سوراب نا تدینی– ٹی بی پی سرگپ
بلوچستان نا ضلع سوراب نا علاقہ گدر گوندان ئٹ 12 اگست نا سہب اکن پاکستانی جیٹ طیارہ غاتا بمباری نا سوب آن کیہی بندغ آک کسر و ٹپی مسر۔ پک مفروکا السی حوالکار آک کہوکا و ٹپی آتا کچ ءِ بیست و ہفت پارہ۔ اندا تدینی نا برخلاف خاہوت آک جون آتیتون اوار کوئٹہ کراچی بنجاہی کسر آ تولوک برانز کرسا تینا برانز ءِ ریکارڈ کرفیر۔ بلوچ راج دوست ٹولی و بندغی حق آتا تنظیم آتا پارہ غان دا تدینی آ ترند لوز آتیٹ مذمت آک ہم مونا بسر۔
ڈی ایچ کیو سوراب نا میڈیکل سپرنٹنڈنٹ نا پارہ غان شینک کروک شابیتی تا ردئٹ تدینی آن پد اسپتال ئٹ شش جون ہتنگا، ہرافتیٹی زالبول و چناک اوار ءُ۔ کہوکا بندغ آتا سن اِرٹ آن 50 سال نا کچ پاننگک۔ اسپتال نا بست و بند نا ردئٹ 16 ٹپی ہم ہتنگا، ہرافتیٹی بھازی زالبول و چنا اوار ءُ، ہرافتا سن آک اسٹ آن 40 سال نا کچ ئٹ ءُ۔ ایلو پارہ غان ہندی حوالکار تا دعوی ءِ بھاز آ جون آتے فوجیک ارفسا تینتون دریر، ہرانا سوب آن کیہی جون آک اسپتال آ سر کننگ متور و اوفتا کچ و چاہنداری نا بابت تیوہ حوال آک ہم مونا بننگ کتور۔ حوالکار تا ردئٹ تدینی آن پد بھاز آ بندغ آک دائسکان گم و گار ہم اریر، واہم سماء تمنگ اف کہ او مِش تا کوڑ ئنا شیف آن ءُ یا ترند تراک نا سوب آن اوفتا ازبہ غاک رسیگنگ افس۔
سوراب نا دا تدینی اولیکو اف۔ بلوچستان ئٹ ہنوکا وخت ئٹی ہم پاکستانی جیٹ طیارہ غاتا گن شپ ہیلی کاپٹر آتا کارروائی تیان لس آباتیک زہمی و بندغ آک کہسا کرینو۔ بلوچستان ئٹ جہانی میڈیا آزاتی ئٹ بننگ کپک، اندن ہندی صحافیک ہم ریاستی خلیس نا ماحول ئٹ کاریم کیرہ۔ دن انگا وخت ئٹ فوجی کارروائی و لس آباتی نا زہمی مننگ نا تدینی تا آزات رپورٹنگ کم و ود ناممکن مریک۔ پدان ریاستی ادارہ غاک و پاکستانی میڈیا نا ذریعت ئٹ اسہ خاص ءُ بیانیہ اس مونا بریک، اندن زہمی مروک بندغ آتا گواہیک و زمینی گواچنیک جتا ءُ عکس اس مونا ہتیرہ۔
سوراب نا تدینی اسہ ریاستی ردی یا بیرہ اسہ فوجی آپریشن ئسے نا افسوز ناک ءُ سوب اس اف۔ دا اندا کوزہ گیر آ بست و بند نا اسہ پین خونی عکس ئسے ہرا دہائی تیان بلوچستان نا سیاسی اختیار، مڈی و مخلوق نا توار ءِ تینا طاغت نا شیف آ تخنگ نا کوشست کرینے۔ اسلام آباد بلوچستان آ حکمرانی نا دعوی الم کننگ کیک، ولے بیرہ طاغت ءِ کاریم ئٹ ہتنگ آن حکمرانی نا اخلاقی و سیاسی جواز ودی مفک۔ جنگی طیارہ غاتا توار، اُرا تا بھس کاری، بندغ آتا کہنگ، زوراکی نا بیگواہیک و خُلیس نا وسیلہ ئٹ اسہ ڈغار ئسے نا بندغ آتے دو ئنا کیرغ آ تخنگ مننگ کپک، اوفتا آجوئی نا سوج ءِ ایسر کننگ کپک۔