زوراکی نا بیگواہی تا لڑ اسہ وڑ برجاء ءِ، بلوچستان نا بنجائی شار کوئٹہ آن بلوچستان یونیورسٹی نا خوانندہ اس زوراکی ئٹ بیگواہکننگانے۔ اندن سندھ ئنا بنجائی شار کراچی آن ہم اسہ بلوچ ورنا ئسے نا بیگواہی نا حوال رسینگانے۔
حوال تا رد ئٹ پشتون تحفظ موؤمنٹ کوئٹہ نا سروک زبیر شاہ آغا پارے کہ بلوچستان یونیورسٹی شعبہ فارمیسی نا خوانندہ سید اللہولد حبیب اللہ ءِ تدوکا دے سہب ئنا 7 بجہ نا وخت آ اونا اُرا میکانگی روڈ کوئٹہ آن وائرلس سیٹ آتون اوار بروک سادہ پُچ بینوک 4 نادرست ءُ بندغ تینتو اوار درینو۔
ورنا ءِ بیگواہ کننگ آن گڈ بے ڈس ءُ جاگہ سے آ درینو ہراکان گڈ اونا ہچو حوال دو بتنے۔
زبیر شاہ آغا نا رد ئٹ ہرا وخت ورنا نا خاہوت تدینی نا رپورٹ کن تھانہ غا ہِنا تو پولیس رپورٹ کننگ آن ساف نمن مس۔
بلوچستان ئٹ زوراکی نا بیگواہی تا برخلاف برانز آتا چرجوئی کہی سال تیان برجاء ءِ۔ اندن زیارت تدینی آن گڈ 47 دے آن برانز آ تولوکخاہوت آتون اوڑدئی کن بلوچ سیاسی باسک آ تیان بیدس پشتون سیاسی باسک آک ہم بھلو کچ اسیٹ بسر۔
ایلو نیمہ غان کراچی ٹی بلوچ آتا زوراکی نا بیگواہی نا لڑ اسہ وڑ برجاء ءِ۔ کراچی آن اسہ ورنا سے فورسز آک دزگیر کننگ آن گڈبیگواہ کرینو۔
بیگواہ مروکا بندغ نا چاہنداری علی بخش ولد امید علی نا پِنا مسنے ہرادے کراچی نا دریابی علاقہ عبدالرحمٰن گوٹھ ہاکس بے آنزوراکی ئٹ بیگواہ کننگانے۔ بیگواہ مروک ورنا نا بنماسی تعلقداری بلوچستان نا ضلع آواران آن پاننگک۔
دو شمبے نا دے علی بخش نا خاہوت میڈیا ءِ پارے کہ سادہ پُچ بینوک کارندہ آک اودے عبدالرحمان گوٹھ ہاکس بے آن درینو ہرا داسکانبیگواہ ءِ۔
علی بخش نا خاہوت نا پاننگ ءِ کہ منَہ سال مُست او آواران آن کراچی آ بسوسس۔ عبدالرحمان گوٹھ آ او اسہ دُکان اس کرایہ ئٹ ہلیسہکاریم کننگ ئس ہراڑان اونا اُرا چلیک۔
بلوچ یکجہتی کمیٹی کراچی نا آرگنائزر آمنہ بلوچ کراچی ٹی بے ڈوہ بلوچ آتا زوراکی نا بیگواہی تا چرجوئی آ بیم ئنا درشانی کریسہپارے کہ اسہ کنڈ آن سندھ حکومت اوفتتون ہیت و تران کیک و ایلو کنڈ آن زوراکی نا بیگواہی تیٹ ترندی بننگ ءِ۔ سندھ حکومت تینا اِرانیمہ ئی پالیسی تے الیپک۔ حکومت بایدے ساف نیت ئٹ ہیت و تران کے۔
آمنہ بلوچ نا پاننگ ئس کہ اسہ بیگواہ ءُ بلوچ ئسے یلہ کننگ مریک تو ایلو کنڈ آن مُسہ پین بے ڈوہ بندغ بیگواہ کننگ مریرہ۔ او سندھحکومت آن خواست کرے کہ کراچی آن بیگواہ مروکا غٹ بیگواہ آ بندغ آتے آجو کننگ مرے۔