بلوچستان نا فن کار آتا بد حالیت آ ایسری

الّمی خوانبو

رخصت اف – مرید بلوچ

مزاحمت زند ءِ ’’ای، ہمو ہراکہ جہانی امن ئنا ٹیکی ءِ دوئی کرینٹ، مونجائی تون انداسرپد مریوہ کہ بیدس تشدد...

بلوچ سلہہ بند تنظیم تا کروکا گڑاس فیصلہ تا جاچ __میرین بلوچ

جنگ اٹ ہچبر رحم مفک بلکہ جنگ ءِ نفسیاتی پڑا کٹوئی مریک جسمانی طاغت آن زیات نفسیاتی طاغت جنگ...

تاریخ نا پنہ غاک (چارمیکو بشخ) | خان خدائیداد خان – محبوب شاہ

تاریخ نا پنہ غاک (چارمیکو بشخ) خان خدائیداد خان نوشت: محبوب شاہ دی بلوچستان پوسٹ - براہوئی کالم 1896ء اٹی(No.7) و 1870ء...

بلوچستان نا فن کار آتا بد حالیت آ ایسری

نوشت: وسیم عالم
مٹ: گندار بلوچ

اللہ نا فضل و کرم ئٹ غٹ کنے جوان چارہ، ای اسہ فن کار ئسے اُٹ۔ ای چُنکی آن ہلیس اینو اسکان فن تون دلچسپی برجاء تخانُٹ ولے اینو ای بھاز بیم ئنا گواچی اُٹ کہ کنا ایسری ہم محمد مراد پارکوئی، یاسین بسمل، رمضان زیدی والا، جنگی خان، عبدالنبی آفتاب و ایلو بھلا بیوس آ فن کار آتا وڑ مف۔ مستونگ آن تعلقداری تخوک عبدالنبی آفتاب بلوچستان نا اسہ پنی ءُ طبلہ نواز ئسے۔

او غریبی آن بیدس تینا مچ زند ءِ فن کن تیر کرے۔ او تینا بولی و دود ربیدہ ءِ غٹ جہان ئٹ تالان کننگ نا جنونی اس ئس۔ او بھلا بھلا گلوکار آتون صوبہ، ڈیہہ و پیشن ملک آتیٹ تینا فن ءِ منِفے ولے۔۔۔ ولے اِرا دے مُست ہرا وخت کنے حوال رسینگا کہ استاد عبدالنبی آفتاب اُست ئنا دورہ نا سوب آن سول اسپتال کوئٹہ ٹی داخل ءِ ای اوڑتو اوڑدئی کن اسپتال آ ہِناٹ تو اُست ئنا ناجوڑ آتا وارڈ ئٹی استاد تنیا بے یار و کمک کار تموک ئس۔ کنے خننگ تون استاد نا خن تیان خڑینک آک وہار و بے وسی ئٹ اوغنگ بناء کرے و پارے کہ وسیم جان ای اخس دے آن زند و مرک ئنا چِک و تاڑ ئٹی اُٹ۔ نے آن بیدس کنے آ کس بتنے۔ وسیم جان ای تینا مچ زند ئٹ تینا بولی و فن ئنا خذمت ءِ کرینُٹ۔ منَہ دے مُست کنے اُست ہلک، کنا چُناک کنے کوئٹہ آ ایسُر و سرکاری اسپتال ئٹ داخل کریر۔

ڈاکٹر آک پاریر کہ کنے دمدستی انجیو پلاسٹی و اُست ءِ سٹنٹ خلوئی تمو نہ تو بچنگ کنا مشکل ءِ۔ داڑکن ہشتاد ہزار روپئی بکار ءِ۔ وسیم جان کنا چُنا تیا قیامت تما، کنتو داخس پیسہ الو۔ ہشتاد ہزار ہراکا ہیسورہ۔

کنا چُناک اُرا اُرا غا ہنار دو توریر و ہرا سختی ئٹ پیسہ وام کریر و کنا انجیو پلاسٹی مس۔ وسیم جان داسا کنے کیہی دے اسکان سیلہ خلور ہرافتا نہاد بیست و چار ہزار ءِ۔ کنا چُناک دیر دیر نا مونا دو تورور۔

وسیم، مگہ ننا ڈوہ اندادے کہ نن مچ زند ئٹ تینا بولی دود ربیدہ و فن ئنا خذمت کریسہ مخلوق ئٹ خوشی بشخین ولے ننا اُرا تیٹ بین جاگہی مرے۔ نن تینا چُنا تے تعلیم ہم تننگ کپن؟ و نن تینا بہشتی آ چُنا تے پوسکنو پُچ و چوٹ ہم تننگ کپن؟ و اینو ای مرگ ئنا خڑک آ سر مسونٹ تو کس نئے کنا کمک ءِ کرے نئے کنا حوال ءِ ہلنگ کن بس۔ ہرادو محکمہ دود ربیدہ نا افسر آک ہرا ننا پِن آ لکھ آ تنخواہ تے ہلیرہ ؟ ہراد ءُ ادبی اکیڈمی و ادبی تنظیم آک ہرافتے کروڑ آ پیسہ آک گرانٹ رسینگرہ۔

وسیم جان نن فنکار آتا بلوچستان ئٹ عجب ءُ زند ئسے۔ ننا بولی ءِ جہان ئٹ تینا زیبا غا دود ربیدہ ئی انداز ئٹ چاننگوک آ محمد مراد پارکوئی ایسری سن ئٹ سخت ناجوڑی نا سوب آن خیراتی ءُ اسپتال اسیٹ گِر کنیسہ کذیت کرے۔ مُچ زند ئٹ ریڈیو و ٹی وی آ تینا زبان ءِ پاروکا لوک فن کار تینا تیوہ شرف داری داد آتے کسر تیا بہا کننگ کن تخا کہ ای و کنا چُناک بینگن اُن دا داد آتے ہلبو ننے دافتا نہ بلکن اِرا وخت ئنا اِرغ بکار ءِ۔

دیر دیر نا ہیت ءِ کیو؟

مُچ زند ئٹ مخلوق ئٹ خوشی بشخنگ آن پد ننا ایسری دا مرے کہ نن بین و ناجوڑی تیٹ گِر کنیسہ کہین؟ انداخس پاریسہ او ہیسکیسہ اوغنگ بناء کرے۔ ای استاد نا خڑینک آتے ساف کننگ نا کوشست کریٹ و اودے دروغ ءُ تسلی تریسہ پیشتماٹ۔ و کاٹُم ئٹ ہلیسہ توسُٹ و سوچاٹ کہ وسیم نی تینا خواننگ ءِ ہلاس و فن ئنا خذمت ءِ بناء کریس۔ اینو نی ورنا اُس، ہر محفل ئٹ نے پیسہ رسینگک۔ پگہ نی پیر مروس گُڑا نا حال انت مرو؟

نا چُناک ہم مخلوق نا مون آ دو توریسہ پنڈور؟ نی ہم خیراتی ءُ اسپتال ئسے ٹی گِر کنیسہ زند گدریفوس؟ دا بے حس آ حکومت، دا کروڑ آ روپئی تے گرانٹ ہلوک آ ادبی تنظیم آک ہچ کروفس۔ بس اُلس ننے مُدام شرف تسنے۔ پگہ شار ئنا چوک آتیا الس ڈولی تخیسہ نن کن چندہ کرو؟ اندادے ننا زند؟ اینو محمد مراد پارکوئی نا ڈکھیائی آ مرک، استاد بشیر نا در پہ دری نا زند و استاد عبدالنبی نا ڈکھیائی آ ایسری ءِ خنیسہ سوچنگ اُٹ کہ ننا ہم ایسری انت مرو؟ اگہ اندا ڈول مس، حکومتی ادارہ، محمکہ دود و ربیدہ، و ادبی ادارہ آک ننے آن خن تے ہڑسار تو پین وختی کس اس ہم بولی، دود ربیدہ و فن ئنا خذمت ءِ کروف۔

غٹ جہان ئٹ حکومت آک زند بلکہ مرک آن گڈ ہم فنکار آتا خاہوت آتون کمک مریرہ و تعاون کیرہ۔ ولے نن بین و ناجوڑی تیٹ گِر ہلیسہ کہینہ۔ مگہ داسا ہم حکومت، کلچر ڈپارٹمنٹ و ادبی و دود ربیدہ ئی تنظیم آک عبدالنبی آفتاب نا کمک ءِ کرور یا اودے داکان ہم زیات دڑدی ءُ موت اس ایتور۔

ہئو اینو ہرا وخت ای دا لوز آتے نوشتہ کننگ اسُٹ کہ اسہ پین ڈکھیائی ءُ حوال اس رسینگا کہ سرزمین جھالاوان نا عظیم لوک فن کار محمد رمضان زیدی والا ہرا بھلو وخت ئسے آن باز ناجوڑ ئس، سوشل میڈیا ٹی اونا ویڈیو و عکس آک بننگ ئسر۔ اونا کمک کن خواست مننگ ئس۔ ولے او عظیم و مسکین آ فن کار ہم اینو سرکاری اسپتال ئٹ مرگ ئنا گواچی مس۔

نن فن کار آ تون دا ظلم، دا نا انصافی آخر ہرا وخت اسکان مرو؟


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔

پُوسکنا حوالک

کوئٹہ: خودکش تراک، پولیس کارندہ آتون اوار کہیک مرگ نا گواچی

بلوچستان نا دارالحکومت کوئٹہ ٹی اینو سہُب مروک اسہ خودکش جلہو ئسے ٹی پولیس کارندہ آتون اوار بیست و...

ایران ءِ اقوام متحدہ ٹی زالبول آتا کمیشن آن کشنگ نا گمان ارے

برجاء سال ستمبر ئٹی ورنا کرد مسڑ مہسا امینی نا ایرانی پولیس نا دزگیری ٹی بےدادی ئٹ خون و اوکان گڈ بناء مروکا برانز...

ایلم شاہ فہد ءِ فورسز آک اُرا غان بیگواہ کریر، پاش کننگ مرے – رضیہ بلوچ

بلوچستان نا بنجائی شار شال ئٹی زوراکی نا بیگواہی تا برخلاف وائس فار بلوچ مسنگ پرسنز نا برانزی کیمپ اینو 4875 می دے ہمپریس...

سبی: اولیکو سندھ بلوچستان کرکٹ ٹورنامنٹ بناء مس

آل سندھ بلوچستان کرکٹ ٹورنامنٹ بناء مس، گوازیک سبی و حب چوکی ٹی مرور۔ بلوچستان نا ضلع سبی ٹی اولیکو آل سندھ بلوچستان کرکٹ ٹورنامنٹ...

کاہان آپریشن: خلنگوک بندغ آتا جون تیا فورسز آتا گھاٹ

تدوکا دے تیٹ بلوچستان نا ضلع کوہلو ٹی فوجی آپریشن ئٹی خلنگ مروکا بندغ آتا جونک کوہلو ڈی ایچ کیو آ رادہ کننگانو و...