اوغانستان نا شار مزار شریف اٹ سڑک نا رہی آ مروک اسہ بم تراک اسیٹ پٹرولیم کمپنی نا ہفت کاریم کروک کسکنو۔
حوال تروک ادارہ اے ایف پی بلخ پولیس نا ترجمان نا رِدئٹ پارے کہ دا تراک سئے شمبے نا دے مس۔
مزار شیرف پولیس نا اسہ کارندہ آصف وزیری پارے کہ ‘دا بم سڑک نا رہی آ اسہ ریڑھی اسیٹ تخوک ئس۔ ہراتم پٹرولیم کمپنی نا بس اوڑے سر مس تو بم ترخا۔’
یاتی مرے کہ طالبان خدو اگست ئٹ ملک نا کوالخواہی دوئی کننگ آن گڈ دعویٰ کریسس کہ امن و ایمنی نا حالیت زَبر کننگانے واہم بھلو وخت ئسے آن جتا علاقہ آتیٹ کہی بم تراک و جلہوک مسونو۔
دافتیٹ زیات جلہو تا ذمہ داری ءِ ‘داعش’ نا ہندی کُڑدہ ارفینے۔
برجاء تُو نا بناء ٹی مزار شریف نا قطبی کہی ہلنگوک علاقہ ئٹ اسہ مدرسہ اسیٹ ہم بم تراک اس مسوسس ہراٹی 19 بندغ مرگ ئنا گواچی و 24 ٹپی مسر۔
آصف وزیر اے ایف پی ءِ اینو نا تراک نا بابت پارے کہ دا تراک سید عباد چوک نا رہی سہب تون ہفت بجہ غا مس۔
تراک ئٹ شش بندغ ٹپی ءُ۔ دائسکان تدینی نا بابت شابیتی حوال مونی بتنے و کس اس جلہو نا ذمہ واری ءِ ارفتنے۔