بلوچ ورناک و وطن نا دیوان
نوشت: گہور بلوچ
دی بلوچستان پوسٹ
ننے تینا زند ءِ پوسکن کننگ کن ہڑدے پوسکنو سوج ئسیٹ بش مروئی تمک کہ وطن نا مش امر رنگ بدل کرینے۔ گھٹ و تلار آک امر دتر چُرّ ءُ، و داہم ہروئی تمک کہ ورناک تینا زند ءِ امر وطن نا خرّنی کن پوسکن رنگ تننگ ئٹی ءُ۔
ہر پوسکنا دے اسہ جتاؤ سوج ئسے نا کنڈ آ کوکار کننگ کن پیشتمک کہ بشہ تغان سما کر کہ نے وطن پرستی نا لٹ ءِ کوپہ غا کروئی ءِ، وطن نا امامت نے کن سلوک ءِ۔
ورناک توار خلسہ ورندی تِنّنگ ئٹی ءُ کہ اے وطن نا ہر خل و پُھلکاک ننا جون تیان دتر چُرّ ءُ، نی پار کہ نن ہراتم تنگان مسُّنن؟ ہیت پُر انگا تُغ آن سما کننگ نا اف زیبل!
ہیت ہمید ءِ کہ پھلاک نے ہڑدے جتاؤ رنگ بینفنگ ئٹی ءُ، نا لوپ و شم تے ٹی نیکن خرما تتون جھیڑو کرسہ تینے ندر کننگ ئٹی ءُ۔
اے وطن نے یات مرو کہ درو نا دے ہم نن نے پوسکن کننگ کن تینے ندر کرین، نا پھلی مش تے ٹی تینا کوپہ ءِ سنج کرین، اگہ ہیت ایمان، جوزہ و نا سوگوی نا متوکہ تو نن ہم تینے خیسن آ رنگ ئٹی رنگی کتونہ ولے ہیت نے رنگ کننگ نا اف! ہیت نا رکھ و تینا خواجہ ئی نا ءِ۔
اگہ نے باور بفک تو سہب ئنا مالو پیشتموکا دے آن ہرِف کہ گدرینگوکا نن ئٹ اخس ورنا تینے گم کرینو، اگہ سما تما نے تو چک خلیس ہرس کہ ہیڑک امر گلی و چوک آ تیا تینا سرغ ءِ نے کن بےمہار کننگ ئٹی ءُ، ہر کچک تون امر جھیڑو کننگ ئٹی ءُ، اوفتا توار ءِ بنتویس تو خف تورس، سمی و ماہ رنگ پِنی آ شیر زال آتا چِڑکاوہ مرو دژمن نا وتاخ ئٹ ! گڑا پوہ مریس کہ نا خودمختاری کن ورناک دتر چُرّ مننگ ئٹی ءُ !
اگہ ولدا ہم یخین بتو تو سوج کیس کہ حفیظ زمزیر تیٹ تفوک شوتارہ خلنگ ئٹی ءِ، اندن ایلو سنگت آک زندان ئٹی نا بُڑزی ءِ تینا کوپہ غا بڑزا کننگ ئٹی ءُ۔
اے وطن ! اگہ نن نیمہ مس گڑا خن تے بڑزا کیس ہرس کہ توبے نا روشنائی ٹی ورناک کَھلی بڈ پند کننگ ئٹی مرور، دُو دو ٹی ہلسہ گھٹ آتیان جُھپ خلسہ نے کن تمور، پدا بش مرسہ ٹھاک ٹھاک نا رکھ ئنا توار ءِ خلور! گڑا پوہ مریس کہ وطن نا ابدال آک بے سما ع تنگان افس!
اگہ مہر و سوگوی ءَ خناس گڑا تینا بیرک نا رنگ آتے اُست آ تورس, نا ہر رنگ ئٹی نے وطن نا ورنا تا شہادت نا شاہدی رسینگو! ہرس جوان غور ئٹ کہ ہمو مُسہ رنگی آ بیرک ئٹی نا بڑزی نا کسہ غاک نوشتہ مرور اگہ خواننگ کتوس تو نوری ءِ مرام کیس پاس پا ہر وطن نا ابدال آک تاریخ ءِ امر زندہ کرینو!
نوری نا توار مس کہ وطن نا ورناک دتر چُر وطن نا رکھ کن ندر مننگ ئٹی ءُ!
نوری حبس ئٹ پارو کہ اے وطن ! نی پار کہ نا کُٹ ئٹی اخس جون تموک اریر ! دا وطن نا ورناک ءُ۔
پھلنگا وطن نے کن ندر مرین۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔