بلوچستان نا بنجائی شار شال ئٹی زوراکی نا بیگواہی تا برخلاف وائس فار بلوچ مسنگ پرسنز نا برانزی کیمپ اینو 4875 می دے ہمپریس کلب نا مونا برجاء ئس۔
دا وخت آ ضلع مستونگ آن محمد عظیم بلوچ، نور محمد بلوچ، دستگیر بلوچ و ایلو خاہوت آتون اواری نا درشانی کن بسر۔
اینو بلوچستان نا ضلع خاران آن رضیہ بلوچ کیمپ آ بریسہ تینا برانز ءِ ریکارڈ کرفے۔
رضیہ بلوچ پارے کہ کنا ایلم شاہ فہد ءِ برجاء سال مارچ ئٹی ننا اُراغان سیکورٹی فورسز آک دزگیر کریسہ زوراکی ئٹ بیگواہ کریر وننے ایلم نا بارو ئٹ ہچو معلومداری تننگ افس ہرا نا سوب آن ننا خاہوت ذہنی اذیت نا گواچی ءِ۔
او پارے کہ سیکورٹی فورسز آک ننا اُرا غان ہفتاد ہزار روپئی، کمپیوٹر و ایلو مڈی تی ہم تینتو دریر۔
اونا پاننگ ئس کہ اکتوبر نا تو ئٹی چیف سیکٹری و ایف سی ذمہ وار آک پاریسُر کہ کنا ایلم ءِ سی ٹی ڈی درینے۔ کنا ایلم ءِ پاش کننگمرے۔
تنظیم نا کمک کماش ماما قدیر بلوچ پارے کہ کیہی سال تیان بلوچستان ئٹی برجاء بلوچ نسل کشی نا ترندی ٹی ریاست ہڑدے ودکیکننگ ءِ۔ بلوچ آتے زوراکی ئٹ بیگواہ کریسہ اوفتیا بے بندغی ءُ بےدادی کریسہ شہید کننگ و اوفتا جشوک جون تے خسنگ نا ڈول آ بےبندغی عمل آک برجاء ئسر کہ ریاست پاکستان بلوچ نسل کش نا پالیسی تیٹ ترندی ہتیسہ لس بلوچ شاری تا اُرا تیا بمباری کننگ، چادرو چار دیواری ءِ لتاڑیسہ اوفتے لٹ و پُل کننگ و پد ءِ ہُشنگ نا پوسکنو لڑ اس بناء کرینے۔