بلوچستان نا ضلع کوہلو ٹی پاکستان لشکر نا پارہ غان ارٹمیکو دے ہم آپریشن برجاء ءِ ۔
فوجی آپریشن نا بناء درو سہُب تون کننگا ہراڑے ڈرون جلہو آن گُڈ کم و ود ہشت ہیلی کاپٹر علاقہ ٹی رسینگار۔ آئی ایس پی آر تدوکا دے آپریشن نا پَک ءِ کریسہ بلوچ لبریشن آرمی نا نو بندغ ءِ خلِنگ و مُسہ بندغ ءِ ٹپی حالت ٹی دزگیر کننگ نا دعویٰ کرے ۔
جانی نسخان و دزگیری تا دائسکان ہندی ذرائع تان پَک متنے اندن فوج نا پارہ غان ہم شابیت حوال دوئی کننگتنے ۔
ٹی بی پی ءِ ذرائع نا پاننگ ءِ کہ اینو ارٹمیکو دے ہم فوجی کارندہ آک علاقہ ٹی ساڑی ءُ ۔ فوج نا پارہ غان ہندی بندغ آتا اُراتے ہُشنگ نا حوال آک بننگ ءُ واہم علاقہ ٹی ہِن و بر بند مننگ نا سوب آن دائسکان دا پَک متنے ۔
یاتی مرے کہ تدوکا تُو نا بناء ٹی بولان ٹی شابیت ءُ فوجی آپریشن اس کننگا ہراٹی گن شپ و جاسوس طیارہ آک بشخ ہلکُر اندن جیٹ طیارہ آتا بال کننگ ہم دا نیام ئٹ خَننگ ٹی بس۔
بولان آپریشن ٹی پاکستانی فوج چار بلوچ آزاتی دوست آتے خلنگ نا دعویٰ کرے واہم اوکان گُڈ بلوچ لبریشن آرمی نا ترجمان جیئند بلوچ بیان ئٹ پارے کہ ” بی ایل اے نا سرمچار آک بولان ٹی اسہ تیوہ ءُ ہفتہ ئس مون پہ مون نا جنگ آن گُڈ پاکستانی لشکر نا جلہو ءِ بے سُہب کریر۔
اونا پاننگ ئس کہ دا وخت آ دژمن فوج نا پانزدہ کارندہ ءِ مرگ نا گواچی و اسہ درزن آن زیات ءِ ٹپی کننگا ۔ اندن لُمہ وطن نا رکھ ءِ کریسہ ، بی ایل اے نا مُسہ سرمچار سنگت ایسری سُم نا فلسفہ آ تینا کریسہ شہید مننگ نا ہند ءِ خوْندی کریر۔” ۔
کاہان آپریشن ٹی آئی ایس پی آر نا بیان آن گُڈ دائسکان جیئند بلوچ ہچ پاتنے۔