بلوچستان نا ضلع خضدار نا علاقہ زہری و قلات نا تحصیل منگچر آن اِرا ورنا نا جونک خننگانو۔
شابیتی حوال تا رد ئٹ تدوکا دے ضلع خضدار نا تحصیل زہری نا مشی آ علاقہ سیاہ کوہ آن ہندی بندغ آتے اسہ ورنا ئسے نا جون رسینگا ہرادے زہری بست و بند ئنا دوٹی تسر۔
ہندی بست و بند جون ءِ دوئی مریسہ زہری نورگامہ اسپتال آ درے ہراڑے جون ئنا چاہنداری عبدالواحد ولد محمد حسن لوٹانی نا پن ئٹ مس ہرا 35 دے آن ناگمانی وڑ ئٹ بیگواہ ئس۔
بست و بند الّمی کاروائی آن گڈ جون ءِ خاہوت نا دوٹی تس، واہم ورنا بیگواہی و کہنگ نا شابیتی حوال آک دائسکان مونا بتنو۔
ایلو پارہ غا قلات نا ہند منگچر آن اسہ ورنا ئسے نا جون خننگا ہرادے سم کاری ئٹ کسفنگانے۔
شابیتی حوال تا رد ئٹ بلوچستان نا ضلع قلات نا تحصیل منگچر ڈیم آن جون اس خننگانے، حوال رسینگ تون ہندی بست و بند جاگہ غا سر مریسہ جون ءِ میڈیکل معائنہ کن اسپتال آ درے۔
قلات بست و بند نا رد ئٹ خون مروک نا چاہنداری سعداللہ ولد خان محمد قوم لانگو ہند زرد عبداللہ نا پن ئٹ مسنے ہرادے سم کاری ئٹ کسفنگانے۔
واہم خون ئنا سوب دائسکان سماء تمتنے، گیشتر پٹ و پول ہندی پولیس کننگ ءِ۔