بلوچستان نا بنجائی شار کوئٹہ آن پین مُسہ خوانندہ زوراکی ئٹ بیگواہ کننگار اندن سبی و قلات آن اِرا بندغ ءِ زوراکی ئٹ بیگواہکننگا۔
پنچ شمبے نا ننکان 9 بجہ نا وخت آ 3 بلوچ خوانندہ ءِ کوئٹہ اے ون سٹی آن بیگواہ کننگا۔ بیگواہ بلوچ خوانندہ آتیٹ کیّا ولد محمداشرف، عاطف ولد محمد فضل نا تعلقداری تحصیل مشکے و شیر خان ولد سومار نا تعلقداری تحصیل ناگ راغے آن ءِ۔
حوال تا رد ئٹ فورسز آک خوانندہ تے دزگیر کریسہ نادرست جاگہ آ دریر۔
اندا وخت ئٹ ضلع سبی آن رسینگوک حوال تا رد ئٹ اسہ بندغ ئسے فورسز آک دزگیر بیگواہ کریر۔
خاہوتی حوال تا رد ئٹ اِرا دے مالو سبی بختیار آباد آن خڑک شاندار ولد دلاور ءِ پاکستانی ڈھکوک ادارہ و فورسز آک دزگیر کریسہبیگواہ کریر ہرا داسکان بیگواہ ءِ۔
اندن تدوکا دے جمعہ آن گڈ قلات نا تحصیل منگچر آن سلاء بند بندغ آک نصراللہ ولد حاجی حضور بخش مینگل ءِ زوراکی ئٹ بیگواہکریر۔
علاقائی حوال تا رد ئٹ موْن شیشئی آ گاڑی ٹی سلاء بند بندغ آک بسر و پن کروک بندغ ءِ اونا اِرا چنا نا مون آن زور ئٹ تینتون دریر۔علاقائی ذرائع تا پاننگ ءِ کہ پن کروک بندغ نا تعلقداری سرکار تون مُخ تفی کروک سلاء بند ٹولی یعنی ڈیتھ اسکواڈ آن ءِ۔
بلوچستان ئٹ زوراکی نا بیگواہی تا برخلاف کاریم کروک گل وائس فار بلوچ مسنگ پرسنز خوانندہ آتا زوراکی ئٹ بیگواہی آ خُلیس نادرشانی کریسہ کیّا، عاطف و شیر خان ءِ مونا ہتنگ نا خواست کرے۔
اسہ بیان اسیٹ او پارے کہ گل ءِ حوال رسینگانے کہ پنچ شمبے نا ننکان 9 بجہ نا وخت آ خوانندہ کیّا ولد محمد اشرف، عاطف ولد محمدفضل ہند مشکے و شیر خان ہند ناگ راغے کوئٹہ آن زوراکی ئٹ بیگواہی نا گواچی مسنو۔