینا جہد ءِ کننگ ئس۔ شہید میر جان تمپ، دشت و مند نا سنگر تیا جدوجہد کننگ ئس۔
او مستی پارے کہ شہید مبشر ہوت پن کروک شاہ دوست سیوتی تنظیم بلوچ لبریشن آرمی نا اسے جہد کار سنگت اس ئس ہرا تینا سلاہ بند جہد ءِ 2017 آن بناء کرے۔ تربت، زامران، بلیدہ، کلبر نا سنگر تیان دژمن تون مون تننگ ئس۔
براس نا احوال کار مونی پارے کہ دژمن فوج تون ارٹمیکو جنگ درو کولواہ نا علاقہ آشال ٹی ہمو تما مس ہرا وختا سرمچار آک گشت ٹی ئسر۔ دژمن فوج سرمچار آتے گھیڑ کننگ نا کوشست کرے ولے سرمچار مختار جان پن کروک کنر دلیری ٹی جنگ تریسہ دژمن نا بھازا کارندہ غاتے خلنگ آن پد تینا سنگت سرمچار آتے گھیڑ آن کشنگ آ سرسہب مس۔ اندا وختا دژمن تون مون پہ مون کئی گھنٹہ جنگ کریسہ کرے۔ دا مرغنا مون تس نا ایسری آ مختار جان شہادت ءِ خمب کرے۔
بلوچ خان پارے شہید مختار پن کروک کنر سیوتی تنظیم بلوچ ریپبلکن آرمی نا تلہ غان گدرینگوک آ پنچ سال آن کیچ، کولواہ و آواران نا سنگر آتیا جنگ تننگ ئس۔ شہید مختار جان اسے مخلص، ایماندار و بہادر ءُ راجی سپاہی اس ئس۔ راجی تحریک ٹی اونا مزاحمتی زند و اونا قربانیک بروکا زنک اکن روشنائی نا کسر ئس مرور۔
بلوچ خان مونی پارے کہ دا ہڑتوم آ مون تس آتیٹی دژمن فوج نا درزن آن زیات کرایہ دار سپاہی خلننگار ولے دژمن اوفتا جون تے ڈھکسہ راہی کننگانے، ولے شہید سنگت مختار جان، شہید سنگت مبشر ہوت بلوچ و شہید سنگت میر جان بلوچ تینا بہادری، جرائت و مزاحمت نا سوب بلوچ نا ملی ٹی ساندہ مرور بلکہ تاریخ ٹی ام ساندہ زندہ مسر۔