صومالیہ نا بنجائی شار موغادیشو ٹی درو نا مروک تراک آتیٹ 100 آن زیات بندغ بیران و کم و ود 300 بندغ ٹپی مسنو۔
صدر حسن شیخ محمود جاگہ نا دورہ ءِ کرے و دہشت گرد آ جلہو تیٹ 100 آن زیات بندغ نا بیران و کم و ود 300 بندغ نا ٹپی مننگ نا پڑو کرینے۔
پیشن ملکی میڈیا نا رد ئٹ تراک آتیٹ صومالیہ نا وزارت تعلیم ءِ ٹک کننگا، تراک آتیان خڑک ئنا ماڑی تا شیشہ غاک پنار۔
پولیس و سرکاری حوال تروک ایجنسی پارے کہ صومالیہ نا بنجائی شار موغادیشو ٹی ہفتہ نا دے وزارت تعلیم ئٹ اِرا کار بمب تراک آتیٹ کہی بندغ آک بیران و ٹپی مسنو۔
پولیس کپتان نور فرح پارے کہ منہ منٹ نا وخت آن گڈ تراکی مواد آتیان پُر ءُ اِرا کار وزارت تعلیم نا دیوال آتون ڈک لگانو۔
نور فرح اسہ پیشن ملکی حوال تروک ادارہ ئسے پارے کہ اولی تراک وزارت آ مس پدا ارٹمی تراک ہموتم مس ہراتم ایمبولینس آک زیمی مروک آتا کمک کن مُچ مسر۔
وزارت نا رکھ اکن سلوک اسہ پولیس افسر، حسن میڈیا ءِ پارے کہ او کم و ود 12 جوْن و 20 آن زیات بندغ ءِ ٹپی خنانے۔
صومالیہ نا سرکاری نیوز ایجنسی نا صحافی محمد عیسٰی نا پاننگ ئس کہ دا تراک آتیٹ کہی بندغ آک بیران مسنو۔
تراک آتا جاگہ آن خڑک پیشن ملکی حوال شینک کروک اسہ صحافی ئس پارے کہ ہڑتوما تراک آک منہ منٹ نا وخت ئٹ مسر و ایب کیب نا ماڑی تے نسخان رسینگا۔ او پارے کہ تراک آتیان زیمی مروک آتا دترک خڑک ئنا جتا ماڑی تیا چٹ ہلکنے۔
اسہ ایمبولینس ئسے نا ڈرائیور عبدالقدیر عبدالرحمٰن پارے کہ ہراتم نن اولی تراک آن بیران و ٹپی مروک آتے دننگ کن بسون تو ہموتم ارٹمی تراک مس ہرا نا سوب آن ننا ایمبولینس ہشنگا۔
ایمبولینس نا ڈرائیور ودیک پارے کہ تراک ئٹ اسہ ڈرائیور و بنائی دارو درمان کروک باسک ئس ہم ٹپی مسنے۔
یاتی مرے کہ القاعدہ نا مخ تفی ئٹ الشباب ہرا صومالیہ ٹی دئے سال آن جنگ کننگ ءِ، بنجائی حکومت ءِ دڑفنگ و شرعی قانود نا سوگوْ تشریح نا بنیات آ تینا حکومت ءِ ٹہیفنگ نا کوشست کننگ ءِ۔