تدوکا دے تیٹ بلوچستان نا ضلع کوہلو ٹی فوجی آپریشن ئٹی خلنگ مروکا بندغ آتا جونک کوہلو ڈی ایچ کیو آ رادہ کننگانو و اسپتال آفورسز آک سخت گھاٹ تننگ ءُ۔
ڈی ایچ کیو ٹی تخوکا جون تا چاہنداری داسکان مننگ کتنے و فورسز آتا کنڈ آن کس ءِ اوفتے اُننگ نا موکل تننگ متنے۔
ہندی حوال تا رد ئٹ ڈی ایچ کیو ٹی مردہ خانہ و پین آسراتی اف، ہرا نا سوب آن جون تا گند علاقہ ٹی تالان مسنے و فورسز آک پنکروک بندغ آتا چاہنداری نا بابت ئٹ ہچو کاروائی نا موکل تننگ افس۔
ڈی ایچ کیو نا اسہ ڈاکٹر اس تینا پن ءِ پاش کپننگ نا شڑت آ دی بلوچستان پوسٹ ءِ پارینے کہ اسپتال ئٹی نو بندغ نا جون تے اتنگانےہرافتیٹ گیشتری نا مونک جشوک ءُ۔
او جون تا چاہنداری نا بابت ئٹ پارے کہ عسکری کوالخواک داسکان کس ءِ جون تے اُننگ نا موکل تتنو ہرا نا سوب آن داسکان دا جون تاچاہنداری مننگ کتنے۔
اندن علاقائی حوال تا رد ئٹ علاقہ ٹی آپریشن آن گڈ اِرا ہندی کھریا ہم بے ڈس ءُ ہرافتا بابت ئٹ داسکان سما تمتنے کہ او فورسز آتادزگیری ٹی ءُ یا اوفتے خلکُنو۔
کاہان ئٹی شمبے نا سہب پاکستانی فوج سیاہ کوہ و ایب کیب ئٹ فوجی آپریشن بناء کریسس۔ آپریشن ڈرون جلہو تیٹ بناء کننگاہراڑان گڈ اِرا دے اسکان ہیلی کاپٹر آک آتا ہِن و بر برجاء ئس۔
پاکستانی فوج ئنا لس حوالکاری شعبہ آئی ایس پی آر آپریشن نا حوال ءِ پک کریسہ بلوچ لبریشن آرمی نا نوہ باسک خلنگ و مُسٹ ءِٹپی حالیت ئٹی دزگیر کننگ نا دعویٰ کریسس۔
بلوچ لبریشن آرمی داسکان دا بابت ئٹ ہچو ہیت کتنے۔