کنا مار و اونا سنگت آتے آجو کننگ مرے۔ بیگواہ کبیر بلوچ نا لمّہ

بیگواہ کبیر بلوچ نا لمّہ نا پاننگ ءِ کہ کنا مار کبیر بلوچ و اونا سنگت مشتاق بلوچ و عطاء اللہ بلوچ نا زوراکی نا بیگواہی ءِ 14 سال پورومننگ ءِ ولے او داسکان آجو مننگ افس۔

او تینا مار کبیر بلوچ، مشتاق بلوچ و عطاء اللہ بلوچ تون اوار غٹ بیگواہ آ بندغ آتا آجوئی نا خواست کریسہ پارے کہ اسہ ہم حکومتاس بیگواہ آ بندغ آتے آجو کننگ کن سوبر اف۔ ہر اسہ حکومت دا اہم بندغی ویل ءِ مرغن کننگ کن نہ بیرہ بے اختیار ءُ کمیشن و کمیٹیجوڑ کریسہ تینا گٹ ءِ دا پھاؤ آن کشنگ نا کوشست کیک بلکن داکان مُست ہم عدالتی انکوائری کمیٹی جوڑ کننگانے۔

اونا پاننگ ءِ کہ جسٹس جاوید اقبال نا سروکی ٹی بیگواہ آ بندغ آتا آجوئی کن کمیٹی ہم جوڑ کننگا ولے اوفتا کاریم صفر ئس، او بازمتنازعہ ہم مس سرکاری خزانہ آن اوفتے کروڑ آ رپئی دا بابت ئٹ تننگا ولے او بیگواہ آ بندغ آتے آجو کننگ نا جاگہ غا اوفتا خاہوت آتےفریشان کننگ، خُلیفنگ و تڑی تننگ نا کوشست کریر تاکہ خاہوت آک تینا بندغ آتا آجوئی نا خواست آن دو کشیر۔